કેનેડા જઈને આવું પણ થાય છે, 500 વિદ્યાર્થીઓનું ભવિષ્ય લટકી ગયું, હવે ના ઘરના ના ઘાટના

Canada study Visa : કેનેડાના ઓન્ટારિયો પ્રાંતની નોર્ધન કોલેજે શાળા શરૂ થવાના એક મહિના પહેલાં છાત્રોના પ્રવેશ રદ કર્યા પછી ભારતીયો સહિત ઓછામાં ઓછા 500 વિદ્યાર્થીઓનું ભાવિ અટવાઈ ગયું છે. એક મીડિયા રિપોર્ટ અનુસાર, કેટલાક વિદ્યાર્થીઓ કેનેડામાં હતા તે પહેલાં જ તેમને એડમિશન રદ કરવાની જાણ કરવામાં આવી હતી. લગભગ 500 આંતરરાષ્ટ્રીય વિદ્યાર્થીઓને ઑન્ટારિયોની નોર્ધન કૉલેજ દ્વારા એક ઈમેલ મોકલવામાં આવ્યો હતો જેમાં સૂચના આપવામાં આવી હતી કે આ આગામી શાળા વર્ષ માટે તેમની પ્રવેશની ઓફર રદ કરવામાં આવી છે.

નોર્ધન કોલેજનું કહેવું છે કે આ સમસ્યા કેનેડા દ્વારા અપેક્ષા કરતા વધુ આંતરરાષ્ટ્રીય વિદ્યાર્થીઓ માટે વિઝા મંજૂર કરવાથી ઉદ્ભવી છે. આ અંગે પંજાબની એક વિદ્યાર્થીની એશ્લેએ જણાવ્યું હતું કે તેણે તેની રજિસ્ટ્રેશનની ફી ચૂકવી દીધી છે. પંજાબથી ટોરોન્ટો માટે વન-વે ફ્લાઇટ બુક કરાવી હતી. તેણીએ એક અઠવાડિયા પહેલા ખબર પડી છે કે ઓન્ટારિયોમાં ઉત્તરી કોલેજમાં તેણીનું પ્રવેશ હવે રદ કરવામાં આવ્યું છે. આ મારા માટે ખૂબ જ હૃદયદ્રાવક છે, આ મારા માટે ઝટકો આપવા સમાન છે. 

એશ્લેને ફેબ્રુઆરીમાં સ્કારબરોમાં પ્યોર્સ કોલેજ ઓફ ટેક્નોલોજી તરફથી એક સ્વીકૃતિ પત્ર મળ્યો, જે ઉત્તરી કોલેજની સંલગ્ન સંસ્થા છે. ત્યારબાદ તેણે સ્ટુડન્ટ વિઝા માટે અરજી કરી અને હેલ્થકેરમાં નોકરી છોડી દીધી. આ સિવાય તેણે ટોરન્ટોની ટિકિટ પણ બુક કરાવી હતી.

આ અંગે કેનેડાની પ્યોર્સ કોલેજે કહ્યું કે, તે તમામ આંતરરાષ્ટ્રીય વિદ્યાર્થીઓને સ્વીકારવા તૈયાર છે જેમને પ્રવેશના પત્રો મળ્યા છે, પરંતુ તેની સંલગ્ન નોર્ધન કોલેજે આમ કરવાનો ઇનકાર કર્યો છે. તેની પાસે પ્રવેશ પ્રક્રિયા અંગે અંતિમ નિર્ણય લેવાની સત્તા નથી.

દરમિયાન, ઈન્ટરનેશનલ શીખ સ્ટુડન્ટ એસોસિએશનના પ્રમુખ અને વર્લ્ડ શીખ ઓર્ગેનાઈઝેશનના સભ્ય જસપ્રીત સિંહનું કહેવું છે કે આ સ્થિતિઓ મોટી સમસ્યાનો સંકેત આપે છે. આ પ્રકારની સિસ્ટમ વિદ્યાર્થીઓનું શોષણ કરી રહી છે. તેમણે કહ્યું કે કેનેડામાં આવી પરિસ્થિતિઓ અસામાન્ય નથી. આ દર વર્ષે થાય છે... દરેક સેમેસ્ટરમાં આ સમસ્યા થાય છે.

કેનેડિયન કોલેજોએ પ્રવેશ રદ કરી દીધો છે
આ પહેલીવાર નથી જ્યારે ટોરોન્ટોની કોઈ શાળાએ આંતરરાષ્ટ્રીય વિદ્યાર્થીઓને અધવચ્ચે છોડી દીધા હોય. ગયા મે, ઑન્ટારિયોની સેન્ટ લોરેન્સ કૉલેજ સાથે સંલગ્ન આલ્ફા કૉલેજ ઑફ બિઝનેસ એન્ડ ટેક્નૉલૉજીએ સેંકડો વિદ્યાર્થીઓના પ્રવેશને સ્થગિત કર્યા હતા.