આઇપીએલ 2019: પંજાબે દિલ્હીના હાથમાંથી જીત પડાવી, આ રીતે પલટાઇ મેચ
આઇપીએલ સિઝન 12નો સૌથી રોમાંચક મુકાબલો સોમવારે જોવા મળ્યો. દિલ્હીના હાથમાં આવી રહેલી મેચ પંજાબે જાણે પડાવી લીધી. પંજાબના ખેલાડીઓએ એવું કૌતુક બતાવ્યું કે દિલ્હીએ છેવટે મેચ પંજાબને આપી દેવી પડી.
નવી દિલ્હી : આઇપીએલ સિઝન 12 માં પંજાબ અને દિલ્હી વચ્ચે સોમવારે રમાયેલી મેચ જાણે ઐતિહાસિક બની ગઇ. આ મેચમાં પંજાબના ખેલાડી સૈમ કરેનની હેટ્રીક સૌથી ચર્ચાસ્પદ રહી. સાથોસાથ ઋષભ પંત જે રીતે આઉટ થયો એ પણ ચર્ચામાં રહ્યું. એક સમયે દિલ્હીના હાથમાં જઇ રહેલી મેચ એકાએક જાણે પંજાબના હાથમાં આવી ગઇ. આ સિઝનની આ મેચ સૌથી રોમાંચક અને ઐતિહાસિક બની ગઇ.
પંજાબના મોહાલીમાં આઇપીએલ સિઝન 12ની 13મી મેચમાં પંજાબની ટીમે દિલ્હીને જીત માટે 167 રનનો લક્ષ્યાંક આપ્યો હતો. શરૂઆતથી જ મેચ જાણે દિલ્હી તરફ દેખાતી હતી. છેલ્લે સુધી એવું લાગતું હતું કે દિલ્હી મેચ જીતી જશે. પરંતુ છેલ્લી ત્રણ ઓવરમાં મેચ એ રીતે પલટાઇ કે ક્રિકેટ જગતના પંડિતો પણ મોંમાં આંગળા નાંખી ગયા.
જીત માટે હતું સરળ લક્ષ
પંજાબે દિલ્હીનો જીત માટે આસાન કહી શકાય એવો 167 રનનો લક્ષ્યાંક આપ્યો હતો. જીત માટે મેદાનમાં ઉતરેલી દિલ્હીને ટીમને પહેલા જ બોલમાં ઝટકો લાગ્યો હતો કે જ્યારે અશ્વિને પૃથ્વી શોને વિકેટ પાછળ કે એલ રાહુલના હાથમાં કેચ પકડાવી દીધો હતો. પરંતુ દિલ્હી તરત જ ટ્રેક પર આવી ગયું હતું. શિખર ધવન (25 બોલમાં 30 રન), કેપ્ટન શ્રેયસ અય્યર (22 બોલમાં 28 રન), કોલિન ઇનગ્રામ (29 બોલમાં 38 રન) અને ઋષભ પંતની ઇનિંગને લીધે દિલ્હી જીતના ઉંબરે આવી ઉભું હતું. ટીમને જીતવા માટે 21 બોલમાં 23 રનની જરૂર હતી. આ સમયે ફોર્મમાં રમી રહેલ ઋષભ પંત (26 બોલમાં 39 રન) આઉટ થયો અને જાણે મેચ એકાએક પલટી ગઇ.
16 ઓવર સુધી દિલ્હીનો સ્કોર ત્રણ વિકેટે 137 રન હતો. ઋષભ પંત 24 બોલમાં 33 રન સાથે રમતમાં હતો. કોલિન ઇનગ્રામ પણ 24 બોલમાં 36 રન સાથે ક્રિઝ પર હતો. જોકે 17મી ઓવરના ત્રીજા બોલ પર પંતે શમીને ડીપ મિડ વિકેટ પર સિક્સ મારી, આ સાથે દિલ્હીની ટીમ જીતની વધુ નજીક આવી હતી. ઓવરના પાંચમા બોલ પર મોહમ્મદ શમીએ પંતને બોલ્ડ કરી દીધો. જોકે આ સમયે પણ જીત દિલ્હીની કહેવાતી હતી અને પંજાબ જીતથી દૂર હતું.