Corona એ લીધો એક યુવા ક્રિકેટરનો જીવ, આ ખેલાડીના નિધનથી ક્રિકેટ જગતમાં શોકનો માહોલ

જયપુરઃ હાલ કોરોના વાયરસની બીજી લહેર ચાલી રહી છે. જેમાં કોરોનાનું સંક્રમણ ખુબ જ ઝડપથી પ્રસરી રહ્યું છે. કોરોનાની આ બીજી લહેર પહેલાં કરતા ખુબ જ ઘાતક અને જીવલેણ સાબિત થઈ રહી છે. કાળમુખો કોરોના એક યુવા ક્રિકેટરને પણ ભરખી ગયો.

રાજસ્થાનના પૂર્વ લેગ સ્પિનર અને રણજી ટ્રોફી જીતનારી ટીમના સભ્ય રહેલાં વિવેક યાદવ (Vivek Yadav) નું આજે કોરોનાને કારણે નિધન થયું છે. 36 વર્ષની નાની ઉંમરમાં કાળમુખો કોરોના આ ખેલાડીના મોતનું કારણ બની ગયો. તેમના પરિવારમાં તેમની પત્ની અને એક બાળકી છે.

વિવેક યાદવનું કોરોનાથી નિધનઃ
વિવેક યાદવે બુધવારે શહેરની હોસ્પિટલમાં અંતિમ શ્વાંસ લીધાં હતાં. ઉલ્લેખનીય છેકે, આની સાથો-સાથ યાદવનો કેન્સરનો પણ ઈલાજ ચાલતો હતો. તેઓ કીમોથેરેપી માટે હોસ્પિટલમાં ગયા હતા, જ્યાં ટેસ્ટ દરમ્યાન ખ્યાલ આવ્યો કે તેઓ કોરોના પોઝિટિવ છે. ત્યાર બાદ વિવેકની હાલત વધારે ખરાબ થવા લાગી. 

વિવેકનું ક્રિકેટ કરિઅરઃ
વિવેક યાદવે 18 ફસ્ટ કલાસ મેંચમાં 57 વિકેટ લીધી હતી. વર્ષ 2010-11માં તેઓ રણજી ટ્રોફીની ફાઈનલમાં પણ રમ્યાં હતાં. જે તેમની ઘરેલું ક્રિકેટ કરિઅરનો સૌથી મહત્ત્વપૂર્ણ મુકાબલો હતો. જેમાં તેમણે ફાઈનલમાં વડોદરા સામે 91 રન આપીને 4 વિકેટ લીધી હતી. યાદવે પોતાની છેલ્લી મેચ 30 વર્ષની ઉંમરમાં રમી હતી.