દિલ્હી: દારૂ પર 70% ટેક્સ, છતાં લાંબી લાઈનો, કહ્યું-` વાંધો નહીં, સરકારને અમારા તરફથી દાન`

નવી દિલ્હી: દિલ્હીમાં દારૂની દુકાન પર આજે અજબગજબનો નજારો જોવા મળ્યો. એક દુકાન પર વ્યક્તિએ દારૂ પર 70 ટકા ટેક્સ લગાવવાના નિર્ણયને યોગ્ય ગણાવ્યો. તેણે કહ્યું કે તેમના તરફથી સરકારને દાન છે. બીજી દુકાન પર એક વ્યક્તિ દારૂની લાઈનમાં ઊભા રહેલા લોકો પર ફૂલ વરસાવતો જોવા મળ્યો. વ્યક્તિએ કહ્યું કે તમે લોકો આ દેશની અર્થવ્યવસ્થા મજબુત કરી રહ્યાં છો. 

આ દેશ માટે ડોનેશન
દિલ્હીમાં દારૂની દુકાને પહોંચેલા એક વ્યક્તિએ કહ્યું કે દારૂ પર 70 ટકા ટેક્સથી અમને કોઈ સમસ્યા નથી, આ દેશ માટે અમારા તરફથી ડોનેશન જેવું છે. દારૂની દુકાનો પર સોશિયલ ડિસ્ટન્સિંગની જે રીતે ઠેકડી ઉડી રહી છે તેના માટે ભલે દારૂડિયાઓને જવાબદાર ઠેરવવામાં આવે પણ આ વ્યક્તિએ તો તે માટે પણ સરકાર, પોલીસ અને દુકાનદારોને જવાબદાર ઠેરવી દીધા. વ્યક્તિએ કહ્યું કે દારૂની દુકાનો પર સોશિયલ ડિસ્ટન્સિંગનું પાલન થાય તે જોવાનું કામ પ્રશાસનનું છે.