Japan Earthquake: જાપાનમાં ભૂકંપે મચાવી ભારે તબાહી; મૃત્યુઆંક 30 પર પહોંચ્યો અનેક ઘાયલ, હજારો ઘરોમાં અંધારપટ

દુનિયા જ્યારે નવા વર્ષની ઉજવણીમાં ડૂબેલી હતી ત્યારે જાપાનના લોકો પરેશાની સામે ઝઝૂમી રહ્યા હતા. સોમવારે 7.6ની તીવ્રતાવાળા શક્તિશાળી ભૂકંપથી જાપાનની ધરતી ધ્રુજી ઉઠી. આ ભૂકંપે અત્યાર સુધીમાં 30 લોકોનો ભોગ લીધો છે. જ્યારે 14 લોકો ગંભીર રીતે ઘાયલ થયા છે. કાટમાળ નીચે હજુ પણ કેટલાક લોકો દટાયેલા હોવાની આશંકા છે. જાપાનમાં 38 ફ્લાઈટ કેન્સલ થઈ ચૂકી છે. 33 હજારો ઘરોમાં અંધારપટ છે. સ્થિતિ એટલી વણસી છે કે જાપાનની સેનાને જમીન પર ઉતારવી પડી છે. 

વાત જાણે એમ છે કે જાપાને 2024ના પહેલા દિવસે ભૂકંપની એક સિરીઝનો સામનો કર્યો. જાપાની અધિકારીઓના જણાવ્યાં મુજબ એક જ દિવસની અંદર ભૂકંપના લગભગ 155 જેટલા આંચકા આવ્યા. જેમાંથી અનેક આંચકા તો 6ની તીવ્રતાથી પણ વધુ હતા જ્યારે પહેલો ઝટકો 7.6ની તીવ્રતાનો હતો. આ આંચકાએ સૌથી વધુ તબાહી મચાવી.