વિશ્વકપમાંથી બહાર થયા બાદ હવે યૂરો ટી-20 સ્લેમ સાથે જોડાયો સ્ટેન

જોહનિસબર્ગઃ દક્ષિણ આફ્રિકાનો ફાસ્ટ બોલર ડેલ સ્ટેન યૂરો ટી-20 સ્લેમ સાથે જોડાયો છે. ક્રિકઇન્ફો અનુસાર, ટૂર્નામેન્ટની પ્રથમ સિઝન 30 ઓગસ્ટથી શરૂ થશે. આ સ્પર્ધામાં છ ફ્રેન્ચાઇઝી ભાગ લેશે અને આયર્લેન્ડ, નેધરેલન્ડ તથા સ્કોટલેન્ડ તેની સંયુક્ત યજમાની કરશે. ટૂર્નામેન્ટ શરૂ કરવાની જાહેરાતના થોડા સમયમાં છ ક્રિકેટર- શાહીદ આફ્રિદી, ક્રિસ લિન, શેન વોટસન, બાબર આઝમ, બ્રેન્ડન મેક્કુલમ, લ્યૂક રોન્કી તેની સાથે જોડાઈ ગયા છે. 

ઇયોન મોર્ગન, જેપી ડ્યૂમિની, ઇમરાન તાહિર અને રાશિદ ખાન જેવા સ્ટાર ખેલાડી પણ આ ટૂર્નામેન્ટમાં રમશે અને અન્ય મોટા ખેલાડીઓ જોડાઈ તેવી પણ આશા છે. 

સ્ટેન ઈજાને કારણે ઈંગ્લેન્ડ અને વેલ્સમાં ચાલી રહેલા વિશ્વ કપમાંથી બહાર થયો હતો. તેને આ વર્ષે ઈન્ડિયન પ્રીમિયર લીગ દરમિયાન ઈજા થઈ હતી.