IND vs NZ: ભારત અને ન્યુઝીલેન્ડ એવી બે ટીમો છે જેઓ વર્લ્ડકપ 2023માં અત્યાર સુધી એક પણ મેચ હારી નથી. બંને ટીમોએ અત્યાર સુધી રમાયેલી ચારેય મેચ જીતી છે. હવે 22 ઓક્ટોબરે લખનૌના એકાના સ્ટેડિયમમાં આ બંને વચ્ચે ટક્કર થવાની છે. આ મેચમાં એક ટીમની જીતનો સિલસિલો અટકશે તે સ્વાભાવિક છે. પરંતુ જો ભારતીય ટીમે આ મેચ જીતવી હોય તો તેને 20 વર્ષનો ઈતિહાસ બદલવો પડશે.


COMMERCIAL BREAK
SCROLL TO CONTINUE READING

ટોપ-2 ટીમોની વચ્ચે થશે કાંટે કી ટક્કર
રવિવારે નંબર-1 ટીમ ન્યુઝીલેન્ડ અને નંબર-2 ભારત વચ્ચે વર્લ્ડ કપ 2023નો મોટો મુકાબલો થવા જઈ રહ્યો છે. આ ટૂર્નામેન્ટમાં બંને ટીમો અત્યાર સુધી અજેય રહી છે. ભારત અને ન્યુઝીલેન્ડના અત્યાર સુધી રમાયેલી 4-4 મેચમાં 4-4 પોઈન્ટ છે. ફરક માત્ર રન રેટનો છે. સારા રન રેટના કારણે ન્યુઝીલેન્ડ પ્રથમ સ્થાને છે. પરંતુ આ મેચમાં જીત ભારત માટે સરળ નહીં રહે. જો ટીમને જીતવી હશે તો 20 વર્ષનો ઈતિહાસ બદલવો પડશે.


ભારતને બદલવો પડશે ઈતિહાસ
ટીમ ઈન્ડિયાએ વર્લ્ડ કપ 2023ની શરૂઆત ઓસ્ટ્રેલિયા સામે જીત સાથે કરી હતી. આ પછી ટીમે અફઘાનિસ્તાન, પાકિસ્તાન અને પછી બાંગ્લાદેશને હરાવીને વિજય હાંસલ કર્યો હતો. હવે ન્યુઝીલેન્ડનો વારો છે. પરંતુ ભારત માટે તે બિલકુલ સરળ નથી. ભારતીય ટીમ છેલ્લે 2003માં ન્યૂઝીલેન્ડ સામે ODI વર્લ્ડ કપમાં જીત નોંધાવવામાં સફળ રહી હતી. ત્યારથી ટીમ ઈન્ડિયા દરેક વખતે ખાલી હાથ રહી છે.


બેટ્સમેનો પર કહેર બનીને તૂટ્યા હતા ઝહીર ખાન
ટીમ ઈન્ડિયાના પૂર્વ ઘાતક ફાસ્ટ બોલર ઝહીર ખાને 2003ના વર્લ્ડ કપ મેચમાં ન્યૂઝીલેન્ડના બેટ્સમેનોને સખત ક્લાસ લીધો હતો. ઝહીરે 4 કિવી બેટ્સમેનોને પોતાના જાદુઈ બોલથી પોતાનો શિકાર બનાવ્યા હતા. તેણે ક્રેગ મેકમિલન (0), બ્રેન્ડન મેક્કુલમ (4) અને નાથન એસ્ટલી (0) જેવા ઘાતક બેટ્સમેનોને ફસાવીને પેવેલિયનમાં મોકલી દીધા હતા. ઝહીર સિવાય હરભજન સિંહને 2 વિકેટ મળી હતી. જ્યારે જવાગલ શ્રીનાથ, આશિષ નેહરા, વીરેન્દ્ર સેહવાગ અને દિનેશ મોંગિયાએ 1-1 વિકેટ લીધી હતી. આ બધાના કારણે ભારતે ન્યૂઝીલેન્ડને 146 રનમાં ઓલઆઉટ કરી દીધું.


કૈફ-દ્રવિડે બેટથી કર્યો ધમાકો
ન્યૂઝીલેન્ડ દ્વારા આપવામાં આવેલા 147 રનના લક્ષ્યનો પીછો કરતી વખતે ભારતીય ટીમની શરૂઆત સારી રહી ન હતી. ટીમે 21 રનમાં માત્ર 3 વિકેટ ગુમાવી દીધી હતી. સચિન, સેહવાગ અને ગાંગુલી જેવા મેચ વિનર પેવેલિયન પરત ફર્યા હતા. પછી રાહુલ દ્રવિડ (53) અને મોહમ્મદ કૈફ (68)એ ન્યૂઝીલેન્ડના બોલરોને વાપસી કરવાની કોઈ તક આપી ન હતી અને 40.4 ઓવરમાં 150 રન બનાવીને જીત મેળવી હતી. જો ભારતે વર્લ્ડ કપમાં ન્યુઝીલેન્ડને ફરી હરાવવાનું હોય તો આવો ચમત્કાર બતાવવો પડશે.


ભારત-ન્યૂઝીલેન્ડનો હેડ ટુ હેડ રેકોર્ડ
વનડેમાં બંને ટીમોના હેડ ટુ હેડ રેકોર્ડની વાત કરીએ તો અત્યાર સુધી રમાયેલી 116 મેચોમાંથી ટીમ ઈન્ડિયાએ 58 અને ન્યૂઝીલેન્ડે 50 મેચ જીતી છે. 7 મેચ અનિર્ણિત રહી છે જ્યારે 1 મેચ ટાઈ રહી છે. વર્લ્ડ કપમાં બંને ટીમો વચ્ચે 9 મેચ રમાઈ છે, જેમાં ન્યૂઝીલેન્ડે 5 અને ભારતે 3માં જીત મેળવી છે જ્યારે 1 અનિર્ણિત રહી છે.