અબજ પ્રેમની ગજબ કહાની! યુવકને થયો ઓનલાઈન પ્રેમ, લગ્નના દિવસે યુવતી એવું કર્યું કે...

Dulha-Dulhan Wedding Fraud: પંજાબના મોગાથી છેતરપિંડીનો એક ચોંકાવનારો કિસ્સો સામે આવ્યો છે. મોગામાં એક યુવક સોશિયલ મીડિયાના માધ્યમથી યુવતીના સંપર્કમાં આવ્યો અને મામલો લગ્ન સુધી પહોંચ્યો. બન્નેએ તેમની સંમતિથી લગ્ન કરવાનું નક્કી કર્યું. લગ્નના દિવસે વરરાજો જાન લઈને પહોંચ્યો હતો પરંતુ ન તો છોકરી અને ન તો છોકરીનો પરિવાર આવ્યો હતો. યુવકનો પક્ષ આખો દિવસ યુવતીના પક્ષની રાહ જોતો રહ્યો અને પછી પોલીસ સ્ટેશન પહોંચવું પડ્યું.

આ મામલો પંજાબના જલંધર જિલ્લાના નકોદર તાલુકાના મડિઆલા ગામનો છે. દુબઈમાં નોકરી કરતા દીપક કુમારની સોશિયલ મીડિયા પર એક યુવતી મનપ્રીત કૌર સાથે મિત્રતા થઈ હતી. દીપક અને મનપ્રીત ક્યારેય એકબીજાને મળ્યા ન હતા, બન્નેએ ક્યારેય એકબીજાને જોયા ન હતા, તેમ છતાં બન્નેએ લગ્ન કરવાનો નિર્ણય લીધો હતો.

12 વાગ્યે પહોંચી ગયો વરરાજો પણ...
શુક્રવારે મોગાના રોઝ ગાર્ડન પેલેસમાં બન્ને લગ્ન થવાના હતા. વરરાજો દીપક જાન લઈને લગભગ 12 વાગ્યે મોગા પહોંચ્યો હતો. મોગા પહોંચતા જ તેને ખબર પડી કે જે મહેલનું નામ લેવામાં આવ્યું છે તે ત્યાં અસ્તિત્વમાં નથી. જ્યારે દીપકે યુવતીને ફોન કર્યો તો તેણે જવાબ આપ્યો કે તમે રાહ જુઓ, અમે તમને લેવા માટે આવી રહ્યા છીએ અને પછી કોલ ડિસ્કનેક્ટ કરી દીધો. આ પછી યુવક પક્ષના લોકો કલાકો સુધી રાહ જોતા રહ્યા. સાંજે 6 વાગ્યા સુધી તેમની પાસે કોઈ પહોંચ્યું ન હતું. જેથી આખરે દીપક અને તેના પરિવારે પોલીસ સ્ટેશનમાં ફરિયાદ નોંધાવી હતી.

દુબઈમાં નોકરી કરે છે યુવક
દીપકે મીડિયા સાથે વાત કરતાં જણાવ્યું કે, હું તહસીલ નાકોદરના ગામ મડિઆલા મહતપુરનો રહેવાસી છું અને દુબઈમાં નોકરી કરું છું. મારી સોશિયલ મીડિયા પર મનપ્રીત કૌર સાથે વાતચીત શરૂ થઈ હતી. લગ્ન કરવાનો નિર્ણય પણ અમે એકબીજાને મળ્યા વિના કર્યો હતો. યુવતીએ મારી પાસે ખર્ચ માટે 50-60 હજાર રૂપિયા પણ મગાવ્યા હતા અને આજે લગ્નનો દિવસ હતો અને અમે જાન લઈને મોગા પહોંચ્યા હતા, પરંતુ કોઈ આવ્યું ન હતું. અમે લાંબા સમય સુધી છોકરીના આવવાની રાહ જોઈ, પરંતુ કોઈ જવાબ ન મળ્યો.

6 ડિસેમ્બરે થવાના હતા લગ્ન 
દીપકના પિતા પ્રેમ ચંદે કહ્યું કે, અમે ક્યારેય યુવતીના પરિવાર સાથે વ્યક્તિગત રીતે વાત કરી નથી, પરંતુ યુવતીએ પોતે જ અમને લગ્ન વિશે જણાવ્યું હતું. આ પહેલા 2 ડિસેમ્બરના રોજ લગ્ન થવાના હતા, પરંતુ યુવતીએ કહ્યું કે, તેના પિતાની તબિયત સારી નથી તેથી લગ્ન 6 ડિસેમ્બરે કરીશું. અમને છેતરવામાં આવ્યા છે. અમારા લગ્નની જાન આખો દિવસ યુવતીની રાહ જોતી રહી. અમને ન્યાય જોઈએ છે. અમે ઘણો ખર્ચો કર્યો છે અને દેવું પણ કર્યું છે.

પોલીસ અધિકારી હરજિન્દર સિંહે કહ્યું કે, અમને યુવક અને તેના પરિવાર તરફથી ફરિયાદ મળી છે. હાલમાં અમારી પાસે માત્ર યુવતીનો ફોન નંબર છે. અમે તેને શોધીશું અને જોઈશું કે આની પાછળ કોણ છે. પોલીસે આ મામલે તપાસ શરૂ કરી છે, જલ્દી જ કાર્યવાહી કરવામાં આવશે.