ଆଖି ଖୋସିଲା ଭଳି ଲୁଟ୍, ଚଳଚ୍ଚିତ୍ରଠାରୁ କମ୍ ନୁହେଁ ଏ କାହାଣୀ

ରାଜେଶ ସାମନ୍ତରାୟ, ଭୁବନେଶ୍ୱର: କମିଶନରେଟ ପୋଲିସକୁ ବଡ଼ ସଫଳତା । ଏକ ଆନ୍ତଃରାଜ୍ୟ ସାଇବର ଅପରାଧୀ ଗ୍ୟାଙ୍ଗକୁ ଗିରଫ କରିବାରେ ସଫଳ ହୋଇଛି ପୋଲିସ । ଏମାନଙ୍କ ନିକଟକୁ ପ୍ରାୟ ୧୭ ହଜାର ପ୍ରି-ଆକ୍ଟିଭେଟେଡ୍ ସିମ୍ ସହ ଦେଢ଼ ଶହ ମୋବାଇଲ ଫୋନ୍ ଜବତ ହୋଇଛି । ଏହା ସହ ୭ଜଣଙ୍କୁ ଗିରଫ କରିଛି ପୋଲିସ । ଏମାନଙ୍କ ମଧ୍ୟରେ ଅଛନ୍ତି ୨ଜଣ ଭୋଡାଫୋନ କମ୍ପାନୀର କର୍ମଚାରୀ । ତା' ସହ ଇଞ୍ଜିନିୟରିଂ ଛାତ୍ର ଓ କିଛି ସିମ୍ ବିକ୍ରେତା ଅଛନ୍ତି । ଏମାନେ ନକଲି ପରିଚୟ ପତ୍ର ତିଆରି କରି ହଜାର ହଜାର ବେନାମୀ ସିମ୍ ଓଡି଼ଶା ବାହାରକୁ ଚାଲାଣ କରୁଥିଲେ । ଏହି ସିମ୍ ଜରିଆରରେ ହିଁ ସାରା ଦେଶରେ ସଂଗଠିତ ହେଉଥିଲା କଣ୍ଟାକ୍ଟଲେସ୍ ଚୋରି । ମୋବାଇଲ ମାଧ୍ୟମରେ ଅଫରର ଲୋଭ ଦେଖାଇ ଲୁଟ୍ ହେଉଥିଲା କୋଟି କୋଟି ଟଙ୍କା । 

ଘରେ ବସି ସାରା ଦେଶରୁ କୋଟି କୋଟି ଟଙ୍କା ଚୋରିର ଜଘନ୍ୟ ଚକ୍ରବ୍ୟୂହ । ଆଉ ଶେଷରେ ପୋଲିସ ହାତରେ ଧରା ପଡିଲେ ସାଇବର ଲୁଟର ପିଆଦା । ସାରା ଦେଶରେ ଚାଲିଥିବା ସାଇବର ଲୁଟ୍ (Cyber Loot) ମାମଲାରେ ଭୁବନେଶ୍ବର କମିଶନରେଟ୍ ପୋଲିସକୁ ମିଳିଛି ବଡ଼ ସଫଳତା । ଆନ୍ତଃରାଜ୍ୟ ସାଇବର ଲୁଟ୍ ମାମଲାରେ ମିଳିଛି ଓଡ଼ିଶାର ଲିଙ୍କ୍ । ଏଠାରୁ ହଜାର ହଜାର ହଜାର ବେନାମୀ ସିମ୍ ବାହାର ରାଜ୍ୟକୁ ଚାଲାଣ ହେଉଛି, ଆଉ ଏ ସବୁ ସିମ୍ କାର୍ଡ (Sim Card) ଟଙ୍କା ଲୁଟ୍ ପାଇଁ ବ୍ୟବହାର ହେଉଥିବା ପୋଲିସକୁ ପ୍ରମାଣ ମିଳଛି ।

ଓଡ଼ିଶା ଠିକଣା ବ୍ୟବହାର କରି ଓଡ଼ିଆ ଲୋକଙ୍କୁ ଠକୁଥିବା ଅଣ ଓଡ଼ିଆ (Non Odia) ଙ୍କ ପଛରେ ଯେ ଓଡ଼ିଆ ଲୋକଙ୍କର ହିଁ ହାତ ଅଛି ତାହା ଜାଣିବା ପରେ ପୋଲିସର ନିଦ ହଜିଯାଇଛି । ଅନଲାଇନ୍ ଟଙ୍କା ଠକେଇ ପାଇଁ ଏହି ସିମ୍ ବ୍ୟବହାର ହେଉଥିଲା । ଯେଉଁଥିରେ ସାମିଲ ଥିଲେ ଭୋଡାଫୋନ୍ କମ୍ପାନୀର କର୍ମଚାରୀ ସମେତ ଇଂଜିନିୟରିଂ ଛାତ୍ର ଓ ସିମ୍ ବିକ୍ରେତା । ଏମାନଙ୍କ ନିକଟରୁ ପ୍ରାୟ ୧୭ ହଜାର ପ୍ରି ଆକ୍ଟିଭେଟେଡ୍ ସିମ୍ ଜବତ ହୋଇଛି । ତା' ସହ ଜବତ ହୋଇଛି ଲୁଟ୍ ପାଇଁ ବ୍ୟବହୃତ ହେଉଥିବା ଦେଢ଼ ଶହ ମୋବାଇଲ ଫୋନ୍ (Mobile Phone) । ପୋଲିସ ଏ ସମସ୍ତଙ୍କୁ ଗିରଫ କରିଛି ।

ଏମାନେ ଜଣକର ଫଟୋକୁ ଅନ୍ୟ ଜଣଙ୍କ ଆଧାର କାର୍ଡ  (Aadhar Card) ରେ ବ୍ୟବହାର କରି ଏକ ନୂଆ ଆଇଡି ତିଆରି କରୁଥିଲେ । ପରେ ସେହି ପରିଚୟପତ୍ର ବ୍ୟବହାର କରି ନୂଆ ସିମ୍ ଇସ୍ୟୁ କରୁଥିଲେ । ଏହାପରେ ତା'କୁ  ଆକ୍ଟିଭେଟ୍ କରୁଥିଲେ । ସିମ୍ ଆକ୍ଟିଭେଟ୍ (Sim Activate) ହେବା ପରେ ଏ ସବୁ ବାହାର ରାଜ୍ୟକୁ କୋରିଅରରେ ପଠାଉଥିଲେ । ଏହି ସିମ୍ ଦିଲ୍ଲୀ, ପଞ୍ଜାବ, ହରିୟାଣା, ରାଜସ୍ଥାନ, ଉତ୍ତର ପ୍ରଦେଶ ଓ ବିହାର ଯାଇଥାଏ। ସେଠାରୁ ବିଭିନ୍ନ ସାଇବର ହ୍ୟାକର ଓ ଜମତାରା ଗ୍ୟାଙ୍ଗ ଏହି ସିମ୍ ନେଇ ଡିଜିଟାଲ ଲୁଟ୍ କରିଥାନ୍ତି । ଗୋଟିଏ ସିମ ଗୋଟିଏ ଲୁଟ ପାଇଁ ବ୍ୟବହାର ହୋଇଥାଏ । ଲୁଟ୍ ସଫଳ ହୋଇଗଲେ ସିମଟିକୁ ନଷ୍ଟ କରି ଦିଆଯାଏ । ଫଳରେ ପରବର୍ତ୍ତୀ ସମୟରେ ପୋଲିସ ମୋବାଇଲ ସିମକୁ ଟ୍ରାକ୍ କରିବା ସମ୍ଭବ ହୁଏ ନାହିଁ। ତେବେ କମିଶନରେଟ ପୋଲିସ (Commissionrate Police) ଏକ ଛୋଟିଆ ମାମଲାର ତଦନ୍ତ କରିବା ବେଳେ ଏତେ ବଡ଼ ସଫଳତା ମିଳିଛି ।

ପୋଲିସ ସୂଚନା ଅନୁସାରେ ଗତ ଜାନୁଆରୀ ମାସରେ ଭୁବନେଶ୍ବର ବାଙ୍କୁଆଳ ଅଂଚଳର ଇତିଶ୍ରୀ କାନୁନଗୋ ୨ ଲକ୍ଷ ୫୮ ହଜାର ଟଙ୍କା ଅନଲାଇନ ଠକେଇ (Online Loot) ର ଶିକାର ହୋଇଥିଲେ । ଏ ସମ୍ପର୍କରେ ଅଭିଯୋଗ ହେବା ପରେ ପୋଲିସ ପ୍ରଥମେ ଟେଲିଫୋନ୍ ନମ୍ବର ଓ ମୋବାଇଲ ଫୋନର IMEI ନମ୍ବର ଟ୍ରାକ୍ କରିଥିଲା । ଟ୍ରାକରୁ ଜଣା ପଡିଥିଲା ସିମଟି ହରିୟାଣାର, ହେଲେ ମୋବାଇଲ ଫୋନଟି ଓଡି଼ଶାର ।  ଏହି ମୋବାଇଲ ଫୋନରେ ଏକ ବର୍ଷ ମଧ୍ୟରେ୩୦ ହଜାର ନୂଆ ସିମ୍ ପଡି଼ଛି । ୩୦ ହଜାର ସିମ୍ ମଧ୍ୟରୁ ପ୍ରାୟ ୭ଶହଟି ଓଡ଼ିଶାର । ୭ଶହ ସିମ୍ ମଧ୍ୟରୁ ପ୍ରାୟ ଶହେଟି ସିମ୍ ଭଦ୍ରକର । ବଡ଼କଥା ହେଉଛି, ଏସବୁ ଗୋଟିଏ ମୋବାଇଲ ଦୋକାନରୁ ହିଁ ବିକ୍ରି ହୋଇଛି । ଏହି ସିମଗୁଡ଼ିକ ବିଭିନ୍ନ ମୋବାଇଲ ଦୋକାନୀମାନେ କମ୍ପାନୀ କର୍ମଚାରୀଙ୍କ ସହ ମିଶି ଚୋରାରେ ବେନାମୀ ଠିକଣା କରି ଚାଲାଣ କରିଥାନ୍ତି ।

ଏହି ରାକେଟର ପର୍ଦ୍ଦାଫାଶ କରିବାକୁ ଏକ ସ୍ୱତନ୍ତ୍ର ଟିମ୍ ଗଠନ କରିଛି ପୋଲିସ । ଏପରି ଏକ ସିମ୍ ଗ୍ୟାଙ୍ଗ ଗିରଫ ହେବା ଦେଶରେ ପ୍ରଥମ ଘଟଣା । ଏତେ ପରିମାଣର ସିମ୍ ପୂର୍ବରୁ କେବେ ବି କେଉଁଠୁ ଜବତ ହୋଇ ନ ଥିଲା ।