Road Accident: ଛାତିଥରା ଦୁର୍ଘଟଣା, ଜଳିଗଲା କାର୍, ଗୋଟିଏ ପରିବାରର ୭ ମୃତ

Road Accident: ଏମିତିବି ଆସେ ମୃତ୍ୟୁ । କେହି କିଛି ଭାବିବା ପୂର୍ବରୁ ଓଲଟ ପାଲଟ ହୋଇଗଲା ସବୁ କିଛି । କ୍ଷଣିକ ମଧ୍ୟରେ ଚୁନମାର ହୋଇଗଲା ସବୁକିଛି । ଭୟଙ୍କର ଦୁର୍ଘଟଣାରେ ୭ ଜଣଙ୍କର ମୃତ୍ୟୁ ହୋଇଥିବା ବେଳେ ଏକାଧିକ ଆହତ ହୋଇଛନ୍ତି । ସମସ୍ତ ଆହତଙ୍କୁ ମେଡିକାଲରେ ଭର୍ତ୍ତି କରାଯାଇଛି। ସମସ୍ତ ମୃତକ ଗୋଟିଏ ପରିବାରର ହୋଇଥିବା ସୂଚନା ମିଳିଛି। ମୃତକଙ୍କ ମଧ୍ୟରେ ଦୁଇ ଜଣ ଶିଶୁ ରହିଛନ୍ତି । ସେମାନଙ୍କ ବୟସ ୪ ବର୍ଷ । ରାଜସ୍ଥାନର ଚୁରୁ-ସାଲାସାର ଜାତୀୟ ରାଜପଥରେ ଏହି ଦୁର୍ଘଟଣା ଘଟିଛି (Churu-Salasar state highway in Rajasthan)। କାରକୁ ଏକ ଟ୍ରକ୍ ଧକ୍କା ଦେବାରୁ ଘଟଣାସ୍ଥଳରେ କାରଟି ଜଳି ଯାଇଥିଲା। ଏବଂ କାରରେ ଥିବା ଲୋକେ ଜୀବନ୍ତ ଦଗ୍ଧ ହୋଇ ଯାଇଥିଲେ। ପୋଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।

ସୂଚନା ଅନୁସାରେ,ଗତକାଲି ଉତ୍ତରପ୍ରଦେଶ ମିରଟର ଏକ ପରିବାରର ୯ ଜଣ ସଦସ୍ୟ ଏକ କାର ଯୋଗେ ରାଜସ୍ଥାନରେ ଥିବା (Salasar Balaji temple ) ସାଲାସାର୍ ବାଲାଜି ମନ୍ଦିରକୁ ଯାଇଥିଲେ। ଏବଂ ମନ୍ଦିରରୁ ଦର୍ଶନ ସାରି ଫେରୁଥିଲେ। କିନ୍ତୁ ଫେରିବା ବାଟରେ ଗାଡିଟି ନିୟନ୍ତ୍ରଣ ହରାଇ  ଚୁରୁ-ସାଲାସାର ଜାତୀୟ ରାଜପଥରେ ଏକ ଟ୍ରକକୁ ଧକ୍କା ଦେଇଥିଲା।  ଫଳରେ କାରଟି ଜଳି ଯାଇଥିଲା। ଆଉ କାର ମଧ୍ୟରେ ଥିବା ୭ ଜଣ ଜୀଅନ୍ତା ଜଳି ଯାଇଥିଲେ। ଏହା ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ପୋଲିସ୍ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିବା ସହ ୨ ଆହତଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଛି । ଏବଂ ୭ ଜଣଙ୍କ ମୃତଦେହକୁ ଉଦ୍ଧାର କରି ପୋଷ୍ଟ ମଟମ୍ ପାଇଁ ପଠାଇଛି।   ଅଗ୍ନିଶମ ବାହୀନି ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି । କିଭଳି ସ୍ଥିତିରେ ଏହି ଅଗ୍ନିକାଣ୍ତ ଘଟିଲା ସେନେଇ ଛାନଭିନ୍ ଚଳାଇଛି।   ମୃତକମାନେ ହେଉଛନ୍ତି, ନୀଲମ ଗୋୟଲ, ଆଶୁତୋଷ ଗୋୟଲ, ମଞ୍ଜୁ ବିନ୍ଦଲ, ହାର୍ଦ୍ଦିକ ବିନ୍ଦଲ, ସ୍ବାତୀ ବିନ୍ଦଲ, ଦିଶା ଓ ଆୟୁଷ(୪ ଚାରି ବର୍ଷର ଶିଶୁ)।

ନିକଟରେ ଏଭଳି ଏକ ଦୁର୍ଘଟଣା ଦେଖିବାକୁ ମିଳିଥିଲା  ଜମ୍ମୁ କାଶ୍ମୀରରରେ। ଦୋହା ଜିଲ୍ଲା (Thathri)ର ଏକ ପରିବାରର ୯ ଜଣ ସଦସ୍ୟ ଶନିବାର ସନ୍ଧ୍ୟା ସମୟରେ ଗୋଟିଏ କାରରେ ଖାନପୁରା ଯାତ୍ରା କରୁଥିଲେ। ହଠାତ୍ କାରଟି ଭାରସାମ୍ୟ ହରାଇ ରାସ୍ତା କଡ଼କୁ ଓଲଟି ପଡିଥିଲା। ଏହି ଦୁର୍ଘଟଣାରେ ଘଟଣାସ୍ଥଳରେ ୫ ଜଣଙ୍କର ମୃତ୍ୟୁ ହୋଇଥିବା ବେଳେ ୪ ଜଣ ଗୁରୁତର ଭାବେ ଆହତ ହୋଇଥିଲେ। ଏହାଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ। ପୋଲିସ୍ ଘଟଣାସ୍ଥଳରେ ପହଞ୍ଚି ସମସ୍ତ ଆହତଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରାଯାଇଥିଲା।  ଏବଂ ମୃତଦେହ ଗୁଡିକୁ ପୋଷ୍ଟମଟମ୍ ପାଇଁ ପଠାଇଛି । ଏବଂ ଘଟଣାର ଛାନଭିନ୍ ଚଳାଇଛି।