ରାଜଧାନୀରେ କଅଁଳ ଶିଶୁପୁତ୍ରର ମୂଲ୍ୟ ୧୦ ହଜାର!

ଭୁବନେଶ୍ବର: ଲକଡାଉନର କରୁଣ କାହାଣୀ। ଭୋକ ଉପାସରେ ରହିବା ପରେ ବଂଚିବା ପାଇଁ ୬ ଦିନର ଶିଶୁ ପୁତ୍ରକୁ ବିକ୍ରି କରିଦେଲା ମାଆ। ଏଭଳି ଏକ ଘଟଣା ରାଜଧାନୀ ଭୂବନେଶ୍ୱରରେ ଦେଖିବାକୁ ମିଳିଛି। ବିକ୍ରି କରାଯାଇଥିବା ଶିଶୁକୁ ଉଦ୍ଧାର କରାଯାଇଥିବାବେଳେ ତାଙ୍କ ଅବିଭାବକଙ୍କୁ ପୋଲିସ ଖୋଜୁଛି।

ରାଜଧାନୀରେ ୬ ଦିନର ଶିଶୁ ପୁତ୍ରକୁ ୧୦ ହଜାର ଟଙ୍କାରେ ବିକ୍ରି କରାଯାଇଥିବା ଅଭିଯୋଗ ହୋଇଥିଲା। ପରେ  ଭୁବନେଶ୍ବର ୟୁନିଟ ୩ ମାଳିସାହିରୁ ଚାଇଲ୍ଡ ଲାଇନ ଶିଶୁ ପୁତ୍ରକୁ ଉଦ୍ଧାର କରିଛି। ଶିଶୁ ପୁତ୍ରକୁ କିଣିଥିବା ମହିଳାଙ୍କୁ ଅଟକ ରଖି ଜେରା କରୁଛି ପୋଲିସ। ଶିଶୁ ପୁଅକୁ କିଣିଥିବା ମହିଳାଙ୍କ କୌଣସି ଛୁଆ ନ ଥିବାରୁ ସେ ଏହି ଶିଶୁକୁ କିଣିଥିବା କଥା ମାନିଛନ୍ତି।

ପୋଲିସ ଏବେ ଶିଶୁର ବାପା ମାଆଙ୍କୁ ଖୋଜିବାରେ ଲାଗିଛି। ଶିଶୁକୁ ସିଡବ୍ଲ୍ୟସିରେ ହାଜର କରିବା ପରେ ଚାଇଲ୍ଡ ଲାଇନରେ ରଖାଯାଇଛି। ଏହି ଘଟଣା ପଦାକୁ ଆସିବା ପରେ ଉଭୟ ଛୁଆକୁ ବିକ୍ରି କରିବା ଓ କିଣିଥିବା ଲୋକଙ୍କ ବିରୋଧରେ ଚାଇଲ୍ଡ ଲାଇନ କାର୍ଯ୍ୟାନୁଷ୍ଠାନ ପାଇଁ ଥାନାରେ ମାମଲା ରୁଜୁ କରିଛି। ସେପଟେ ନିଶା ସେବନ ପାଇଁ ଶିଶୁ ପୁତ୍ରକୁ ବିକ୍ରି କରାଯାଇଥିବା ସନ୍ଦେହ କରାଯାଉଛି।