યુવકને બાઈક પર આગળ મંગેતરને બેસાડી રોમાન્સ કરવો ભારે પડ્યો, પોલીસે લીધું એક્શન

Vadodara News : આજકાલના યંગસ્ટર્સ વાહનો પર સ્ટંટ કરવાના રવાડે ચઢ્યા છે. વાહનો પર જોખમી રીતે સ્ટંટ કરીને પોતાના અને અન્યોના જીવ જોખમમાં મૂકી રહ્યાં છે. ત્યારે વડોદરામાં એક યુવકે બાઈકના આગળના ભાગે પોતાની મંગેતરને બેસાડીને બાઈક ચલાવ્યુ હતું. ત્યારે વડોદરા પોલીસે આ બાબતની ગંભીરતાથી નોંધ લઈને એક્શન લીધું છે. પોલીસે કલ્પેશ દરબાર નામના યુવક પર કલમ 279 અને એમ વી એક્ટ મુજબ ગુનો નોંધી તપાસ હાથ ધરી છે. 

પ્રાપ્ત માહિતી અનુસાર, યુવતીને બાઇક પર આગળ બેસાડી જોખમી રીતે બાઇક હંકારતા યુવકનો એક વીડિયો વાયરલ થયો હતો. વડોદરાના વીઆઇપી રોડ પર એક યુવક યુવતીને આગળ બેસાડીને બાઈક ચલાવી રહ્યો હતો. જોખમી રીતે યુવતીને બેસાડી બાઇક ચલાવવામાં આવતી હોવાનો વીડિયો અન્ય વાહન ચાલકે શૂટ કર્યો હતો. બાઇક ચાલક યુવક એ રીતે બાઇક ચલાવતો હતો કે, જો જરા પણ ચૂક થાય તો અકસ્માત સર્જાઈ શકતો હતો.

આ વીડિયો ઝડપભેર સોશિયલ મીડિયા પર વાયરલ થયો હતો. ત્યારે ન્યુ વીઆઇપી રોડ પર બાઈક પર સ્ટંટ કરવાનો મામલે વડોદરા પોલીસ તપાસ શરૂ કરી હતી. યુવતીને બાઈકની ટાંકી પર બેસાડી જીવ જોખમમાં મૂકાયા તે રીતે બાઈક ચલાવ્યું હતું. આ રીતે તે પોતાની અને યુવતી બંનેનો જીવ જોખમમાં મૂકી રહ્યો હતો. વીડિયો વાયરલ થતાં જ હરણી પોલીસે કાર્યવાહી કરી છે. બાઈકના નંબરના આધારે પોલીસે ચાલકની ઓળખ કરી હતી.