મહારાષ્ટ્રમાં વિમાન સેવા શરૂ કરવા અંગે સસ્પેન્સ યથાવત, ઉદ્ધવ સરકારની આનાકાની

મુંબઈ: આવતી કાલે 25મી મેથી શરૂ થતી વિમાન સેવા પર મહારાષ્ટ્ર સરકારનું સસ્પેન્સ યથાવત છે. મહારાષ્ટ્રના ગૃહમંત્રી અનિલ દેશમુખે ટ્વીટ કરીને કહ્યું છે કે ગ્રીન ઝોનથી સ્વસ્થ મુસાફરોને રેડ ઝોનમાં લાવીને તેમને જોખમમાં શા માટે મૂકવા. તેમણે કહ્યું કે કોઈ પોઝિટિવ મુસાફરને રેડ ઝોનમાં લાવીને ત્યાંના જોખમને વધારવું ખોટું છે. આ સાથે જ વ્યસ્ત એરપોર્ટને કોરોના મહામારીમાં સાવધાનીઓ સાથે ચલાવવામાં વધુ લોકોની જરૂર પડશે. જેના કારણે આપોઆપ જોખમ પણ વધશે. 

મહારાષ્ટ્રના ગૃહમંત્રીએ કહ્યું કે રેડ ઝોનના એરપોર્ટને આ સ્થિતિમાં ખોલવા જોખમી સાબિત થશે. તેમણે કહ્યું કે મુસાફરોનું ફક્ત થર્મલ સ્ક્રિનિંગ જ સુરક્ષા કારણોસર પૂરતું નથી. આ સાથે જ રિક્ષા, ટેક્સી, બસોને પણ મોટી સંખ્યામાં દોડાવવા અશક્ય છે. આ સાથે જ કોઈ પોઝિટિવ મુસાફરને રેડ ઝોનમાં લાવીને ત્યાં જોખમ વધારવું ખોટું છે.