મધ્ય પ્રદેશમાં રસપ્રદ છે પેટાચૂંટણીનો જંગ, BJP ને સત્તા જાળવી રાખવા માટે જોઈએ આટલી બેઠકો

નવી દિલ્હી: આજે બિહાર વિધાનસભા ચૂંટણીના બીજા તબક્કાનું મતદાન ચાલુ છે. આ સાથે જ 10 રાજ્યોની 54 બેઠકો પર પેટાચૂંટણી અંતર્ગત આજે મતદાન ચાલુ છે. આ 54 બેઠકોમાં 28 બેઠકો મધ્ય પ્રદેશની, 8 ગુજરાતની, યુપીની 7, ઓડિશા, નાગાલેન્ડ, કર્ણાટક, ઝારખંડની 2-2, જ્યારે છત્તીસગઢ, તેલંગણા અને હરિયાણાની 1-1 બેઠક પર મતદાન થઈ રહ્યું છે. મધ્ય પ્રદેશની પેટાચૂંટણીનો મુકાબલો એકદમ રસપ્રદ છે. 28 બેઠકોની પેટાચૂંટણી ભાજપ અને કોંગ્રેસ માટે લિટમસ ટેસ્ટ કહી શકાય. જે સાબિત કરશે કે પ્રદેશના નેતૃત્વની ડોર કોના હાથમાં છે. 

રસપ્રદ ચૂંટણી
મધ્ય પ્રદેશની પેટાચૂંટણી આંકડાની રીતે રસપ્રદ છે. હકીકતમાં ભાજપે તો આ 28 બેઠકમાંથી સત્તા હાંસલ કરવા માટે માત્ર 8 બેઠકો મેળવવી જ જરૂરી છે. પરંતુ કોંગ્રેસે તો તમામ 28 બેઠકો જીતવી જરૂરી છે. કારણ કે 115ના જાદુઈ આંકડા સુધી તેને આ 28 બેઠકો જ પહોંચાડી શકે છે. ત્યારબાદ એ પણ ફરીથી નક્કી થશે કે શિવરાજ સિંહ ચૌહાણ કમળ ખીલેલું બચાવી શકશે કે પછી કમલનાથ પંજાનો કમાલ બતાવશે. હાલની સ્થિતિની વાત કરીએ તો ભાજપ પાસે 107 બેઠકો છે. જ્યારે કોંગ્રેસ પાસે 87 બેઠકો છે. એટલે કે બહુમત કોઈની પાસે નથી. એટલે જ આ વાત પેટાચૂંટણીને રસપ્રદ બનાવે છે. 

આ પેટાચૂંટણી શિવરાજ સિંહ ચૌહાણ અને કમલનાથની સાથે સાથે જ્યોતિરાદિત્ય સિંધિયા, દિગ્વિજય સિંહ અને નરેન્દ્ર સિંહ તોમર સહિત રાજ્યના અનેક દિગ્ગજ નેતાઓ માટે મહત્વપૂર્ણ છે. જોવાનું એ રહેશે કે 115 સીટોના જાદુઈ આંકડાવાળી પોટલી કોને મળે છે.