ସ୍କୁଲ ସାମଗ୍ରୀ ଚୋରି ଅଭିଯୋଗରେ ପ୍ରଧାନଶିକ୍ଷକଙ୍କୁ ଘେରିଲେ ଗ୍ରାମବାସୀ

ମୋହନା: ବନ୍ଦ ବିଦ୍ୟାଳୟରେ ଥିବା ସମାଗ୍ରୀକୁ ପ୍ରଧାନ ଶିକ୍ଷକ ଅନ୍ୟତ୍ର ନେଇଯାଉଥିବା ବେଳେ ଗ୍ରାମବାସୀଙ୍କ ହାତରେ ଧରାପଡ଼ି ହଟହଟା ହୋଇଛନ୍ତି। ଏଭଳି ଘଟଣା ଘଟିଛି ଆର। ଉଦୟଗିରି ବ୍ଳକର ଅଞ୍ଜରବା ଗ୍ରାମର ପ୍ରାଥମିକ ବିଦ୍ୟାଳୟରେ । ଧରି ପଡ଼ିବା ପରେ ପ୍ରଧାନଶିକ୍ଷକଙ୍କୁ ଘଣ୍ଟା ଘଣ୍ଟା ଧରି ତାଲା ପକାଇ ଅଟକାଇ ରଖିଥିଲେ ଗ୍ରାମବାସୀ। ଫଳରେ ସେଠାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଥିଲା। ପ୍ରଧାନଶିକ୍ଷକଙ୍କୁ ଅଟକ ରଖିବା ପରେ ଗ୍ରାମବାସୀମାନେ ସରକାରୀ ଅଧିକାରୀମାନଙ୍କୁ ଖବର ଦେଇଥିଲେ ମାତ୍ର କୌଣସି ଅଧିକାରୀ ନ ଆସିବାରୁ ଆଇନକୁ ହାତକୁ ନ ନେଇ ପ୍ରଧାନଶିକ୍ଷକଙ୍କୁ ଛାଡ଼ିଦେଇଥିବା ଜଣାପଡ଼ିଛି। 

ମିଳିଥିବା ସୂଚନା ମୁତାବକ ଅଟକ ଥିବା ପ୍ରଧାନ ଶିକ୍ଷକ ହରିକୃଷ୍ଣ ରଇତ ଗ୍ରାମବାସୀଙ୍କ ଅଜାଣତରେ ବିଦ୍ୟାଳୟରେ ରଖାଯାଇଥିବା ସାମଗ୍ରୀକୁ ଚୋରି କରି ନେବାକୁ ଉଦ୍ୟମ କରିଥିଲେ। ମାତ୍ର ଏନେଇ ଖବର ପାଇବା ପରେ ସ୍କୁଲ ନିକଟରେ ଗ୍ରାମବାସୀମାନେ ଠୁଳ ହୋଇଥିଲେ। ଏହା ସହିତ ହରିକୃଷ୍ଣଙ୍କୁ ତାଲା ପକାଇ ଦେଇଥିଲେ ଗ୍ରାମବାସୀ । ବିଦ୍ୟାଳୟରେ ବ୍ୟବହୃତ ଟିଏଲଏମ ବ୍ଲାକବୋର୍ଡ, ସମେତ ରୋଷେଇ ସାମଗ୍ରୀକୁ ଜବତ କରିବା ସହ କବାଟରେ ହିସାବ ଦିଅ ବୋଲି ଲେଖି ପ୍ରଧାନଶିକ୍ଷକଙ୍କ ଠାରୁ ଜବାବ ତଲବ କରିଥିଲେ ଗ୍ରାମବାସୀ । 

ଶିକ୍ଷକଙ୍କୁ ତାଲା ପକାଇବା ସମ୍ପର୍କରେ ବିଭାଗୀୟ ଅଧିକାରୀଙ୍କୁ ଅବଗତ କରିଥିଲା କିନ୍ତୁ କୌଣସି ବିଭାଗୀୟ ପଦାଧିକାରୀ କିମ୍ବା କର୍ମଚାରୀ ଘଟଣା ସ୍ଥଳକୁ ଆସିନଥିଲେ। ଫଳରେ ଶିକ୍ଷକଙ୍କୁ ଚେତାବନୀ ଦେବା ସହ ମାନବିକତାର ପାଠ ପଢାଇ ମୁକ୍ତ କଲେ ଗ୍ରାମବାସୀ । ଗ୍ରାମବାସୀଙ୍କ ଅଭିଯୋଗ ପ୍ରକାରେ ବିଦ୍ୟାଳୟଟି ୧୯୯୩ ମସିହାରେ ସ୍ଥାପିତ ହୋଇଥିଲା। ନିଯୁକ୍ତ ଶିକ୍ଷକ ଭଲଭାବେ ବିଦ୍ୟାଳୟ ନ ଆସିବା ହେତୁ ଶ୍ରେଣୀ ଗୃହ ଓ ପାଚେରୀ ଭାଙ୍ଗିବା ସଙ୍ଗେ କ୍ରମଶଃ ପିଲା ସଂଖ୍ୟା କମିବାରେ ଲାଗିଥିଲା। 

ଯାହା ଫଳରେ ସରକାର ଉକ୍ତ ବିଦ୍ୟାଳୟକୁ ବନ୍ଦ କରିଦେଉଥିବା ଗ୍ରାମବାସୀ ଜାଣିବାକୁ ପାଇଥିଲେ।  ଏହାର ପ୍ରତିବାଦ କରି ଅନେକ ଥର ବଡ ବଡ ବିଭାଗୀୟ ଅଧିକାରୀଙ୍କୁ ପତ୍ର ମାଧ୍ୟମରେ ଜଣାଇ ଆସିଥିଲେ। ଉକ୍ତ ବିଦ୍ୟାଳୟ ବନ୍ଦ ହେଲେ ବଣ ପାହାଡିଆ ରାସ୍ତାରେ କୁନି କୁନି ପିଲାଏ ଦୀର୍ଘ ପାଞ୍ଚ କିମି ଦୁର ଯିବା କଷ୍ଟସାଧ୍ୟ ହେବା ସହ ବିପଦପୂର୍ଣ୍ଣ ବୋଲି କହିଛନ୍ତି ଗ୍ରାମବାସୀ। ତେବେ ମାସ ମାସ ଧରି ଆସୁନଥିବା ବିଦ୍ୟାଳୟର ପ୍ରଧାନ ଶିକ୍ଷକ ଗତକାଲି ସଂଧ୍ୟାରେ ଗ୍ରାମରେ ପହଞ୍ଚିଥିଲେ। 

ସକାଳୁ ସକାଳୁ ବିଦ୍ୟାଳୟର ସାମଗ୍ରୀକୁ ଅନ୍ୟତ୍ର ନେବାକୁ ବିଦ୍ୟାଳୟ ବାରଣ୍ଡାରେ ରଖିଥିବା ବେଳେ ଏସଏମସି କମିଟି ଓ ଗ୍ରାମବାସୀ  କୌଣସି ପ୍ରକାରେ ଜାଣି ଅସନ୍ତୋଷ ପ୍ରକାଶ କରିଥିଲେ ଏବଂ ତାଲା ପକାଇ ଲଖିଥିଲେ। ତେବେ ଆଗକୁ ଏହି ବିଦ୍ୟାଳୟ ବନ୍ଦ ନକରିବାକୁ ସରକାରଙ୍କୁ ନିବେଦନ କରିଛନ୍ତି ଗ୍ରାମବାସୀ। ଯଦି ବନ୍ଦ ହେଲେ ବଡ ଧରଣର ଆନ୍ଦୋଳନକୁ ଓହ୍ଲାଇବେ ବୋଲି ପ୍ରକାଶ କରିଛନ୍ତି ଗ୍ରାମବାସୀ। ଘଟଣାସ୍ଥଳରେ ଆର। ଉଦୟଗିରି ଜିଲ୍ଲା ପରିଷଦ ମଧ୍ୟ ପହଞ୍ଚି ଗ୍ରାମବାସୀଙ୍କ କଥାକୁ ସମର୍ଥନ ଦେବା ସହ ଶିକ୍ଷା ବ୍ୟବସ୍ଥା ନୀତିକୁ ବିରୋଧ କରି ପ୍ରତିବାଦ କରିଥିଲେ। ଅପରପକ୍ଷେ ପ୍ରଧାନ ଶିକ୍ଷକ ଜଣକ ନିଜ ଦୋଷ ମାନିଥିବା ବେଳେ ବିଦ୍ୟାଳୟ ବନ୍ଦ ହୋଇଯିବା ହେତୁ ବିଇଓଙ୍କ ନିର୍ଦେଶରେ ସାମଗ୍ରୀକୁ ଅନ୍ୟ ସ୍ଥାନକୁ ନେଇଯାଉଥିବା କହିଛନ୍ତି।