Attack on Putin: પુતિન પર આ પહેલો હુમલો નથી, રશિયન રાષ્ટ્રપતિ 6 વખત મોતને ચકમો આપી ચુક્યા છે

મોસ્કોઃ Attack on Kremlin: રશિયન સૈનિકોએ ક્રેમલિન ઉપર ઉડતા એક અજાણ્યા ડ્રોનને તોડી પાડ્યું હતું. ક્રેમલિને દાવો કર્યો છે કે આ ડ્રોન રશિયન રાષ્ટ્રપતિને મારવાના ઈરાદાથી મોકલવામાં આવ્યું હતું, જેમાં યુક્રેનનો હાથ હોવાનું જણાવવામાં આવ્યું છે. તમને જણાવી દઈએ કે બુધવારની આ ઘટનાએ રશિયન સુરક્ષા એજન્સી પર ઘણા સવાલો ઉભા કર્યા છે, પરંતુ આ પહેલીવાર નથી જ્યારે પુતિન પર હુમલો કરવાનું ષડયંત્ર રચવામાં આવ્યું હોય. આ પહેલા પણ વ્લાદિમીર પુતિન 6 વખત મોતને હરાવી ચૂક્યા છે.

પુતિન વિરુદ્ધ ષડયંત્રનો પ્રયાસ
તમને જાણીને નવાઈ લાગશે કે પાછલા વર્ષોમાં પુતિનને ઘણી વાર મારવાના પ્રયાસો કરવામાં આવ્યા હતા, પરંતુ તેમની સુરક્ષામાં તૈનાત એજન્સીઓના કારણે આ હુમલાઓને નિષ્ફળ બનાવવામાં આવ્યા હતા. ગયા વર્ષે પુતિન પર હુમલો કરવાનું મોટું કાવતરું ઘડવામાં આવ્યું હતું. આ હુમલો કાકેશસમાં કરવાનો હતો, પરંતુ સુરક્ષાકર્મીઓના કારણે પુતિનને આંચ પણ ન આવી.

આ પણ વાંચોઃ યુક્રેને મર્યાદા પાર કરી! પુતિન પર ડ્રોન હુમલો નિષ્ફળ, રશિયાએ કહ્યું- આ આતંકી કૃત્ય

ઘણીવાર થયો હુમલાનો પ્રયાસ
2002માં અઝરબૈજાનમાં પુતિનની હત્યાનો પ્રયાસ કરવામાં આવ્યો હતો, પરંતુ હુમલા પહેલા આરોપીની ધરપકડ કરવામાં આવી હતી અને તેને 10 વર્ષની સજા ફટકારવામાં આવી હતી. નવેમ્બર 2002 માં, મોસ્કોમાં પુતિનના કાફલાને ઉડાવી દેવાનો પ્રયાસ કરવામાં આવ્યો હતો, પરંતુ રશિયન સુરક્ષા કર્મચારીઓએ પહેલાથી જ વિસ્ફોટને પકડી લીધો હતો અને કાફલાને બીજી તરફ વાળ્યો હતો. ઓક્ટોબર 2003માં પુતિનને મારી નાખવાનો પ્રયાસ કરવામાં આવ્યો હતો પરંતુ બ્રિટિશ એન્ટી ટેરર ​​પોલીસે આ ઘટનાને નિષ્ફળ બનાવી હતી. વર્ષ 2012માં કાળા સમુદ્ર પાસે પણ આવો જ એક પ્રયાસ કરવામાં આવ્યો હતો, જેમાં એક વ્યક્તિ ઝડપાયો હતો.

આરોપો પર શું બોલ્યું યુક્રેન?
ક્રેમલિનમાં બુધવારના દિવસે ડ્રોન હુમલાને લઈને રશિયાએ કહ્યું કે યુક્રેનને તે વળતો જવાબ આપશે. તો યુક્રેન તરફથી કોઈ હુમલાનો ઇનકાર કરવામાં આવ્યો છે અને રશિયાના આરોપોનું સીધી રીતે ખંડન કરવામાં આવ્યું છે. તમને જણાવી દઈએ કે જે સમયે ક્રેમલિન પર હુમલો થયો તે સમયે રશિયન રાષ્ટ્રપતિ બિલ્ડિંગમાં હાજર નહોતા.