Corona પર 20 જુલાઈએ પ્રેઝન્ટેશન આપી શકે છે PM મોદી, સામેલ થશે બંને ગૃહના નેતા

નવી દિલ્હીઃ પ્રધાનમંત્રી નરેન્દ્ર મોદી 20 જુલાઈએ સંસદના બંને ગૃહના બધા પક્ષોના નેતાઓને દેશમાં કોવિડ-19ની સ્થિતિ પર એક પ્રેઝન્ટેશન આપી શકે છે. ન્યૂઝ એજન્સી એએનઆઈએ સૂત્રોના હવાલાથી કહ્યું કે બધા દળોના નેતાઓ સાથે ચર્ચા બાદ પ્રેઝન્ટેશનનો સમય નક્કી કરવામાં આવશે. તો સંસદના ચોમાસુ સત્ર પહેલા રવિવારે સર્વદળીય બેઠક બોલાવવામાં આવી હતી. બેઠકમાં સંસદીય કાર્યમંત્રી પ્રહ્લાદ જોશીએ જાહેરાત કરી કે પીએમ મોદી બંને ગૃહના સભ્યોને 20 જુલાઈએ સંબોધિત કરશે અને મહામારી પર વાત કરશે. 

આ પહેલા સંસદ પરિસરમાં પીએમ મોદીની અધ્યક્ષતામાં સર્વદળીય બેઠકનું આયોજન થયું હતું. આ બેઠકમાં પીએમ મોદીએ સંસદના કામકાજના સુચારૂ સંચાલન અને યોગ્ય કાયદાને પાસ કરાવવા માટે બધા વિપક્ષી દળોનો સહયોગ માંગ્યો છે. સંસદીય કાર્ય મંત્રી પ્રહ્લાદ જોશીએ જણાવ્યુ કે આ સત્ર દરમિયાન સરકાર તરફથી કુલ 31 બિલ પર ચર્ચા કરાવવાની સંભાવના છે. સરકારે 29 બિલ લાવવાનો પ્રસ્તાવ કર્યો છે. તેમાં છ અધ્યાદેશ છે જે બજેટ સત્ર બાદ પાસ કરવામાં આવ્યા હતા, જ્યારે નાણા સંબંધિત બે બિલ છે. 

આ પણ વાંચોઃ પંજાબમાં કોંગ્રેસના નવા 'કેપ્ટન બન્યા નવજોત સિંહ સિદ્ધૂ', પ્રદેશ અધ્યક્ષની કમાન મળી

સમાચાર એજન્સી પીટીઆઈ પ્રમાણે સર્વદળીય બેઠકમાં પીએમ મોદીએ કહ્યુ કે સરકાર સંસદમાં વિવિધ મુદ્દા પર સ્વસ્થ અને સાર્થક ચર્ચા માટે તૈયાર છે. પ્રધાનમંત્રીએ કહ્યુ કે બધા મુદ્દા પર લોકતાંત્રિક રીતે ચર્ચા થવી જોઈએ અને બધા પક્ષોએ ગૃહ ચલાવવામાં સહયોગ કરવો જોઈએ. પ્રધાનમંત્રીએ કહ્યુ કે, વિપક્ષના સૂચન મૂલ્યવાન છે કારણ કે તે ચર્ચાને સમૃદ્ધ બનાવે છે. આ બેઠકમાં રાજ્યસભામાં નેતા વિપક્ષ મલ્લિકાર્જુન ખડગે અને લોકસભામાં નેતા વિપક્ષ અધીર રંજન ચૌધરી હાજર રહ્યા હતા. 

આ પણ વાંચોઃ સોમવારથી સંસદનું ચોમાસુ સત્ર, 31 બિલ પર થશે ચર્ચા, લોકસભા અધ્યક્ષે યોજી સર્વદળીય બેઠક  

પ્રધાનમંત્રી નરેન્દ્ર મોદીએ એનડીએના નેતાઓ સાથે પણ બેઠક યોજી હતી. બેઠકમાં રક્ષામંત્રી રાજનાથ સિંહ, ગૃહમંત્રી અમિત શાહ અને ભાજપના અધ્યક્ષ જેપી નડ્ડા હાજર રહ્યા હતા. એનડીએના નેતાઓમાં અપનાદળ તરફથી અનુપ્રિયા પટેલ, જેડીયૂ તરફથી રામ નાથ ઠાકુર, અન્નાદ્રમુક તરફથી એ નવનીતકૃષ્ણન, આરપીઆઈ તરફથી રામદાસ અઠાવલે, લોજપા તરફથી પશુપતિ પારસ હાજર રહ્યા હતા. એનડીએ નેતાઓની બેઠક ગૃહની રણનીતિને અંતિમ રૂપ આપવા માટે બોલાવવામાં આવી હતી.