Dipendra Singh Airee: 6 બોલમાં 6 સિક્સર... નેપાળના બેટ્સમેને મચાવ્યો આતંક

Dipendra Singh Airee 6 Sixes: નેપાળના બેટ્સમેન દીપેન્દ્ર સિંહ એરીએ શનિવાર (13 એપ્રિલ)ના રોજ વર્લ્ડ ક્રિકેટમાં તહેલકો મચાવ્યો. તેમણે કતર વિરૂદ્ધ એસીસીમાં ટી20 ઇન્ટનેશનલ પ્રીમીયર લીગ કપમાં બેટ વડે આતંક મચાવ્યો. દીપેન્દ્રએ 6 બોલમાં 6 સિક્સર ફટકારવાનો રેકોર્ડ બનાવ્યો. તે ટી20 ઇન્ટરનેશનલમાં આ ઉપલબ્ધિ પ્રાપ્ત કરનાર દુનિયાના ત્રીજા બેટ્સમેન બની ગયા. તે પહેલાં ભારતના યુવરાજ સિંહ અને વેસ્ટઇંડીઝના કીરોન પોલાર્ડ આમ કરી ચૂક્યા છે. 

300 થી વધુની સ્ટ્રાઈક રેટથી બનાવ્યા રન 
આ મેચમાં નેપાળની ટીમે ટોસ જીતીને પ્રથમ બેટિંગ કરવાનો નિર્ણય કર્યો હતો. તેણે 20 ઓવરમાં 7 વિકેટે 210 રન બનાવ્યા હતા. તેના માટે દીપેન્દ્ર સિંહ 21 બોલમાં 64 રન બનાવીને નોટઆઉટ રહ્યો હતો. તેણે પોતાની વિસ્ફોટક ઇનિંગમાં 3 ફોર અને 7 સિક્સર ફટકારી હતી. દીપેન્દ્રએ 304.76ના સ્ટ્રાઈક રેટથી રન બનાવ્યા. તેમના સિવાય વિકેટકીપર બેટ્સમેન આસિફ શેખે 41 બોલમાં 52 રન અને કુશલ મલ્લાએ 18 બોલમાં 35 રન બનાવ્યા હતા.

દીપેન્દ્રએ બનાવ્યો રેકોર્ડ  
ટી20 ઈન્ટરનેશનલમાં સૌથી ઝડપી ફિફ્ટીનો રેકોર્ડ દીપેન્દ્રના નામે છે. તેણે ગયા વર્ષે એશિયન ગેમ્સ દરમિયાન મોંગોલિયા સામે હાંગઝોઉમાં 9 બોલમાં અડધી સદી ફટકારી હતી. દીપેન્દ્ર 300 થી વધુના સ્ટ્રાઈક રેટ સાથે T20 ક્રિકેટમાં બે વખત પચાસ ફટકારનાર પ્રથમ બેટ્સમેન બન્યો. તેણે મંગોલિયા સામે 10 બોલમાં 52* રન બનાવ્યા.