LPG સિલિન્ડરથી લઈને પેન્શન સુધી... 1 જાન્યુઆરીથી થશે આ 6 મોટા ફેરફાર, સીધી તમારા ખિસ્સા થશે અસર
નવા વર્ષમાં કાર ખરીદવી મોંઘી થઈ જશે. 1 જાન્યુઆરી 2025થી મારુતિ સુઝુકી, હ્યુન્ડાઈ, મહિન્દ્રા, હોન્ડા, મર્સિડીઝ-બેન્ઝ, ઓડી અને BMW જેવી મોટી ઓટોમોબાઈલ કંપનીઓ વાહનોના ભાવમાં 3% વધારો કરશે. કંપનીઓએ તેનું કારણ ઉત્પાદન ખર્ચમાં વધારો દર્શાવ્યો છે. તેથી જો તમે કાર ખરીદવાનું વિચારી રહ્યા છો, તો તમારે વધુ ખર્ચ કરવો પડી શકે છે.
દર મહિનાની પહેલી તારીખે ઓઈલ માર્કેટિંગ કંપનીઓ LPGના ભાવની સમીક્ષા કરે છે. જો કે, છેલ્લા કેટલાક મહિનાઓથી ઘરેલુ LPG સિલિન્ડર (14.2 કિગ્રા)ની કિંમતમાં કોઈ ફેરફાર થયો નથી. હાલમાં દિલ્હીમાં ઘરેલુ LPG સિલિન્ડરનો ભાવ 803 રૂપિયા છે. જ્યારે કોમર્શિયલ સિલિન્ડરના ભાવમાં સતત વધારો જોવા મળી રહ્યો છે. આંતરરાષ્ટ્રીય બજારમાં કાચા તેલની કિંમત 73.58 ડોલર પ્રતિ બેરલ છે, જેના કારણે ભવિષ્યમાં ભાવમાં ફેરફાર થઈ શકે છે.
પેન્શન ધારકો માટે નવું વર્ષ રાહત લઈને આવી રહ્યું છે. 1 જાન્યુઆરી 2025થી કર્મચારી ભવિષ્ય નિધિ સંગઠન (EPFO)એ પેન્શન ઉપાડવાના નિયમોને સરળ બનાવ્યા છે. હવે પેન્શન ધારકો દેશની કોઈપણ બેન્કમાંથી તેમનું પેન્શન ઉપાડી શકશે. આ માટે તેમને કોઈ વધારાની ચકાસણીની જરૂર રહેશે નહીં. આ સુવિધા પેન્શન ધારકો માટે મોટી રાહત છે.
એમેઝોન પ્રાઇમ મેમ્બરશિપના નિયમોમાં ફેરફારની જાહેરાત કરવામાં આવી છે, જે 1 જાન્યુઆરી 2025થી લાગુ થશે. નવા નિયમો હેઠળ એક પ્રાઇમ એકાઉન્ટમાંથી માત્ર બે ટીવી પર જ પ્રાઇમ વીડિયો સ્ટ્રીમ કરી શકાશે. જો કોઈ ત્રીજા ટીવી પર પ્રાઇમ વીડિયો જોવા માંગે છે, તો તેમણે વધારાનું સબસ્ક્રિપ્શન લેવું પડશે. આ પહેલા પ્રાઇમ મેમ્બર્સ એક એકાઉન્ટમાંથી પાંચ જેટલા ડિવાઇસમાંથી વીડિયો સ્ટ્રીમ કરી શકતા હતા.
RBIએ NBFC અને HFCs માટે ફિક્સ્ડ ડિપોઝિટ સંબંધિત નિયમોમાં ફેરફાર કર્યો છે. નવા નિયમો 1 જાન્યુઆરી 2025થી લાગુ કરવામાં આવશે. આ ફેરફારો હેઠળ ડિપોઝિટની સુરક્ષા સુનિશ્ચિત કરવા માટે કેટલીક જરૂરી જોગવાઈઓ કરવામાં આવી છે. આમાં લોકો પાસેથી ડિપોઝિટ લેવા, લિક્વિડ એસેટ્સનો એક ભાગ સુરક્ષિત રાખવા અને ડિપોઝિટનો વીમો લેવા જેવા ફેરફારોનો સમાવેશ થાય છે.
ફીચર ફોન યુઝર્સ માટે રિઝર્વ બેન્ક ઓફ ઈન્ડિયા (RBI) દ્વારા શરૂ કરવામાં આવેલી UPI 123Pay સેવામાં ટ્રાન્ઝેક્શન મર્યાદા વધારવામાં આવી છે. અગાઉ આ સેવા હેઠળ મહત્તમ 5,000 રૂપિયા સુધીનું ટ્રાન્ઝેક્શન થઈ શકતું હતું, પરંતુ હવે આ મર્યાદા વધારીને 10,000 રૂપિયા કરવામાં આવી છે. આ સુવિધા 1 જાન્યુઆરી 2025થી લાગુ થશે.