କିଏ Twitterର ନୂଆ ମୁଖ୍ୟ Parag Agrawal? ଏହି ବଲିଉଡ ସିଙ୍ଗର ସହ ଅଛି ତାଙ୍କ ସମ୍ପର୍କ

ନୂଆଦିଲ୍ଲୀ: ପରାଗ ଅଗ୍ରୱାଲଙ୍କୁ ଟ୍ୱିଟରର ନୂତନ ସିଇଓ ଭାବରେ ନିଯୁକ୍ତ କରାଯାଇଛି। ସୋମବାର ଟ୍ୱିଟର ଏହା ଘୋଷଣା କରିଛି। କମ୍ପାନୀର ବିବୃତ୍ତି ଅନୁଯାୟୀ, ସର୍ବସମ୍ମତି କ୍ରମେ ପରାଗ ଅଗ୍ରୱାଲଙ୍କୁ କମ୍ପାନୀର ସିଇଓ ଏବଂ ବୋର୍ଡର ସଦସ୍ୟ ଭାବେ ତୁରନ୍ତ କାର୍ଯ୍ୟକାରୀ କରିବା ପାଇଁ ବୋର୍ଡ ଅଫ୍ ଡାଇରେକ୍ଟର୍ସ ଅନୁମୋଦନ କରିଛନ୍ତି।

ପରାଗ ଅଗ୍ରୱାଲ ଗତ ଦଶନ୍ଧି ଧରି ଟ୍ୱିଟର ସହିତ ଜଡିତ ଅଛନ୍ତି। ଏକ ସ୍ପେଶାଲ ସଫ୍ଟୱେୟାର ଇଞ୍ଜିନିୟର ଭାବରେ ଟ୍ୱିଟରରେ ଯୋଗ ଦେଇଥିଲେ ଏବଂ ପରେ ସେ ମୁଖ୍ୟ ପ୍ରଯୁକ୍ତିବିଦ୍ୟା ଅଧିକାରୀ ହେଲେ। ଟ୍ୱିଟର ପୂର୍ବରୁ ପରାଗ ଅଗ୍ରୱାଲ ମାଇକ୍ରୋସଫ୍ଟ, ୟାହୁ ଏବଂ ଏଟି ଆଣ୍ଡ ଟି ଲ୍ୟାବ ସହିତ କାମ କରିଛନ୍ତି। ପରାଗ ଅଗ୍ରୱାଲ, ଆଇଆଇଟି ବମ୍ବେରୁ କମ୍ପ୍ୟୁଟର ସାଇନ୍ସ ଏବଂ ଇଞ୍ଜିନିୟରିଂରେ ବି ଟେକ୍ ଅଧ୍ୟୟନ କରିଥିଲେ ଏବଂ ଷ୍ଟାନଫୋର୍ଡ ୟୁନିଭରସିଟିରୁ ପିଏଚଡି ସମାପ୍ତ କରିଥିଲେ।

୧. ପରାଗ ଅଗ୍ରୱାଲ ଭାରତୀୟ ବଂଶଦ୍ଭବ ସିଲିକନ୍ ଭ୍ୟାଲି ସିଇଓଙ୍କ ଏକ ଗୋଷ୍ଠୀରେ ସାମିଲ ହୋଇଛନ୍ତି। ଏହି ଗୋଷ୍ଠୀରେ ସୁନ୍ଦର ପିଚାଇ ଏବଂ ସତ୍ୟ ନାଡେଲା ଭଳି ନାମ ଅନ୍ତର୍ଭୁକ୍ତ। ପରାଗ ଜଣେ ଭଦ୍ର, ମେଳାପି ଏବଂ ମୃଦୁଭାଷି ବ୍ୟକ୍ତି। ସେ ପରମାଣୁ ଶକ୍ତି କେନ୍ଦ୍ରୀୟ ବିଦ୍ୟାଳୟରୁ ତାଙ୍କ ସ୍କୁଲ ପାଠପଢା ଶେଷ କରିଥିଲେ।

୨. ଦଶ ବର୍ଷ ଟ୍ୱିଟର ଇଞ୍ଜିନିୟରିଂ ବିଭାଗରେ କାମ କରିବା ପରେ ପରାଗ କମ୍ପାନୀର ଶୀର୍ଷ ଚେୟାରକୁ ଉଠିଛନ୍ତି। ପରାଗ ଟ୍ୱିଟରରେ ଯୋଗଦେବା ପୂର୍ବରୁ AT&T, ମାଇକ୍ରୋସଫ୍ଟ ଏବଂ ୟାହୁରେ ଇଣ୍ଟର୍ନସିପ୍ କରିଥିଲେ।

୩. ପରାଗ ଅଗ୍ରୱାଲ୍ ମଧ୍ୟ AI ଅର୍ଥାତ୍ ଆର୍ଟିଫିସିଆଲ୍ ଇଣ୍ଟେଲିଜେନ୍ସର ଏକ ମାହିର ଖେଳାଳି। ଟ୍ୱିଟରର ଟାଇମଲାଇନରେ ଟ୍ୱିଟର ପ୍ରାସଙ୍ଗିକତା ବଢାଇବା ପାଇଁ କୃତ୍ରିମ ବୁଦ୍ଧିମତା ବ୍ୟବହାର ଉପରେ ତାଙ୍କର ପ୍ରାରମ୍ଭିକ କାର୍ଯ୍ୟ ଭଲ ଭାବରେ ଗ୍ରହଣ କରାଯାଇଥିଲା।

୪. ବଲିଉଡର ଗାୟକ ଶ୍ରେୟା ଘୋଷାଲ ଟ୍ୱିଟରର ସିଇଓ ହୋଇଥିବାରୁ ପରାଗ ଅଗ୍ରୱାଲଙ୍କୁ ଅଭିନନ୍ଦନ ଜଣାଇଛନ୍ତି। ସେ ଟ୍ୱିଟରେ ଲେଖିଛନ୍ତି, 'ଅଭିନନ୍ଦନ ପରାଗ, ଆପଣଙ୍କ ପାଇଁ ଗର୍ବିତ! ଏହି ଖବର ପାଇ ଆମେ ଆନନ୍ଦିତ। ଆଜି ଆମ ପାଇଁ ବଡଡ ଦିନ।' ସୂଚନାଯୋଗ୍ୟ, ଶ୍ରେୟା ଘୋଷାଲ ଏବଂ ପରାଗ ଅଗ୍ରୱାଲ ପୁରୁଣା ବନ୍ଧୁ।