ରାଜ୍ୟରେ ପୁଣି ଉପରମୁହାଁ କୋରୋନା ଗ୍ରାଫ୍: ଖୋର୍ଦ୍ଧାରେ ୧୫ଟି ହଟସ୍ପଟ୍ ଚିହ୍ନଟ

ଭୁବନେଶ୍ୱର:  ଆଜିଠାରୁ ରାଜ୍ୟରେ ଆରମ୍ଭ ହୋଇଛି ଗଣ ଟିକାକରଣ । ୪୫ ବର୍ଷରୁ ଊର୍ଦ୍ଧ୍ୱ ୬ଟି ବର୍ଗର ଯେ କୌଣସି ବ୍ୟକ୍ତି ଏହି ଟିକା ନେଇ ପାରିବେ।  ଗୁରୁବାର ଓ ଶୁକ୍ରବାର ଦୁଇଦିନ ସରକାରୀ ଛୁଟି ସତ୍ବେ କୋଭିଡ ସଂକ୍ରମଣ ବଢ଼ୁଥିବାରୁ ରାଜ୍ୟରେ ଟିକାକରଣ ଚାଲିଛି। ଚଳିତ ଟିକାକରଣ ବ୍ୟାପକ ହୋଇଥିବାରୁ ଟିକାଦାନ କେନ୍ଦ୍ରରେ ଆୟୋଜନ ମଧ୍ୟ ବଡ଼ ଆକାରରେ ହୋଇଛି । ରାଜ୍ୟରେ ଦୈନିକ ୨ ଲକ୍ଷ ଟିକାକରଣ ଟାର୍ଗେଟ୍ ରଖାଯାଇଛି। ଏହି ପରିସ୍ଥିତିରେ ଆଜି ରାଜ୍ୟର ଦୈନିକ କୋରୋନା ସଂକ୍ରମଣ ମଧ୍ୟ ଆକାଶଛୁଆଁ ହୋଇଛି। ଚଳିତ ବର୍ଷର ସର୍ବାଧିକ ସଂକ୍ରମଣ ହୋଇଛି ଆଜି । ସଂଖ୍ୟା ପ୍ରାୟ ୪ ଶହ ଛୁଇଁଛି । ଖୋର୍ଦ୍ଧା ଜିଲ୍ଲାରେ ୧୫ଟି ହଟସ୍ପଟ୍ ଚିହ୍ନଟ ହୋଇଛି ।

ଦିନକୁ ଦିନ ସ୍ଥିତି ଉତ୍କଟ ହେବାରେ ଲାଗିଛି । ରାଜ୍ୟରେ ଦିନକରେ ୩୯୪ ଜଣ କୋରୋନା (Corona) ସଂକ୍ରମିତ ଚିହ୍ନଟ ହୋଇଛନ୍ତି । ଫଳରେ ଦିନ କେଇଟା ତଳେ ସଂକ୍ରମିତଙ୍କ ସଂଖ୍ୟା ଦ୍ୱିଶତକ ମାରିଲାଣି ବୋଲି କୁହାଯାଉଥିବା ବେଳେ ବର୍ତ୍ତମାନ ଏହା ଚାରି ଶତକ ମାରିଲାଣି ବୋଲି କହିବାକୁ ପଡ଼ିବ । ଖୋଦ୍ଧା (Khordha) ଜିଲ୍ଲାରୁ ସର୍ବାଧିକ ୭୦ ଜଣ କୋରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ କଳାହାଣ୍ଡିରୁ ୪୩, ନୂଆପଡ଼ାରୁ ୪୦, ବରଗଡ଼ରୁ ୩୪ ସଂକ୍ରମିତ ଚିହ୍ନଟ ହୋଇଛନ୍ତି । 

ସେହିପରି ସୁନ୍ଦରଗଡ଼ରୁ ୩୦, କଟକରୁ ୨୭, ଅନୁଗୋଳରୁ ୨୪  ସଂକ୍ରମିତ ଚିହ୍ନଟ ହୋଇଛନ୍ତି । ମୟୂରଭଞ୍ଜରୁ ୧୯, ସମ୍ୱଲପୁରରୁ୧୪, ପୁରୀରୁ୧୨ ଓ ବଲାଙ୍ଗିରରୁ ୧୦ଜଣ ସଂକ୍ରମିତ ଚିହ୍ନଟ ହୋଇଥିବା ସ୍ୱାସ୍ଥ୍ୟ ଓ ପରିବାର କଲ୍ୟାଣ (Health & Family Welfare Department) ବିଭାଗ ପକ୍ଷରୁ ସୂଚନା ମିଳିଛି । କେବଳ ଖୋର୍ଦ୍ଧା ଜିଲ୍ଲାରେ ୧୫ଟି ହଟସ୍ପଟ୍ ଚିହ୍ନଟ ହୋଇଛି। ସେପଟେ ଦେଶରେ ଦୈନିକ ସଂକ୍ରମିତଙ୍କ ସଂଖ୍ୟା ୭୦ ହଜାର ପାର । ପୁଣି ୫ ମାସ ପୂର୍ବରେ ଯେଉଁ ସ୍ଥିତି ଥିଲା, ସେହି ସ୍ଥିତିକୁ ଫେରିବାକୁ ଲାଗିଛି ଦୈନିକ ସଂକ୍ରମଣ ସଂଖ୍ୟା। 

ଅନ୍ୟପଟେ ଆଜିଠାରୁ ମାସିଭ ଭ୍ୟାକସିନେସନ( Massive Vaccination) ଆରମ୍ଭ ହୋଇଥିବା ବେଳେ ଛୁଟିଦିନ ବି ବାଦ୍ ପଡୁନି। ୬ଟି ସମ୍ବେଦନଶୀଳ ଵର୍ଗର ବ୍ୟକ୍ତିଙ୍କୁ ଟିକାକରଣରେ ଦିଆଯାଉଛି ପ୍ରାଧାନ୍ୟ । ସକାଳ ୮ଟାରୁ ସନ୍ଧ୍ୟା ୭ଟା ଯାଏ ଚାଲିବ ଟିକାକରଣ ।ରାଜ୍ୟରେ ଏବେଠୁ ଏତେ ସଂଖ୍ୟକ ପଜିଟିଭ୍ ଷ୍ଟାଟସ (Corona Positive Status) ଆସିବା ପରେ ରାଜ୍ୟ ସରକାର ଆହୁରି ସତର୍କ ହୋଇ ଉଠିଛନ୍ତି।