`સૌથી સ્વાર્થી ક્રિકેટર` શેન વોર્નની ટિપ્પણી પર સ્ટીવ વોએ આપ્યો જવાબ

સિડનીઃ ઓસ્ટ્રેલિયન ટીમના પૂર્વ કેપ્ટન સ્ટીવ વો (Steve Waugh)એ કહ્યુ કે, શેન વોર્ન (Shane Warne) અને તેની વચ્ચે કોઈ ઝગડો નથી. વોએ કહ્યુ કે, તે આ મહાન સ્પિનર દ્વારા તેમની વિરુદ્ધ કરવામાં આવેલી ટિપ્પણીઓ જેવી કે 'સૌથી સ્વાર્થી ક્રિકેટર'ની પરવા કરતા નથી. વોર્ને સૌથી વધુ રન આઉટના સંદિગ્ધ રેકોર્ડ પર પ્રતિક્રિયા આપતા વોર્ને ટ્વીટ કર્યુ, 'વાહ, એસ વો ટેસ્ટ ક્રિકેટમાં સૌથી વધુ વાર રન આઉટ (104 વાર)ના રેકોર્ડમાં સામેલ હતા અને તેમણે પોતાના જોડીદારોને 73 વાર રન આઉટ કરાવ્યા- શું તે સાચુ છે.'

તેમણે વધુ એક ટ્વીટમાં કહ્યુ, 'જેમ મેં આ હજાર વાર કહ્યુ છે, ફરીથી કહુ છુ- હું એસ વોને બિલકુલ નફરત કરતો નથી. આજની સૂચના માટે જણાવુ તો મેં તેને હાલમાં મારી સર્વકાલિન ઓસ્ટ્રેલિયાની ટીમમાં તેને સામેલ કર્યો હતો. હું જેટલા પણ ખેલાડીઓની સાથે રમ્યો છું, તેમાં સ્ટીવ ચોક્કસપણે સૌથી સ્વાર્થી ક્રિકેટરોમાં સામેલ હતા અને આ આંકડો.'

તે જગજાહેર છે કે વોર્ન અને વો વચ્ચે સંબંધો એટલા સારા નથી. પહેલા વોર્ને પોતાની આત્મકથામાં કહ્યુ હતુ કે, તેમને વો પ્રત્યે સન્માન ત્યારે ઓછુ થઈ ગયુ હતુ, જ્યારે તેમણે વેસ્ટ ઈન્ડિઝ વિરુદ્ધ 1999 ટેસ્ટ સિરીઝમાં તેને ટીમમાંથી બહાર કરી દીધો હતો. જ્યારે ઓસ્ટ્રેલિયાની ટીમ 1-2થી પાછળ હતી.