સુરતમાં ભૂતનો અડ્ડો ગણાય છે આ એપાર્ટમેન્ટ, ડુમસ કરતા પણ ડરામણી છે આ જગ્યા
સુરતમાં એક આખેઆખું એપાર્ટમેન્ટ ભૂતિયા હોવાનું કહેવાય છે. સુરતના પોશ વિસ્તાર પાર્લે પોઈન્ટમાં પથિક એપાર્ટમેન્ટ આવેલું છે. આ પથિક એપાર્ટમેન્ટ હોન્ટેડ સ્થળ હોવાનુ કહેવાય છે. આ ઈમારત 20 થી 25 વર્ષથી વેરાન પડી છે. ત્યાં આસપાસથી પણ પસાર થતા લોકો ડરે છે.
સ્થાનિકોનું કહેવું છે કે, આ બિલ્ડીંગમાં જવા પણ કોઈ તૈયાર થતુ નથી. અનેક લોકોને અહીં ભૂતપ્રેતનો અનુભવ થયો હોવાથી આ ઈમારત કે જગ્યા ખરીદવાની કોઈ હિંમત કરતું નથી.
અનેક વિચિત્ર ઘટનાઓ બનવાને કારણે આ બિલ્ડીંગમાં કોઈ જવા તૈયાર નથી. જેથી શહેરના પોર્શ વિસ્તારમાં હોવા છતાં પણ આ બિલ્ડીંગને ક્યારેય કોઈએ ખરીદ્યું નથી આજે પણ આ બિલ્ડીંગ વેરાન છે. લોકમાન્યતા છે કે, અહીં એકવાર એક સુરક્ષા ગાર્ડનું રહસ્યમય રીતે મૃત્યુ થયું હતું. ત્યારથી આ એપાર્ટમેન્ટને બંધ રાખવામાં આવે છે.
આ ઘટના બાદ બિલ્ડીંગના ઉપરના ભાગના રૂમમાં અચાનક લાઈટ ચાલુ બંધ થવાની ઘટના બનવાની તો કોઈક વાર બાળક અને મહિલાના અજીબ અવાજ આવતા હોવાનું પણ લોકોનું કહેવું છે. આ બધી ઘટનાઓને સત્તાવાર રીતે કોઈ પુરવાર કરી શક્યું નથી. પરંતુ આજે પણ કેટલાક લોકો આ બિલ્ડીંગને ભૂતિયા બિલ્ડીંગ માને છે. થોડા વર્ષો અગાઉ તે ઈમારતમાં કાળા કપડામાં મહિલા જોવા મળતા લોકો આશ્ચર્યચકિત થઈ ગયા હતા. ઉપરના ભાગે બાલ્કનીમાં એક મહિલા બેઠી હતી.
આજે પણ લોકો આ બિલ્ડીંગને કાળી બિલ્ડીંગ તરીકે ઓળખે છે. આજે પણ લોકો રાત્રીના સમય પર ત્યાં જતા ડરે છે. સાંજ પડતાંની સાથે જ ઇમારતની નજીક ચીસો અને બૂમો પાડવાના અવાજો સાંભળવા મળે છે. બૂમો પાડવાનો અવાજ દૂરથી પણ સંભળાય છે. આ ભૂતિયા બિલ્ડીંગની નીચે આજે પણ લોકોની દુકાનો આવેલી છે.