 "ବଦଳିଯିବ ଅଫିସର ନିୟମ: କର୍ମଚାରୀଙ୍କୁ ସପ୍ତାହରେ ୪ ଦିନ କରିବାକୁ ପଡିବ କାମ, ୩ ଦିନ ମିଳିବ ଛୁଟି!")
ନୂଆଦିଲ୍ଲୀ: କର୍ମଚାରୀଙ୍କ ପାଇଁ ବଡ ଖବର ରହିଛି । କେନ୍ଦ୍ର ସରକାର (Central Govt) ଶ୍ରମ ଆଇନର ନିୟମ ପରିବର୍ତ୍ତନ କରିବାକୁ ଯାଉଛନ୍ତି । ନୂତନ ଆର୍ଥିକ ବର୍ଷ ୧ ଏପ୍ରିଲ ୨୦୨୧ରୁ ଆରମ୍ଭ ହେବ । ଏହା ସହିତ ଦେଶରେ ଶ୍ରମ ଆଇନ (Labour Law) ର ନିୟମରେ ମଧ୍ୟ ପରିବର୍ତ୍ତନ ଲାଗୁ ହୋଇଯିବ । ଯାହା ଅନ୍ତର୍ଗତ ୧୫ ମିନିଟରୁ ଅଧିକ କାର୍ଯ୍ୟ କରିବାକୁ ଓଭରଟାଇମ୍ (Overtime) ବୋଲି ବିବେଚନା କରାଯିବ । ଏଥିସହ କମ୍ପାନୀମାନଙ୍କୁ ନିଜ କର୍ମଚାରୀଙ୍କୁ ଦିଆଯାଉଥିବା CTC (କଷ୍ଟ ଟୁ କମ୍ପାନୀ) ରେ କିଛି ପରିବର୍ତ୍ତନ କରିବାକୁ ପଡିବ ।
ସପ୍ତାହରେ ୩ଟି ଛୁଟିର ପ୍ରସ୍ତାବ
ନୂତନ ଶ୍ରମ ଆଇନ ଅନୁଯାୟୀ, କର୍ମଚାରୀମାନଙ୍କୁ ସପ୍ତାହରେ ସର୍ବାଧିକ ୪୮ ଘଣ୍ଟା କାମ କରିବାକୁ ସୁବିଧା ମିଳିପାରେ । ପ୍ରସ୍ତାବ ଅନୁଯାୟୀ ଯଦି କୌଣସି କର୍ମଚାରୀ ଚାରି ଦିନରେ ୪୮ ଘଣ୍ଟା କାମ କରନ୍ତି, ତେବେ ତାଙ୍କୁ ସପ୍ତାହରେ ତିନିଟି ଛୁଟି ଦିଆଯାଇପାରେ । ତଥାପି, ଏଥିପାଇଁ କର୍ମଚାରୀଙ୍କୁ ତାଙ୍କର କାର୍ଯ୍ୟ ସମୟ ୮ରୁ ୧୨ ଘଣ୍ଟାକୁ ବୃଦ୍ଧି କରିବାକୁ ପଡିବ । ସେପଟେ ବର୍ତ୍ତମାନର ପ୍ରଚଳିତ ନିୟମ ଅନୁଯାୟୀ, କାର୍ଯ୍ୟ ସମୟ ୮ ଘଣ୍ଟା ରହିଛି ଏବଂ ସପ୍ତାହରେ ୬ ଦିନ କାମ କରିବାକୁ ପଡିଥାଏ ।
ବେସିକ ବେତନକୁ ୫୦ ପ୍ରତିଶତ ବୃଦ୍ଧି କରିବାକୁ ପଡିବ
ଶ୍ରମ ଆଇନ (Labour Law) ର ପରିବର୍ତ୍ତନ ଅନୁଯାୟୀ, କମ୍ପାନୀମାନଙ୍କୁ ସେମାନଙ୍କ ସିଟିସି (CTC) ତୁଳନାରେ କର୍ମଚାରୀଙ୍କ ବେସିକ ବେତନ (Basic Salary) ୫୦ ପ୍ରତିଶତ ଦେବାକୁ ପଡିବ । ବାସ୍ତବରେ ନୂତନ ନିୟମ ଅନୁଯାୟୀ ଜଣେ କର୍ମଚାରୀଙ୍କ ଭତ୍ତା ମୋଟ ବେତନର ୫୦ ପ୍ରତିଶତରୁ ଅଧିକ ହୋଇପାରିବ ନାହିଁ । ଏହାର ପ୍ରଭାବ ଏହା ହେବ ଯେ କର୍ମଚାରୀଙ୍କ ଦ୍ୱାରା ପ୍ରାପ୍ତ ଗ୍ରାଚ୍ୟୁଟି (Gratuity) ରେ ବୃଦ୍ଧି ଘଟିବ । ବୋନସ୍ (Bonus), ପେନସନ୍ ଏବଂ ପିଏଫ (PF) ଯୋଗଦାନ ସହିତ ହିଁ HRA, ଓଭରଟାଇମ୍ ଇତ୍ୟାଦିକୁ ଦରମା ବାହାରେ ରଖିବାକୁ ପଡିବ । ଏହି ପରିବର୍ତ୍ତନଗୁଡିକ ଯୋଗୁଁ ବର୍ତ୍ତମାନ ଏପ୍ରିଲ ୧ରୁ କର୍ମଚାରୀଙ୍କ ବେତନ ସଂରଚନାରେ ଏକ ବଡ ପରିବର୍ତ୍ତନ ଦେଖାଯିବ ।
୧୫ ମିନିଟ ଅଧିକ କାମ କଲେ ଧରାଯିବ ଓଭରଟାଇମ୍
ନୂତନ ଶ୍ରମ ନିୟମ ଅନୁଯାୟୀ, ଯଦି କର୍ମଚାରୀମାନେ ନିର୍ଦ୍ଧାରିତ ସମୟଠାରୁ ୧୫ ମିନିଟ୍ ଅଧିକ କାର୍ଯ୍ୟ କରନ୍ତି, ତେବେ ତାହାକୁ ଓଭରଟାଇମ ବୋଲି ଧରାଯିବ । ଅନ୍ୟପକ୍ଷେ ବର୍ତ୍ତମାନ ନିୟମ ଅନୁଯାୟୀ, କର୍ମଚାରୀମାନେ ନିର୍ଦ୍ଧାରିତ ସମୟଠାରୁ ଅଧ ଘଣ୍ଟାରୁ ଅଧିକ କାର୍ଯ୍ୟ କଲେ ଓଭରଟାଇମ୍ ବୋଲି ଧରାଯାଏ । ଯାହା ବର୍ତ୍ତମାନ ୧୫ ମିନିଟକୁ ହ୍ରାସ କରାଯାଇଛି ।
)