INDvsNZ: ગણતંત્ર દિવસ પર ટીમ ઈન્ડિયાની ભેટ, કીવીને 7 વિકેટે હરાવ્યું, સિરીઝમાં 2-0થી આગળ

ઓકલેન્ડઃ બોલરોના શાનદાર પ્રદર્શન બાદ કેએલ રાહુલ (57*) અને શ્રેયસ અય્યર (44)ની ધમાકેદાર ઈનિંગની મદદથી ભારતીય ટીમે અહીં રમાયેલી પાંચ મેચોની ટી20 સિરીઝના બીજા મુકાબલામાં ન્યૂઝીલેન્ડને 7 વિકેટે પરાજય આપીને શ્રેણીમાં 2-0ની લીડ મેળવી લીધી છે. ટોસ જીતીને પ્રથમ બેટિંગ કરતા ન્યૂઝીલેન્ડની ટીમે 20 ઓવરમાં 5 વિકેટે 132 રન બનાવ્યા હતા. જેના જવાબમાં ભારતીય ટીમે 17.3 ઓવરમાં 3 વિકેટે 135 રન બનાવી મેચ પોતાના નામે કરી લીધી હતી. ભારતીય ટીમ પ્રથમવાર ન્યૂઝીલેન્ડ સામે સતત બે ટી20 મેચમાં જીત મેળવવામાં સફળ થઈ છે. બંન્ને ટીમો વચ્ચે 29 જાન્યુઆરીએ સિરીઝની ત્રીજી ટી20 મેચ રમાશે. મહત્વનું છે કે પ્રથમ ટી20 મેચમાં ભારતે 6 વિકેટે વિજય મેળવ્યો હતો.

ટીમ ઈન્ડિયાને રોહિત શર્મા અને કેએલ રાહુલની જોડી પાસે સારી શરૂઆતની આશા હતી, પરંતુ રોહિતે નિરાશ કર્યા હતા. રોહિત આ મેચમાં માત્ર 8 રન બનાવી સાઉદીની ઓવરમાં આઉટ થયો હતો. ટેલરે રોહિતનો કેચ ઝડપ્યો હતો. ત્યારબાદ છઠ્ઠી ઓવરમાં ટીમ ઈન્ડિયાના કેપ્ટન વિરાટ કોહલીને ટીમ સાઉદીએ પોતાનો શિકાર બનાવ્યો હતો. સાઉદીના બોલ પર વિરાટ વિકેટકીપરને કેચ આપી બેઠો હતો. વિરાટ કોહલીએ 11 રન બનાવ્યા હતા.