Munaf Patel Appointed Dehi Capitals Bowling Coach: ભૂતપૂર્વ ભારતીય ફાસ્ટ બોલર મુનાફ પટેલને દિલ્હી કેપિટલ્સના બોલિંગ કોચ તરીકે નિયુક્ત કરવામાં આવ્યા છે. તે હવે દિલ્હીના કોચિંગ સ્ટાફમાં મુખ્ય કોચ હેમાંગ બદાણી અને ક્રિકેટ ડિરેક્ટર વેણુગોપાલ રાવને સપોર્ટ કરશે. વર્ષ 2018માં પોતાની ક્રિકેટ કારકિર્દીને અલવિદા કહ્યા બાદ મુનાફ પટેલ પ્રથમ વખત કોચિંગ ક્ષેત્રે પગ મુકવા જઈ રહ્યો છે. મુનાફ પટેલ તેની IPL કારકિર્દીમાં રાજસ્થાન રોયલ્સ, મુંબઈ ઈન્ડિયન્સ અને ગુજરાત લાયન્સ માટે રમ્યો હતો.


COMMERCIAL BREAK
SCROLL TO CONTINUE READING

દિલ્હી કેપિટલ્સે સોશિયલ મીડિયાના માધ્યમથી મુનાફ પટેલની બોલિંગ કોચ તરીકે નિમણૂંકની પુષ્ટિ કરી છે. તે બોલિંગ કોચના રોલમાં ઓસ્ટ્રેલિયન ઓલરાઉન્ડર જેમ્સ હોપ્સની જગ્યા લેશે. મહત્વનું છે કે આઈપીએલ 2025 મેગા ઓક્શન પહેલા દિલ્હી કેપિટલ્સે અક્ષર પટેલ, ટ્રિસ્ટન સ્ટબ્સ, કુલદીપ યાદવ અને અભિષેક પોરેલને રિટેન કર્યાં છે. ટીમ પાસે અત્યારે કોઈ ફાસ્ટ બોલર નથી, તેવામાં હરાજીમાં મુનાફ પટેલ પર જવાબદારી હશે કે તે ટીમ માટે એક મજબૂત બોલિંગ લાઈન-અપ તૈયાર કરે.


આ પણ વાંચોઃ મોહમ્મદ શમીની ટીમમાં વાપસી, વનડે વિશ્વકપ ફાઈનલ બાદ રમશે પ્રથમ મેચ


દિલ્હી કેપિટલ્સમાં થયા ફેરફાર
આઈપીએલ 2024 બાદ રિકી પોન્ટિંગે દિલ્હી કેપિટલ્સના હેડ કોચ પદેથી રાજીનામું આપી દીધું હતું. રિકી પોન્ટિંગની જગ્યાએ પૂર્વ ભારતીય ક્રિકેટર હેમાંગ બદાણી હવે દિલ્હી કેપિટલ્સના હેડ કોચ હશે. બોલિંગ કોચની ભૂમિકામાં મુનાફ પટેલ જોવા મળશે. આ સિવાય આ વખતે ટીમ નવા કેપ્ટન સાથે પણ મેદાનમાં ઉતરી શકે છે. દિલ્હીએ પંતને રિટેન કર્યો નથી. તેવામાં અક્ષર પટેલને પણ કમાન સોંપવામાં આવી શકે છે. 



મુનાફ પટેલના ક્રિકેટ કરિયર પર નજર કરીએ તો આ ગુજરાતી ખેલાડીએ ભારત માટે 13 ટેસ્ટ મેચમાં 35 વિકેટ લીધી. જ્યારે 70 વનડેમાં તેના નામે 86 વિકેટ અને ટી20 મેચમાં 4 વિકેટ છે. મુનાફ પટેલ 2011માં વનડે વિશ્વકપ જીતનારી ભારતીય ટીમનો સભ્ય રહી ચૂક્યો છે. મુનાફ પટેલે 2011ના વિશ્વકપની 8 મેચમાં કુલ 11 વિકેટ લીધી હતી.