વાહન ચાલકોને દઝાડી રહ્યો છે નવો CNG ગેસનો ભાવ; વડોદરામાં કંપનીએ કર્યો તોતિંગ વધારો, હવેથી ગેસ પુરાવવું મોંઘું પડશે

રવિ અગ્રવાલ/વડોદરા: દેશમાં મોંઘવારી લોકોની કમર તોડી રહી છે. દરરોજ પેટ્રોલ અને ડીઝલના ભાવમાં સતત વધારો ઝીંકવામાં આવી રહ્યો છે. ત્યારે આજે એકવાર ફરીથી ભાવ વધ્યા છે. દેશભરમાં શનિવારથી પેટ્રોલ અને ડીઝલના ભાવમાં વધારો થયો છે. ગુજરાતની વાત કરીએ તો પેટ્રોલમાં 79 પૈસા અને ડીઝલમાં 83 પેસાનો વધારો કરાયો છે. બીજી બાજુ વડોદરા ગેસ લિમિટેડે CNG ગેસના ભાવમાં વધારો કર્યો હોવાના સમાચાર મળી રહ્યા છે. CNG ગેસમાં 7.75 રૂપિયાનો તોતિંગ વધારો ઝીંકવામાં આવ્યો છે.

શહેરમાં વડોદરા ગેસ લિમિટેડના CNGના પ્રતિકિલોના 77 રૂપિયા ભાવ પહોંચી ગયા છે. શુક્રવાર મધરાથી આ નવો ભાવ વધારાને અમલમાં મૂકાયો છે. જેના કારણે શહેરના 13 હજાર ગ્રાહકો પર વર્ષે 22.32 કરોડનો બોજ વધશે. હવેથી VGLના પંપ પરથી ગેસ પુરાવવું મોંઘું પડશે. 

વડોદરા ગેસ લિમિટેડના CNGનો હાલનો ભાવ 66.25 રૂપિયા હતો. પરંતુ તેમાં 7.75નો વધારો કરવામાં આવતા હવેથી CNGના પ્રતિકિલોનો નવો ભાવ 77 રૂપિયા પહોંચી ગયો છે. આમ આ વધારાથી વાહન ચાલકો સાથે પ્રતિ વર્ષ આશરે 22.32 કરોડનો બોજો પડશે. બીજી બાજુ જાણવા મળી રહ્યું છે કે મોંઘવારીનો માર સહન કરી રહેલા જનતાને સીએનજી બાદ પીએનજીના ભાવ વધારાનો સામનો કરવા માટે પણ તૈયાર રહેવું પડશે.

નોંધનીય છે કે, એક અંદાજ પ્રમાણે, વડોદરામાં સીએનજીનો રોજનો વપરાશ 80 હજાર કિલો છે અને વડોદરા તથા આસપાસના વિસ્તારમાં વીજીએલના 26 પંપ છે. સીએનજી બાદ પાઇપલાઇન ગેસના ભાવમાં પણ વધારો તોળાઇ રહ્યો છે. જેમાં હજી એઠવાડિયા પહેલા જ ભાવ વધારો કર્યો છે.