ସିବିଆଇ, ଇଡି ଓ ଏନସିବି ପଞ୍ଝାରେ ଫସିବେ ରିୟା !

ବିକ୍ରମ ସାହୁ, ନୂଆଦିଲ୍ଲୀ: ଦିନ ଯେତିକି ଗଡ଼ୁଛି, ସୁଶାନ୍ତ ସିଂ ରାଜପୁତ (Sushant Singh Rajput) ମାମଲାର ରହସ୍ୟ ସେତିକି ଗମ୍ଭୀର ହେଉଛି । ତଦନ୍ତ କରିବାକୁ ସିବିଆଇ (CBI) କୁ 'ସୁପ୍ରିମ' ପାୱାର ମିଳିବା ପରେ ଏବେ ପ୍ରତି ମୁହୂର୍ତ୍ତରେ ନୂଆ ନୂଆ ତଥ୍ୟ ସାମ୍ନାକୁ ଆସୁଛି । ସିବିଆଇ (CBI), ଇଡି (ED) ଓ ଏନସିବି (NCB) ପଞ୍ଝା ମେଲାଇ ଛକି ବସିଛନ୍ତି । ଗୋଟିଏ ଦିନ ପୂର୍ବରୁ କେବେ ବି ଡ୍ରଗ୍ସ ସେବନ କରି ନ ଥିବା କହୁଥିବା ରିୟା ଚକ୍ରବର୍ତ୍ତୀଙ୍କ ଡିଲିଟେଡ୍ ହ୍ୱାଟ୍ସଆପ ଚାର୍ଟରୁ ଡ୍ରଗ୍ସ ଲିଙ୍କର ଗୁମର ଫିଟିଛି । 

ସିକ୍ରେଟ୍ ଡ୍ରଗ୍ସ ପ୍ଲାନ୍ ସହ ହାର୍ଡ ଡିସ୍କ (Hard Disk) ରୁ ଡାଟା ଡିଲିଟ୍ କରି ପ୍ରମାଣ ଲୁଚାଇବାକୁ ପ୍ରୟାସ କରିଥିବା ସୁନ୍ଦରୀ ନାୟିକା ରିୟା ଚକ୍ରବର୍ତ୍ତୀ (Reah Chakraborty) ଙ୍କ ଷଡ଼ଯନ୍ତ୍ରର ପର୍ଦ୍ଦାଫାସ ହୋଇଛି । ରିୟାଙ୍କ ମୋବାଇଲ ଫୋନରେ ଲୁଚି ରହିଛି ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ରହସ୍ୟ । ସୁଶାନ୍ତଙ୍କୁ ପ୍ରେମ (Love) ଜାଲରେ ଫସାଇ ତାଙ୍କର ଅର୍ଥ ହଡପ କରାଯାଇଛି । ଦୀର୍ଘ ଦିନ ଧରି ତାଙ୍କୁ ଖାଦ୍ୟ ଓ ପାନୀୟରେ ରିୟା ସ୍ଲୋ ପଏଜନ ଦେଇଥିବା ସୁଶାନ୍ତଙ୍କ ବାପା କେକେ ସିଂହ (K K Singh) ଅଭିଯୋଗ କରିବା ସହ NCB ରିୟାଙ୍କୁ ତୁରନ୍ତ ଗିରଫ କରିବାକୁ ଦାବି କରିଛନ୍ତି । ରିୟାଙ୍କ ଦୁଇଟି ମୋବାଇଲର କ୍ଲୋନ ପରେ ଡିଲିଟେଡ ଚାର୍ଟ ରିଟ୍ରିଭ ହୋଇସାରିଛି । 

ଯେଉଁଥିରେ ସୁଶାନ୍ତଙ୍କ ଟଙ୍କା ହଡ଼ପ ଓ ଡ୍ରଗ୍ସ କିଣା ପ୍ରସଙ୍ଗରେ ରିୟା, ସାମୁଏଲ ମିରିଣ୍ଡା (Samuel Miranda), ଦୀପେଶ ସାୱନ୍ତ (Dipesh Sawant), ଶୋଭିକ ଚକ୍ରବର୍ତ୍ତୀ (Souvik Chakraborty) ଓ ଜୟାଙ୍କ ସହ ଚାର୍ଟ କରିଥିବା ସ୍ପଷ୍ଟ ହୋଇଛି । ସୁଶାନ୍ତଙ୍କ ମୃତ୍ୟୁ ପାଇଁ ରିୟା ଚକ୍ରବର୍ତ୍ତୀଙ୍କୁ ଦାୟୀ କରିଛନ୍ତି ସୁଶାନ୍ତଙ୍କ ବାପା କୃଷ୍ଣ କିଶୋର । ଏବେ ରିୟାଙ୍କ ବିରୋଧରେ ତଥ୍ୟ ଓ ପ୍ରମାଣ ଯୋଗାଡ଼ କରିବା ପାଇଁ ସିବିଆଇ, ଇଡି ଓ ନାର୍କୋଟିକ୍ସ ତଦନ୍ତ ଜାରି ରହିଛି । ସେପଟେ ରିୟାଙ୍କ ବାପା ଇନ୍ଦ୍ରଜିତ ଚକ୍ରବର୍ତ୍ତୀଙ୍କୁ  ଗୁରୁବାର ଇଡି ପଚରାଉଚରା କରିଛି । ଡ୍ରଗ୍ସ (Drugs) ପ୍ରସଙ୍ଗରେ ରିୟାଙ୍କ ସମେତ ୫ ଜଣଙ୍କ ନାମରେ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (NCB) ମାମଲା ରୁଜୁ କରିବା ସହ ତଦନ୍ତ ଜାରି ରଖିଛି । 

ଗୁରୁବାର ସିବିଆଇ (CBI) ତଦନ୍ତର ସପ୍ତମ ଦିନରେ ରିୟାଙ୍କ ଭାଇ ଶୌଭିକ ଚକ୍ରବର୍ତ୍ତୀ, ସୁଶାନ୍ତଙ୍କ ବନ୍ଧୁ ସିଦ୍ଧାର୍ଥ ପିଠାନୀ (Sidharth Pithani), କୁକ ନିରଜ ସିଂହ (Niraj Singh) ଓ କେଶବ, ସିଏ (CA) ରଜତ ମେୱାତି (Rajat Mewati)ଙ୍କ ସହ ସୁଶାନ୍ତଙ୍କ ଘରର ୱାଚମ୍ୟାନଙ୍କୁ ଜେରା କରିଛି । ସୁଶାନ୍ତଙ୍କ ଏଟିଏମ କାର୍ଡର ପିନ ମଧ୍ୟ ରିୟାଙ୍କୁ ଜଣାଥିଲା ଓ ସେ ସୁଶାନ୍ତଙ୍କ ଆକାଉଣ୍ଟକୁ ବ୍ୟବହାର କରୁଥିବା ସିବିଆଇ ଓ ଇଡି ତଦନ୍ତରୁ ସ୍ପଷ୍ଟ ହୋଇସାରିଛି । ସେପଟେ ସୁଶାନ୍ତଙ୍କ ମୃତ୍ୟୁ ପରେ ନିଜ ଘରୁ ଫେରାର ହେବା ପୂର୍ବରୁ ରିୟା ଚକ୍ରବର୍ତ୍ତୀ ନିଜ ଲାପଟପ ଓ ଡେସ୍କଟପରୁ ଡାଟା ଡିଲିଟ କରିବା ସହ ହାର୍ଡ ଡିସ୍କକୁ ନଷ୍ଟ କରିଥିବା ଜଣାପଡ଼ିଛି । 

ସୁଶାନ୍ତଙ୍କ ହତ୍ୟା ପଛରେ ଥିବା ରିୟାଙ୍କ ଷଡ଼ଯନ୍ତ୍ର, ଯୋଜନାର ପର୍ଦ୍ଦାଫାସ ହୋଇସାରିଛି । ପ୍ରମାଣ ଲୁଚାଇବା ପାଇଁ ସବୁ ପ୍ରକାର ଉଦ୍ୟମ ସତ୍ତ୍ୱେ ସିବିଆଇ, ଇଡି ଓ NCB ଗୋଟିଏ ପରେ ଗୋଟିଏ ଶକ୍ତ ପ୍ରମାଣ ଯୋଗାଡ଼ କରିବାରେ ସଫଳ ହେଉଛନ୍ତି । ଯାହା ରିୟାଙ୍କୁ କାଠଗଡ଼ାକୁ ଟାଣି ନେବାକୁ ସମର୍ଥ ହୋଇପାରିବ । ଏବେ କେବଳ ରିୟା ଚକ୍ରବର୍ତ୍ତୀ ନିଜ ମୁହଁରେ ନିଜ ଅପରାଧ ସ୍ୱୀକାର ଓ ସିକ୍ରେଟ ପ୍ଲାନର ପର୍ଦ୍ଦାଫାସ କରିବାକୁ ଅପେକ୍ଷା କରିଛନ୍ତି ସୁଶାନ୍ତଙ୍କ ପରିବାର ଓ ପ୍ରଶଂସକ ।