ફ્રાન્સમાં રાફેલ વિમાનના કામની દેખરેખ કરી રહેલી IAFની ઓફિસમાં ઘૂસણખોરીની કોશિશ

નવી દિલ્હી: ફ્રાન્સની રાજધાની પેરિસ સ્થિત ભારતીય વાયુસેનાની ઓફિસ પર ગત રવિવારે કેટલાક અજાણ્યા લોકોએ ઘૂસણખોરીની કોશિશ કરી. આ ઓફિસ ભારત માટે 36 રાફેલ ફાઈટર વિમાનોના ઉત્પાદનની નિગરાણી કરી રહી છે. સૈન્ય સૂત્રોના જણાવ્યાં મુજબ આ જાસૂસીનો મામલો હોઈ શકે છે. 

કેટલાક અજાણ્યા લોકો પેરિસના પરા વિસ્તારમાં ભારતીય વાયુસેનાની રાફેલ પ્રોજેક્ટ મેનેજમેન્ટની ટીમની ઓફિસમાં ગેરકાયદેસર રીતે પ્રવેશ્યા. સ્થાનિક પોલીસ એ વાતની તપાસ કરી રહી છે કે શું વિમાન સંબંધિત ગોપનીય ડેટાને ચોરવા હેતુથી આ ઘૂસણખોરીની કોશિશ કરાઈ હતી.

એક સૂત્રએ જણાવ્યું કે પ્રાથમિક આકલન મુજબ કોઈ ડેટા કે હાર્ડવેરની ચોરી થઈ નથી. સ્થાનિક પોલીસ તપાસ કરી રહી છે. સૂત્રોએ જણાવ્યું કે વાયુસેનાએ આ ઘટના અંગે રક્ષા મંત્રાલયને સૂચના આપી દીધી છે. 

રાફેલ પ્રોજેક્ટ મેનેજમેન્ટની ભારતીય વાયુસેનાની ઓફિસ રાફેલ વિમાન બનાવનારી કંપની દસાલ્ટ એવિએશનના પરિસરમાં આવેલી છે. રક્ષા મંત્રાલય કે ભારતીય વાયુસેના તરફથી આ અંગે કોઈ અધિકૃત પ્રતિક્રિયા આવી નથી. 

જુઓ LIVE TV