ବିଳମ୍ବିତ ରାତିରେ 'କାଉ'କୁ ହାଣି ଦୁର୍ବୃତ୍ତ ଫେରାର

ଗଞ୍ଜାମ: ଜିଲ୍ଲାର ପୋଲସରା ଅନ୍ତର୍ଗତ କଳମ୍ବ ହାଇସ୍କୁଲ ଛକରେ ଜଣେ ଯୁବକଙ୍କୁ ବିଭତ୍ସ ଭାବେ ହତ୍ୟା କରାଯାଇଛି। ମୃତକ କଳମ୍ବ ଗ୍ରାମର ବିକାଶ ସାହୁ ଓରଫ କାଉ ବୋଲି ଜଣା ପଡିଛି। ରବିବାର ସକାଳେ ପୋଲିସ ମୃତଦେହ ଉଦ୍ଧାର କରି ପୋଲସରା CHCକୁ ପଠାଇଛି। ପୂର୍ବ ଶତ୍ରୁତାରୁ ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଉଛି।

ପୋଲସରା କଳମ୍ବ ହାଇସ୍କୁଲ୍ ଛକରେ ବିକାଶ ସାହୁଙ୍କୁ ହତ୍ୟା କରାଯାଇଛି। ବିଳମ୍ବିତ ରାତିରେ କେହି ହତ୍ୟା କରିଥିବା ପରିବାର ଲୋକ ଅଭିଯୋଗ କରିଛନ୍ତି। ଘଟଣାସ୍ଥଳରେ ପୋଲସରା ଓ କବିସୂର୍ଯ୍ୟନଗର ପୋଲିସ ପହଞ୍ଚି ତନାଘନା ଆରମ୍ଭ କରିଛନ୍ତି। ବର୍ତ୍ତମାନ ସୁଦ୍ଧା ହତ୍ୟାକାଣ୍ଡର କାରଣ ଜଣାପଡିନାହିଁ। ବିକାଶଙ୍କୁ ହତ୍ୟା କରିବା ପରେ ଅପରାଧୀ ଫେରାର ହୋଇଯାଇଛନ୍ତି। ପୋଲିସ ଏକ ହତ୍ୟା ମାମଲା ରୁଜୁ କରି ତଦନ୍ତ ଚଳାଇଛି।

ପୋଲିସର କହିବା ଅନୁସାରେ ବିକାଶଙ୍କୁ କୌଣସି ଧାରୁଆ ଅସ୍ତ୍ରରେ ହାଣି ହତ୍ୟା କରାଯାଇଛି। ପୋଷ୍ଟମର୍ଟମ ରିପୋର୍ଟ ଆସିଲା ପରେ ମୃତ୍ୟୁର କାରଣ ଜଣା ପଡିବ। କିଏ ଓ କାହିଁକି ବିକାଶଙ୍କୁ ହତ୍ୟା କରିଛି ତାହା ଜଣା ପଡିନାହିଁ। ମୃତକଙ୍କ ପରିବାର ପକ୍ଷରୁ ଏତଲା ଦିଆଯାଇଛି। ମାମଲାର ଛାନଭିନ୍ ଚାଲିଛି। ଖୁବଶୀଘ୍ର ଅଭିଯୁକ୍ତଙ୍କୁ ଧରାଯିବ ବୋଲି ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି। 

ଅନ୍ୟପଟେ, ଗଞ୍ଜାମ ଏସ୍‌ପି ଅଫିସ ଆଗରେ ଆତ୍ମାହୁତି ଉଦ୍ୟମ କରିଥିବା ଯୁବକ ବାଦଲ ସାହୁଙ୍କ ମୃତ୍ୟୁ ହୋଇଛି। ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ଶନିବାର ଦେହରେ ପେଟ୍ରୋଲ ଢାଳି ବାଦଲ ସାହୁ ନିଆଁ ଲଗାଇଥିଲେ। ଗୁରୁତର ଅବସ୍ଥାରେ ତାଙ୍କୁ ବ୍ରହ୍ମପୁରରୁ ଭୁବନେଶ୍ୱର ସ୍ଥାନାନ୍ତର କରାଯାଇଥିଲା। ବାଦଲ ସାହୁଙ୍କ ଘର ଛତ୍ରପୁର ବୋରିଗାଁରେ ବୋଲି ଜଣାପଡିଛି।