કપરું છે આ વર્ષ 2020, કોરોના બાદ આ જોખમ તોળાવવાની ભીતિ

નવી દિલ્હી: અત્યારે તો તમને એમ થતુ હશે કે આ કોરોના વાયરસના સંકટ સામે કેવી રીતે જીત મેળવીએ અને બધા પાછા નોર્મલ લાઈફ જીવે. પરંતુ જે પૂર્વાનુમાનો થઈ રહ્યાં છે તેને જોતા એવું લાગી રહ્યું છે કે વર્ષ 2020નું વર્ષ દુનિયા માટે સંઘર્ષ, જંગ અને તબાહી લઈને આવ્યું છે. વર્ષની શરૂઆતની સાથે જ કોરોના વાયરસે સમગ્ર દુનિયા પર કેર વર્તાવ્યો છે. એક અનુમાન મુજબ આ વર્ષના અંત સુધીમાં 16 નાના મોટા તોફાનનું જોખમ તોળાઈ રહ્યું છે. જો કે આ તોફાનોથી કયો વિસ્તાર કેટલો પ્રભાવિત થશે તે હજુ સટિક રીતે જાણી શકાયું નથી. 

આ તોફાનમાં આઠ હરિકેન સામેલ
કોરોના વાયરસ બાદ પણ સંકટના વાદળો છવાયેલા રહેશે. આ તથ્ય અભ્યાસ બાદ પૂર્વાનુમાન રજુ કરતા કોલોરાડો સ્ટેટ યુનિવર્સિટીના હવામાન વૈજ્ઞાનિકોએ જણાવ્યું છે. તેમણે જણાવ્યું કે આ વર્ષે દુનિયાભરમાં 16થી વધુ સમુદ્રી તોફાન ત્રાટકી શકે છે. જેમાં આઠ હરિકેન પણ સામેલ છે. આ આઠ હરિકેનમાંથી ચાર તોફાન ખુબ જ ખતરનાક અને શક્તિશાળી હશે. વિશેષજ્ઞોએ કહ્યું કે અમને આ વર્ષે ફરીથી મોટી ગતિવિધિઓ થવાના સંકેતો મળ્યાં છે.