કોરોના વાયરસને હરાવનાર પ્રથમ રાજ્ય બન્યું ગોવા, તમામ દર્દીઓ થયા સ્વસ્થ

પણજીઃ કોરોના વાયરસથી એક તરફ જ્યાં દેશ થોભી ગયો છે, તો આ બધા વચ્ચે એક રાહતના સમાચાર આવ્યા છે. રવિવારના દિવસે ભારતનું તટીય રાજ્ય ગોવા નવી સિદ્ધિ લઈને આવ્યું છે. અહીં કોરોના વાયરસના તમામ દર્દીઓ સ્વસ્થ થઈ ગયા છે. રાજ્યમાં કોરોનાના કુલ સાત મામલા સામે આવ્યા હતા, જેમાં છ પહેલા જ સ્વસ્થ થઈ ગયા હતા. આખરી દર્દીનો કોરોના રિપોર્ટ રવિવારે નેગેટિવ આવ્યો ત્યારબાદ તેને પણ રજા આપી દેવામાં આવી છે. 

દેશના પ્રથમ ગ્રીન ઝોન રાજ્ય બનવાનો માર્ગ મોકળો
તેવામાં હવે ગોવાનું દેશનું પ્રથમ ગ્રીન ઝોન રાજ્ય બનવાનો માર્ગ મોકળો બની ગયો છે. આ પહેલા ભાજપના વરિષ્ઠ નેતા બીએલ સંતોષે પણ ટ્વીટ કર્યું હતું કે, જો બધુ સરકારની યોજના અનુસાર રહ્યું તો ગોવા 20 એપ્રિલ સુધી ગ્રીન ઝોનમાં સામેલ થનાર દેશનું પ્રથમ રાજ્ય બની શકે છે. કેન્દ્રીય સ્વાસ્થ્ય મંત્રાલયે રાજ્યના દક્ષિણ ગગોવા જિલ્લાને પહેલા જ ગ્રીન ઝોન જાહેર કરી દીધો છે. જે ક્ષેત્રમાં કોવિડ-19ના મામલા આવતા નથી તેને ગ્રીન ઝોન જાહેર કરવામાં આવે છે અને બંધમાં છૂટ આપી શકાય છે.