ઈમરાન ખાનના ઘરે 30-40 આતંકીઓ : કમાન્ડોએ વિસ્તારને કોર્ડન કર્યો, 24 કલાકનું અલ્ટીમેટમ

Pakistan: પાકિસ્તાનની પંજાબ સરકારે પાકિસ્તાન તહરીક-એ-ઈન્સાફ (PTI) ને પૂર્વ વડાપ્રધાન અને પાર્ટીના વડા ઈમરાન ખાનના લાહોરમાં જમાન પાર્ક હાઉસમાં છુપાયેલા 30-40 આતંકવાદીઓને પોલીસને સોંપવાનો આદેશ આપ્યો છે. આદેશમાં સરકારે પાર્ટીને માત્ર 24 કલાકનો સમય આપ્યો છે. પંજાબ સરકારના કાર્યકારી માહિતી મંત્રી આમિર મીરે પ્રેસ કોન્ફરન્સ દ્વારા આ માહિતી આપી છે. મીરે ચર્ચા દરમિયાન કહ્યું કે, જો પીટીઆઈ આ આતંકવાદીઓને હેન્ડઓવર નહીં કરે તો પોલીસ તેમની સામે કડક કાર્યવાહી કરશે.

આ દરમિયાન પોલીસે ઈમરાન ખાનના જમાન પાર્ક સ્થિત ઘરની બહાર ઘેરાબંધી કરી છે. ઇમરાનના ઘરની બહાર પોલીસના સમાચાર સાંભળીને તેના સમર્થકો પણ મોટી સંખ્યામાં પહોંચી ગયા છે. કહેવામાં આવી રહ્યું છે કે ટૂંક સમયમાં જ ઈમરાન ખાનના ઘરે કાર્યવાહી થઈ શકે છે. આ દરમિયાન પોલીસે ઈમરાન ખાનના જમાન પાર્ક સ્થિત ઘરની બહાર ઘેરાબંધી કરી છે. 

મીરે વધુમાં કહ્યું કે સરકારને આ બાબતોની માહિતી વિશ્વસનીય ગુપ્તચર તંત્ર પાસેથી મળી છે. મીરે કહ્યું છે કે જે ઈન્ટેલિજન્સ રિપોર્ટ સામે આવ્યો છે તે ખૂબ જ ખતરનાક છે, એજન્સીઓએ જીઓ-ફેન્સિંગ દ્વારા જમાન પાર્કના મકાનમાં આતંકવાદીઓની હાજરીની જાણ કરી છે. પીટીઆઈ પર કટાક્ષ કરતા મીરે તેને દેશ માટે ખતરો ગણાવ્યો છે. તેમણે એમ પણ કહ્યું કે પીટીઆઈ ચીફ ઈમરાન ખાન લાંબા સમયથી સતત સેનાને નિશાન બનાવી રહ્યા છે.

પીટીઆઈ પર મોટો આરોપ લગાવતા મીરે એમ પણ કહ્યું છે કે ઈમરાન ખાને ધરપકડ પહેલાં જ હુમલાની યોજના બનાવી હતી. વચગાળાના માહિતી પ્રધાને કહ્યું છે કે 9 મેના રોજ સેનાના સ્થળો પર હુમલો પૂર્વયોજિત હતો. તેમણે કહ્યું કે સરકારે આવી ઘટનાઓ પર ઝીરો ટોલરન્સની નીતિ અપનાવી છે. દરમિયાન, વચગાળાના મુખ્ય પ્રધાન મોહસિન નકવીએ પંજાબ પોલીસને આગચંપી કરનારાઓ સામે કાર્યવાહી કરવા માટે ફ્રી હેન્ડ આપી દીધો છે.