ଓଡ଼ିଶାରେ ମିଳିଲା ସୁନା ଖଣିର ସନ୍ଧାନ, ମଲଟିସେନସର ଏରୋଜିଓଫିଜିକାଲ ସର୍ଭେ ଦ୍ୱାରା ହେଲା ଚିହ୍ନଟ

ପ୍ରଜ୍ଞା ପାରମିତା ପତ୍ରୀ, ଭୁବନେଶ୍ୱର: ଓଡ଼ିଶାରେ ସୁନା ଖଣି । କଥାଟା ବିଶ୍ୱାସ ହେଉନି କି? ହଁ, ଓଡ଼ିଶାରେ ହିଁ ସୁନା ଖଣିର ସନ୍ଧାନ ମିଳିଛି । ଏମିତି କିଛି ତଥ୍ୟ ଜିଓଲୋଜିକାଲ ସର୍ଭେ ଅଫ ଇଣ୍ଡିଆ ପକ୍ଷରୁ ଜି ଓଡ଼ିଶାକୁ ଦିଆଯାଇଛି । ମଲଟିସେନସର ଏରୋଜିଓଫିଜିକାଲ ସର୍ଭେ ଦ୍ୱାରା ଓଡ଼ିଶାରେ ସୁନା ଖଣି ଚିହ୍ନଟ ହୋଇଥିବାବେଳେ ଏ ସଂପର୍କରେ ଅଧିକ ତଥ୍ୟ ସଂଗ୍ରହ କରାଯାଉଛି । ସୁନା ସହିତ କପର, ମାଙ୍ଗାନିଜ, ଗ୍ରାଫାଇଟ ଭଳି ଖଣି ସଂପର୍କରେ ସନ୍ଧାନ ମିଳିଥିବାବେଳେ ଖୁବ ଶୀଘ୍ର ଏ ସବୁ ସ୍ଥାନରେ ହେଲିକପ୍ଟର ସର୍ଭେ ହେବ । କେନ୍ଦ୍ର ସରକାରଙ୍କ ଖଣି ବିଭାଗ ଅଧିନରେ ଥିବା ଜିଓଲୋଜିକାଲ ସର୍ଭେ ଅଫ ଇଣ୍ଡିଆ ଦ୍ୱାରା କରାଯାଇଥିବା ମଲଟିସେନସର ଏରୋଜିଓଫିଜିକାଲ ସର୍ଭେ ଦ୍ୱାରା ସୁନା ଖଣିର ସନ୍ଧାନ ମିଳିଛି । ଏହି ଅତ୍ୟାଧୁନିକ ସର୍ଭେ ଦ୍ୱାରା ରାଜ୍ୟର ୭୫ ହଜାର ସ୍କୋୟାର କିଲୋମିଟର ସର୍ଭେ କରାଯିବା ସହ ଏଭଳି ତଥ୍ୟ ମିଳିଛି । 

ଏଥିରେ ମୋଟ 40ଟି ମିନେରାଲ ବ୍ଲକର ସନ୍ଧାନ ମିଳିଛି । ଏଥିରେ ସୁନା ଖଣି ସମେତ କପର, ମାଙ୍ଗାନିଜ, ଗ୍ରାଫାଇଟ ଏବଂ ଆଇରନ ଓରର ସନ୍ଧାନ ମିଳିଛି । ସୁକିନ୍ଦା, କେଶରପୁର, କୋରାପୁଟ ଆଦି ଅଞ୍ଚଳରେ ଖଣିଗୁଡିକର ସନ୍ଧାନ ମିଳିଛି । ଖୁବ ଶୀଘ୍ର ହେଲିକପ୍ଟର ଦ୍ୱାରା ଆଉ ଏକ ସର୍ଭେ କରାଯିବ । ହେଲିକପ୍ଟରରେ ସେନ୍ସର ଲଗାଯିବା ସହ ତନ୍ନ ତନ୍ନ କରି ଆଉଥରେ ଯାଞ୍ଚ କରାଯିବ । ଏହା ପରେ ଶେଷରେ ଗ୍ରାଉଣ୍ଡ ସର୍ଭେ କରାଯାଇ ଖଣିଗୁଡିକର ତଥ୍ୟ ସରକାରଙ୍କୁ ଦିଆଯିବା ସହ ଅକ୍ସନ ହେବ ବୋଲି ଜିଓଲୋଜିକାଲ ସର୍ଭେ ଅଫ ଇଣ୍ଡିଆ ପକ୍ଷରୁ କୁହାଯାଇଛି । ସାଧାରଣ ପଦ୍ଧତିର ସର୍ଭେ ଦ୍ୱାରା ବିଭିନ୍ନ ପାହାଡ଼ିଆ ଏବଂ ଜଙ୍ଗଲର ଅପହଞ୍ଚ ଅଞ୍ଚଳରେ ପହଞ୍ଚି ମିନେରାଲ ସମ୍ପର୍କରେ ତଥ୍ୟ ସଂଗ୍ରହ ସମ୍ଭବପର ହେଉ ନ ଥିଲା । ହେଲେ ଏହି ଅତ୍ୟାଧୁନିକ ପଦ୍ଧତିରେ ସାଟେଲାଇଟ ଏବଂ ଏୟାର ସର୍ଭେ ଦ୍ୱାରା ଅପହଞ୍ଚ ଅଞ୍ଚଳର ସର୍ଭେ କରି ଏ ସବୁ ଖଣିର ସନ୍ଧାନ ମିଳିଛି । ଏପରିକି ଅତି ଶୀଘ୍ର ଏବଂ କମ ଅର୍ଥ ଖର୍ଚ୍ଚରେ ଏ ସବୁ ସର୍ଭେ କରାଯାଇ ଖଣି ସନ୍ଧାନ କରାଯାଇପାରିଛି । ଜିଓଲୋଜିକାଲ ସର୍ଭେ ଅଫ ଇଣ୍ଡିଆ ପକ୍ଷରୁ ଏ ସମ୍ପର୍କରେ ଭବିଷ୍ୟତ ପ୍ଲାନ ପାଇଁ ଭୁବନେଶ୍ୱରରେ ଓଏମସି, ଜିଓଲୋଜି ନିର୍ଦ୍ଦେଶାଳୟ ଅଧିକାରୀ, ବୈଜ୍ଞାନିକ ଏବଂ କେନ୍ଦ୍ର ସରକାରଙ୍କ ବିଭିନ୍ନ ଅଧିକାରୀଙ୍କ ସହ ଆଲୋଚନା କରାଯାଇଛି । 
କାର୍ଯ୍ୟକ୍ରମରେ ବିଦେଶୀ ବୈଜ୍ଞାନିକମାନେ ଯୋଗ ଦେଇ ଏହାକୁ ଏକ ଉନ୍ନତ ସର୍ଭେ କହିଥିବାବେଳେ ଏହାଦ୍ୱାରା ମାଟି ତଳେ ଥିବା ଖଣିଗୁଡିକର ତ୍ୱରିତ ସନ୍ଧାନ ମିଳିଯିବ ବୋଲି କହିଛନ୍ତି ।