મમતા અને ડોક્ટરોનો વિવાદ વધ્યોઃ સમગ્ર દેશના જુનિયર ડોક્ટર આજે હડતાળ પર

નવી દિલ્હીઃ પશ્ચિમ બંગાળમાં મમતા બેનરજી અને ડોક્ટરો વચ્ચે શરૂ થયેલો વિવાદ હવે દેશમાં આગળ વધ્યો છે. દિલ્હીના મોટાભાગના ખાનગી અને સરકારી ડોક્ટરોએ આજે પશ્ચિમ બંગાળમાં પ્રદર્શન કરી રહેલા પોતાના સાથીદારોના સમર્થનમાં હડતાળ પર ઉતરવાની જાહેરાત કરી છે. દિલ્હીની સફદરજંગ હોસ્પિટલના રેસિડન્ટ ડોક્ટર્સ પણ આજે હડતાળ પર ઉતરવાના છે. 

પશ્ચિમ બંગાળમાં આજે લગભગ 10 હજાર ડોક્ટર હડતાળ પર છે. મહારાષ્ટ્રના રેસિડન્ટ ડોક્ટર્સ પણ સાંજે 5.00 કલાકે સાંકેતિક હડતાળ પર રહેશે. આ ઉપરાંત દેશના મોટાભાગના શહેરોમાં પણ ડોક્ટરો પશ્ચિમ બંગાળના ડોક્ટરોના સમર્થનમાં હડતાળ પર ઉતરવાના છે. 

ડોક્ટરોની હડતાળની ગુંજ દિલ્હી સુધી પહોંચી છે. કેન્દ્રીય મંત્રી હર્ષવર્ધને ગુરૂવારે દર્દીઓ અને તેમના સગાઓને સંયમ રાખવા અનુરોધ કર્યો છે. તેમણે જણાવ્યું કે, તમામ રાજ્યો અને કેન્દ્રશાસિત પ્રદેશોના મુખ્યમંત્રીઓ સમક્ષ તેઓ ડોક્ટરોની સુરક્ષાનો મુદ્દો ઉઠાવશે. 

રાષ્ટ્રીય રાજધાનીમાં અનેક ખાનગી અને સરકારી હોસ્પિટલોના ડોક્ટરોએ શુક્રવારે કામનો બહિષ્કારની જાહેરાત કરી છે. જેનાથી સેવાઓ પ્રભાવિત થવાની આશંકા છે. રાષ્ટ્રીય રાજધાની દિલ્હીની એઈમ્સના રેસિડન્ટ ડોક્ટરોએ પણ ગુરુવારે સાંકેતિક પ્રદર્શન કરીને પોતાના માથા પર કાળી પટ્ટી બાંધીને કામ કર્યું હતું. 

પશ્ચિમ બંગાળમાં હડતાળ પર ઉતરેલા જુનિયર ડોક્ટરોએ બપોરે 2.00 કલાક સુધી કામ પર પાછા ફરવાનો મુખ્યમંત્રી મમતા બેનરજીનો આદેશ માન્યો ન હતો અને જણાવ્યું કે, સરકારી હોસ્પિટલોમાં સુરક્ષા સંબંધિત માગણી પુરી નહીં થાય ત્યાં સુધી તેઓ હડતાળ પર રહેશે. મુખ્યમંત્રીએ પ્રદર્શનકારીઓને ધમકાવતા જણાવ્યું કે, વિરોધ પક્ષ ભાજપ અને માર્ક્સવાદી પાર્ટીએ તેમને ભડકાવ્યા છે અને સમગ્ર ઘટનાને સાંપ્રદાયિક રંગ આપવાનો પ્રયાસ કર્યો છે.