હિટમેન રોહિત શર્માની વધુ એક કમાલ, એક મેચમાં બે સદી ફટકારનારો છઠ્ઠો ભારતીય બન્યો

નવી દિલ્હીઃ રોહિત શર્માએ(Rohit Sharma) ટેસ્ટ ક્રિકેટમાં(Test Cricket) ગજબનું પુનરાગમન કર્યું છે. તેણે વિશાખાપટ્ટનમમાં રમાઈ રહેલી ટેસ્ટ મેચની બંને ઈનિંગ્સમાં સદી(Century) ફટકારી છે. આ સાથે જ તે એ પસંદગીના ખેલાડીઓની 'એલીટ ક્લબ'માં(Elit Club) સામેલ થઈ ગયો છે, જેમણે ટેસ્ટ મેચની બંને ઈનિંગ્સમાં સદી ફટકારી હોય. રોહિત શર્મા આમ કરનારો માત્ર છઠ્ઠો ભારતીય ક્રિકેટર છે. રોહિત ગયા વર્ષના ડિસેમ્બર પછી પ્રથમ ટેસ્ટ મેચ રમી રહ્યો છે. 

ભારત અને દક્ષિણ આફ્રિકા વચ્ચે રમાઈ રહેલી વિશાખાપટ્ટનમમાં ત્રણ મેચની સીરીઝની પ્રથમ ટેસ્ટ રમાઈ રહી છે. ભારતે પ્રથમ ઈનિંગ્સમાં 502 રન બનાવીને દાવ ડિક્લેર કર્યો હતો. પ્રથમ ઈનિંગ્સમાં મયંક અગ્રવાલે બેવડી સદી ફટકારીને નવો રેકોર્ડ બનાવ્યો હતો. રોહિતે પણ પ્રથમ ઈનિંગ્સમાં 176 રન બનાવ્યા હતા. 

રોહિતે પ્રથમ ઈનિંગ્સ પછી બીજી ઈનિંગ્સમાં પણ સદી ફટકારીને પોતાના નામે એક નવો રેકોર્ડ સામેલ કર્યો છે. ભારતે બીજી ઈનિંગ્સમાં ઝડપી રન બનાવવાના હતા. આથી, રોહિતે માત્ર 133 બોલમાં સદી ફટકારી દીધી હતી. તે 149 બોલમાં 127 રન બનાવીને આઉટ થયો હતો. રોહિતે આટલી ઝડપી બેટિંગના કારણે પોતાની બીજી ઈનિંગ્સમાં 53મી ઓવરમાં જ 200 રનનો આંકડો પાર કરી લીધો હતો. રોહિત શર્મા ટેસ્ટ મેચની બંને ઈનિંગ્સમાં સદી ફટકારનારો છઠ્ઠો ભારતીય ક્રિકેટર બન્યો છે. 

એક મેચમાં બે સદી ફટકારનારા ભારતીય ક્રિકેટર

• વિજય હજારે (Vijay Hazare)
• સુનીલ ગાવસ્કર (Sunil Gavaskar)
• રાહુલ દ્રવિડ (Rahul Dravid)
• અજિંક્ય રહાણે (Ajinkya Rahane)
• વિરાટ કોહલી (Virat Kohli)
• રોહિત શર્મા (Rohit Sharma) 

વિજય હજારે એક મેચમાં બે સદી ફટકારનારા પ્રથમ ભારતીય બેટ્સમેન હતા. સુનીલ ગાવસ્કરે ત્રણ વખત આ સિદ્ધિ મેળવી છે. ભારતીય ક્રિકેટમાં ટેસ્ટ મેચમાં 'ધ વોલ' તરીકે ઓળખાતો રાહુલ દ્રવિડ બે વખત એક મેચની બંને ઈનિંગ્સમાં સદી ફટકારી ચૂક્યો છે. 

ગજબનો સંયોગ
રોહિત શર્મા માટે આ બંને ઈનિંગ્સમાં બીજો એક ગજબનો સંયોગ જોવા મળ્યો. તે બંને ઈનિંગ્સમાં સ્ટમ્પ આઉટ થયો છે. તેને આઉટ કરનારો બોલર પણ એક જ રહ્યો છે. વિકેટ કીપર ક્વિન્ટન ડીકોકે જ તેને બંને ઈનિંગ્સમાં કેશવ મહારાજની બોલિંગમાં આઉટ કર્યો છે. 

જુઓ LIVE TV....