અમેરિકામાં માતા પિતા પાસે H-1B વિઝા હશે તો પણ બાળકોને તગેડાશે, હવે માત્ર આ જ વિકલ્પ

US Green Card Delay: અમેરિકામાં એક લાખ ભારતીય બાળકોને તેમના માતાપિતાથી અલગ થવું પડી શકે છે. તેનું કારણ ગ્રીન કાર્ડ આપવાની પ્રક્રિયામાં વિલંબ છે. ગ્રીન કાર્ડની પ્રક્રિયા લાંબી અને ધીમી છે. રોજગાર આધારિત ગ્રીન કાર્ડ માટે 10.7 લાખ ભારતીયો કતારમાં ઉભા છે. ગ્રીન કાર્ડ દ્વારા અમેરિકામાં કાયમી વસવાટનો કાનૂની અધિકાર મળે છે. આ જ કારણ છે કે અમેરિકા જનારા ભારતીયો માટે ગ્રીન કાર્ડ મેળવવું સૌથી મોટી પ્રાથમિકતા છે.

મોટી સંખ્યામાં ગ્રીન કાર્ડના કેસ પેન્ડિંગ છે. તેના ઉપર, દરેક દેશ માટે માત્ર 7 ટકા ક્વોટા છે, જેનો અર્થ છે કે અરજી કરનારા દરેક દેશમાંથી માત્ર 7 ટકા લોકોને જ ગ્રીન કાર્ડ આપવામાં આવશે. જો તમામ પેન્ડિંગ કેસ એક જ ગતિએ પૂર્ણ થાય તો આ પ્રક્રિયા પૂર્ણ થતાં 135 વર્ષનો સમય લાગશે. ગ્રીન કાર્ડ માટે અરજી કરવામાં ભારત, ચીન અને ફિલિપાઈન્સ જેવા દેશોના નાગરિકો સૌથી આગળ છે.

શા માટે બાળકોને તેમના માતાપિતાથી અલગ થવાનો ભય છે?
અમેરિકાના વિઝા નિયમો અનુસાર, જો કોઈ માતા-પિતા પાસે ગ્રીન કાર્ડ નથી પરંતુ તે અમેરિકામાં કામ કરી રહ્યા છે, તો તેમને તેમના બાળકો સાથે રહેવાનો અધિકાર છે. ભારતમાંથી મોટાભાગના લોકો H-1B વિઝા હેઠળ અમેરિકા જાય છે, જે ઉચ્ચ કુશળ કામદારો માટે ઉપલબ્ધ છે. H-1B વિઝા ધરાવતા ભારતીયોને H-4 વિઝાના આધારે અમેરિકામાં તેમના બાળકો અને તેમના આશ્રિતો જેમ કે પત્ની અથવા માતા-પિતાને અમેરિકામાં રાખવાનો અધિકાર મળે છે.

જો કે, જો બાળકની ઉંમર 21 વર્ષથી વધુ છે, તો તે H-4 વિઝા સિસ્ટમના આધારે અમેરિકામાં રહી શકશે નહીં. આ જ કારણ છે કે H-1B વિઝા હેઠળ અમેરિકા ગયેલા ભારતીયો ગ્રીન કાર્ડ મેળવવા માંગે છે, જેથી તેમને તેમના પરિવાર સાથે રહેવાનો મોકો મળે. જો કે, ગ્રીન કાર્ડની પ્રક્રિયા પૂર્ણ થાય ત્યાં સુધીમાં H-4 વિઝા હેઠળ અમેરિકામાં રહેતા 1.34 લાખ ભારતીય બાળકોની ઉંમર 21 વર્ષથી વધુ હશે અને તેમને દેશ છોડવો પડશે.

જો આમ થશે તો બાળકોને તેમના પરિવાર અને માતા-પિતાથી બળજબરીથી અલગ થવું પડશે. તેનું કારણ એ છે કે નોકરી માટે મેળવેલા H-1B વિઝા હેઠળ માતાપિતાને અમેરિકામાં રહેવાનો અધિકાર મળશે. પરંતુ બાળકોના વિઝા સમાપ્ત થઈ જશે. આવી સ્થિતિમાં, તેઓએ કાં તો ભારત પરત ફરવું પડશે અથવા અન્ય કોઈ દેશમાં રહેવા જવું પડશે.

બાળકો પાસે શું વિકલ્પ છે?
જો કે, તેમના માતાપિતાથી અલગ થયેલા બાળકો પાસે પણ અમેરિકામાં રહેવાનો વિકલ્પ છે. જો તેઓ ઈચ્છે તો F-1 અથવા સ્ટુડન્ટ વિઝા મેળવીને અમેરિકામાં રહી શકે છે. પરંતુ આ માટે તેઓએ લાખો રૂપિયાની યુનિવર્સિટીની ફી ચૂકવવી પડશે. જો તેઓને અમેરિકામાં રહેવા અને અભ્યાસ કરવાની તક મળે તો પણ તેમના માટે 'એમ્પ્લોયમેન્ટ ઓથોરાઈઝેશન ડોક્યુમેન્ટ' (EAD) મેળવવાનું મુશ્કેલ બનશે. જો તેને અભ્યાસ બાદ EAD મળશે તો તે લાંબા સમય સુધી અમેરિકામાં રહી શકશે.