ଉଇଘୁର ମୁସଲିମଙ୍କ ପ୍ରତି ବଦଳିଲାନି ଆଭିମୁଖ୍ୟ, ୧୬ ହଜାର ମସଜିଦକୁ ମାଟିରେ ମିଶାଇଦେଲେ ଚୀନ ସରକାର

ବେଜିଂ: ଦେଶରେ ଜିନଜିଆଙ୍ଗ ପ୍ରଦେଶ (Xinjiang Province) ରେ ଚୀନ ସରକାର (China Govt) ଙ୍କ ପକ୍ଷରୁ ଜାରି ରହିଥିବା ଉଇଘୁର ମୁସଲିମ (Uighur Muslims) ଦମନ ଅଭିଯାନ ଥମିବାର ନାଁ ନେଉନାହିଁ । ଏ ପ୍ରସଙ୍ଗରେ ଏକ ଅଷ୍ଟ୍ରେଲୀୟ ଥିଙ୍କ ଟ୍ୟାଙ୍କ (Australlian Think Tank) ପକ୍ଷରୁ କୁହାଯାଇଛି ମାନବାଧିକାରର ଉଲ୍ଲଂଘନ କରି ଚୀନ୍ କର୍ତ୍ତୃପକ୍ଷ ସେଠାରେ ହଜାର ହଜାର ମସଜିଦ ଭାଙ୍ଗି ଦେଇଛନ୍ତି ।  

ଏନେଇ କୁହାଯାଇଛି ଧାର୍ମିକ କାର୍ଯ୍ୟକଳାପ ଛାଡିବା ଲାଗି ଦେଶର ଉତ୍ତର-ପଶ୍ଚିମ ଅଞ୍ଚଳରେ ଅବସ୍ଥିତ ଶିବିରରେ ରହୁଥିବା ୧୦ ଲକ୍ଷରୁ ଅଧିକ ଉଇଘୁର ଏବଂ ଅନ୍ୟାନ୍ୟ ତୁର୍କୀ ଭାଷାଭାଷୀ ମୁସଲମାନଙ୍କ ଉପରେ ଚାପ ପ୍ରୟୋଗ କରାଯାଉଛି । ଶହ ଶହ ପବିତ୍ର ସ୍ଥାନର ଉପଗ୍ରହ ଚିତ୍ର ଏବଂ ପରିସଂଖ୍ୟାନ ମଡେଲିଂ ଉପରେ ଆଧାରିତ ଅଷ୍ଟ୍ରେଲିୟ ଷ୍ଟ୍ରାଟେଜିକ୍ ପଲିସି ଇନଷ୍ଟିଚ୍ୟୁଟ୍ (ASPI) ରିପୋର୍ଟ ଅନୁସାରେ ପ୍ରାୟ ୧୬ ହଜାର ମସଜିଦ (Mosque) କୁ ଚୀନ ସରକାର ମାଟିରେ ମିଶାଇ ଦେଇଛନ୍ତି । ଯାହାର ବର୍ତ୍ତମାନ କୌଣସି ଚିହ୍ନବର୍ଣ୍ଣ ନାହିଁ । 

ଏହି ରିପୋର୍ଟରେ କୁହାଯାଇଛି ଚୀନ ବିଗତ ୩ ବର୍ଷ ମଧ୍ୟରେ ଏହି କାର୍ଯ୍ୟ କରିଛି । ଆନୁମାନିକ ପ୍ରାୟ ୮୫୦୦ ମସଜିଦକୁ ସମ୍ପୂର୍ଣ୍ଣ ଧ୍ୱଂସ କରିଦେଇଛି । ଉରୁମଚି ଏବଂ କାଶଗରର ସହରାଞ୍ଚଳ କେନ୍ଦ୍ର ବାହାରେ ଅଧିକ କ୍ଷୟକ୍ଷତି ହୋଇଛି। ଅନେକ ମସଜିଦ ଭାଙ୍ଗି ଦିଆଯାଇଥିଲା, ସେମାନଙ୍କର ଗମ୍ବୁଜ ଏବଂ ମିନାର ହଟାଯାଇଥିଲା । ପ୍ରାୟ ୧୫,୫୦୦ କ୍ଷତିଗ୍ରସ୍ତ ମସଜିଦ ଜିନଜିଆଙ୍ଗରେ ପରିତ୍ୟକ୍ତ ଅବସ୍ଥାରେ ପଡିରହିଥିବା ଅନୁମାନ କରାଯାଉଛି ।

ଷାଠିଏ ଦଶକରେ ଅର୍ଥାତ ୧୯୬୦ ମସିହାରେ ଚୀନରେ ହୋଇଥିବା ସାଂସ୍କୃତିକ ବିପ୍ଳବ (Cultural Revolution) ଦ୍ୱାରା ଆରମ୍ଭ ହୋଇଥିବା ସଂଘର୍ଷ ପର ଠାରୁ ଏହି ଅଞ୍ଚଳରେ ମୁସଲମାନଙ୍କ ସ୍ଥିତି ବିଗିଡିବାରେ ଲାଗିଛି । ଗତ ବର୍ଷ ହୋଇଥିବା ଏକ ଅନୁସନ୍ଧାନରୁ ଜଣାପଡିଛି ଏହି ଅଞ୍ଚଳରେ ଅନେକ କବ୍ରିସ୍ଥାନ (Grave Yard) ଅର୍ଥାତ ଶ୍ମଶାନକୁ ନଷ୍ଟ କରି ଦିଆଯାଇଛି।

ଏହି ରିପୋର୍ଟ ଆସିବା ପରେ ଚୀନ୍ ପକ୍ଷରୁ କୁହାଯାଇଛି ଜିନଜିଆଙ୍ଗ ବାସିନ୍ଦା ସମ୍ପୂର୍ଣ୍ଣ ଧାର୍ମିକ ସ୍ୱାଧୀନତା ପାଇଛନ୍ତି । ଏ ବାବଦରେ ଚୀନ୍ ବୈଦେଶିକ ମନ୍ତ୍ରଣାଳୟ (Chinese Forerign Ministry) କହିଛି ଯେ ଏହାର କୌଣସି ପ୍ରମାଣ ନାହିଁ । ଚୀନ୍ ବିରୋଧି ରିପୋର୍ଟ ପ୍ରସ୍ତୁତ କରାଯାଉଛି । ମନ୍ତ୍ରଣାଳୟର ମୁଖପାତ୍ର ୱାଙ୍ଗ ୱେନବିନ କହିଛନ୍ତି ଜିନଜିଆଙ୍ଗ ପ୍ରଦେଶରେ ପ୍ରାୟ ୨୪ ହଜାର ମସଜିଦ ରହିଛି ।