ପ୍ରଥମ ଥର ପାଇଁ IND-WHO ମୁହାଁମୁହିଁ

ନୂଆଦିଲ୍ଲୀ: କୋରୋନା ମହାମାରୀ ଚିକିତ୍ସାକୁ ନେଇ ପ୍ରଥମ ଥର ପାଇଁ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (WHO)ର ପରାମର୍ଶକୁ ପ୍ରତ୍ୟାଖ୍ୟାନ କଲା ଭାରତ । WHOର ଅପାରଗତା ଯୋଗୁ ସମଗ୍ର ବିଶ୍ୱରେ କୋରୋନା ବ୍ୟାପିଛି । ଆମେରିକା ଭଳି ଅନେକ ଦେଶ ଏହି ସଙ୍ଗଠନ ଉପରେ ପ୍ରବଳ ବର୍ଷିଥିଲେ । ମାତ୍ର ସେହି ସମୟରେ ଭାରତ ନରମ ଥିଲା ।  କିନ୍ତୁ କୋରୋନା ମହାମାରୀର ଚିକିତ୍ସାକୁ ନେଇ WHO ଯେଉଁ ନୂଆ ପରାମର୍ଶ ଦେଇଛି, ତାକୁ ପ୍ରତ୍ୟାଖ୍ୟାନ କରିଦେଇଛନ୍ତି ଆମ ବୈଜ୍ଞାନିକ । 

Hydroxychloroquine ଉପରେ WHOର ପରାମର୍ଶକୁ ପ୍ରତ୍ୟାଖ୍ୟାନ

ଏବେ କୋରୋନା ଆକ୍ରାନ୍ତଙ୍କ ଚିକିତ୍ସା କ୍ଷେତ୍ରରେ Hydroxychloroquine ଔଷଧରେ ବ୍ୟବହାର ଅନେକ ଦେଶ କରୁଛନ୍ତି । ଆମେରିକା ତ ଏହି ଔଷଧର ବହୁ ଗୁଣଗାନ ମଧ୍ୟ କରିଛି । ମାତ୍ର WHO କୋରୋନା ଚିକିତ୍ସାରେ ଏହି ଔଷଧର ବ୍ୟବହାରକୁ ନେଇ ଆଶଙ୍କା ପ୍ରକାଶ କରିଛି । ଏହି ଔଷଧ କୋରୋନା ଭାଇରସ ଚିକିତ୍ସା ପାଇଁ ସୁରକ୍ଷିତ ନୁହେଁ ବୋଲି କହିଛି WHO । ମାତ୍ର ଏ କ୍ଷେତ୍ରରେ ସଙ୍ଗଠନର ପରାମର୍ଶକୁ ପ୍ରତ୍ୟାଖ୍ୟାନ କରିଛି ଭାରତ । ICMR କହିଛି, ଭାରତରେ ହୋଇଥିବା ଅଧ୍ୟୟନରେ Hydroxychloroquineର କୌଣସି କୁପ୍ରଭାବ ଦେଖିବାକୁ ମିଳିନାହିଁ । ସତର୍କତାମୂଳକ ଭାବେ ଏହାର ବ୍ୟବହାର କରାଯାଇପାରିବ । 

ଆଗରୁ ବଢ଼ିପାରେ ବିରୋଧ

ଆଗକୁ ଭାରତ ମଧ୍ୟ WHO ଉପରେ ବର୍ଷିପାରେ । କେନ୍ଦ୍ରୀୟ ସ୍ୱାସ୍ଥ୍ୟ ମନ୍ତ୍ରଣାଳୟର ଜଣେ ଅଧିକାରୀ କହିଛନ୍ତି, ଗତ ୫ ମାସ ହେଲା ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ଯେଉଁ ପରାମର୍ଶ ସବୁ ଦେଇଛି, ସେଥିମଧ୍ୟରୁ ଅନେକ ଭୁଲ ପ୍ରମାଣିତ ହୋଇଛି । ତେଣୁ ଭାରତ ଏବେ ଅନ୍ୟ କେଉଁ ସଙ୍ଗଠନର ପରାମର୍ଶ ମାନି କାମ କରିବା ଠିକ ହେବ ନାହିଁ । ତେଣୁ ନିଜସ୍ୱ ଢଙ୍ଗରେ ଚିକିତ୍ସା କରିବାକୁ ପଡ଼ିବ ।