କପିଲଙ୍କ ସପକ୍ଷରେ ଅନୁପମ; କିଏ ରଚିଥିଲା କି ଷଡ଼ଯନ୍ତ୍ର?

ମୁମ୍ବାଇ: 'ଦ କାଶ୍ମୀର ଫାଇଲ୍ସ' ଫିଲ୍ମକୁ ପ୍ରମୋଟ୍ କରିବା ପାଇଁ ଅଭିନେତା କପିଲ୍ ଶର୍ମା ମନା   କରିଦେଇଥିବା ଖବରକୁ ନେଇ ବେଶ ଚର୍ଚ୍ଚା ହୋଇଥିଲା। ଏପରିକି ସୋସିଆଲ ମିଡିଆରେ ଫ୍ୟାନ୍ସ କପିଲ ଶର୍ମାଙ୍କୁ ଟ୍ରୋଲ କରିବାକୁ ମଧ୍ୟ ପଛାଇ ନଥିଲେ। କିନ୍ତୁ ଏବେ ସେହି 'ଦ କାଶ୍ମୀର ଫାଇଲ୍ସ'ର ଏକ ପ୍ରମୁଖ ଭୂମିକାରେ ଥିବା ଭେଟେରାନ୍ ଅଭିନେତା ଅନୁପମ୍ ଖେର, କପିଲ୍ ଶର୍ମାଙ୍କ ସପକ୍ଷରେ ବାହାରିଛନ୍ତି। 

ଗତ ମାର୍ଚ୍ଚ ୧୧ରେ ଫିଲ୍ମ 'ଦ କାଶ୍ମୀର ଫାଇଲ୍ସ' ରିଲିଜ ହୋଇଥିଲା। ତେବେ ଫିଲ୍ମର ନିର୍ଦ୍ଦେଶକ ମାର୍ଚ୍ଚ ୭ରେ ଫିଲ୍ମକୁ ନେଇ ଏକ ଟ୍ୱିଟ କରିଥିଲେ। ଟ୍ୱିଟଟି କପିଲ ଶର୍ମାଙ୍କ ଉପରେ ଥିଲା। କପିଲ ତାଙ୍କ ଶୋରେ ଏହି ଫିଲ୍ମର ଷ୍ଟାରମାନଙ୍କୁ ନିମନ୍ତ୍ରଣ କରିନାହାନ୍ତି। ଫିଲ୍ମରେ କେହି ବଡ ଷ୍ଟାର ନଥିବାରୁ ନିମନ୍ତ୍ରଣ କରାନାହିଁ ବୋଲି କପିଲ କହିଥିବା ଫିଲ୍ମର ନିର୍ଦ୍ଦେଶକ ସୂଚନା ଦେଇଥିଲେ। ଏହାପରେ ଏହି ଖବର କପିଲଙ୍କ କ୍ୟାରିଅର ଉପରେ ବହୁତ ପ୍ରଭାବ ପକାଇଥିଲା। ତାଙ୍କ ଶୋକୁ ଇଣ୍ଡଷ୍ଟ୍ରିରୁ ବହିଷ୍କାର କରାଯାଉ ବୋଲି ଦାବି ହୋଇଥିଲା। ଏଭଳି ଅନେକ କଥାକୁ ନେଇ ଅଭିନେତା କପିଲ ଶର୍ମା ଟ୍ରୋଲ ହୋଇ ଚାଲିଥିଲେ।

ଏଥିପାଇଁ କପିଲ୍ ମଧ୍ୟ ଅନେକ ଦିନ ପରେ ମୁହଁ ଖୋଲିଥିଲେ। ସେ କହିଥିଲେ, 'ଏକପାଖିଆ କଥାକୁ ବିଶ୍ୱାସ କରିବା ଉଚିତ ନୁହେଁ। ଆଉ ଯେଉଁମାନେ ଏହାକୁ ସତ ଭାବି ଏହାର ବିଶ୍ଳେଷଣ କରୁଛନ୍ତି ସେମାନଙ୍କୁ ମୋର କିଛି ସଫେଇ ଦେବାର ଆବଶ୍ୟକତା ନାହିଁ।' ହେଲେ ଏବେ ଏହି ବିବାଦକୁ ନେଇ ଆଉ ଗୋଟିଏ ଟ୍ୱିଷ୍ଟ ଆସିଛି। ତେବେ ବର୍ତ୍ତମାନ 'ଦ କାଶ୍ମୀର ଫାଇଲ୍ସ' ଫିଲ୍ମରେ ଅଭିନୟ କରିଥିବା ଅଭିନେତା ଅନୁପମ୍ ଖେର୍ ସୁରକ୍ଷା କବଚ ସାଜି କପିଲଙ୍କ ଉପରେ ଆସିଥିବା ଅଭିଯୋଗ ପଛର ସତ୍ୟତା କହିଛନ୍ତି।

ଅନୁପମ କହିଛନ୍ତି, 'ଦ କପିଲ ଶର୍ମା ଶୋ'ରେ 'ଦ କାଶ୍ମୀର ଫାଇଲ୍ସ'କୁ ପ୍ରମୋଟ କରିବା ନେଇ ୨ ମାସ ପୂର୍ବରୁ ଇନଭାଇଟ୍ କରାଯାଇଥିଲା। କିନ୍ତୁ ଫିଲ୍ମଟି ଖୁବ୍ ଗୁରୁତ୍ୱପୁର୍ଣ୍ଣ  ପ୍ରସଙ୍ଗ ଉପରେ ତିଆରି ହୋଇଥିବାରୁ ଶୋ'ରେ ଭାଗ ନେବାକୁ ଚାହୁଁନଥିଲେ।' ଅନୁପମ୍ ଖେର ଆହୁରି କହିଛନ୍ତି ଯେ, କପିଲ ଶର୍ମା ଶୋ' ହେଉଛି ଏକ କମେଡି ଆଉ ସେଠାରେ ଗଭୀର ପ୍ରସଙ୍ଗ ଆଲୋଚନା କରିବା ଠିକ୍ ହେବ   ନାହିଁ। କେବଳ ଏତିକି ନୁହେଁ ବରଂ ଅନୁପମ୍ କହିଛନ୍ତି ଯେ, ତାଙ୍କୁ  କପିଲ ଶର୍ମା ଶୋ'ରୁ କଲ୍ ଆସିଥିଲା କିନ୍ତୁ ସେ ମ୍ୟାନେଜର ଙ୍କୁ କହିଥିଲେ ଯେ, ଏହି ଫିଲ୍ମଟି ଖୁବ୍ ସିରିୟସ୍ ତେଣୁ ଏଥିରେ ସେ  ଯାଇପାରିବେ ନାହିଁ। 

ଅନୁପମ୍ ଖେରଙ୍କ ଏହି ବୟାନ ପରେ କପିଲ ତାଙ୍କୁ ଧନ୍ୟବାଦ ଜଣାଇଛନ୍ତି। କାରଣ ଏପରି କରିବା ଦ୍ୱାରା କପିଲଙ୍କ ଉପରେ ଲାଗିଥିବା ସମସ୍ତ ଅଭିଯୋଗର ସତ୍ୟାସତ୍ୟ ସାମନାକୁ ଆସିଛି। ସେପଟେ ଫିଲ୍ମର ନିର୍ଦ୍ଦେଶକ ଏବଂ ଅଭିନେତାଙ୍କ ମଧ୍ୟରେ କଥା ମେଳ ଖାଉନଥିବା ଦେଖିବାକୁ ମିଳିଥିବାବେଳେ  ଏପରି ଘଟଣା ପରେ ଏହା କପିଲଙ୍କ ବିରୋଧରେ କୌଣସି ଷଡଯନ୍ତ୍ର ହୋଇପାରେ ବୋଲି ଆଲୋଚନା ହେଉଥିବା ଶୁଣିବାକୁ ମିଳିଛି।