Borewell Accident: ବୋରୱେଲରୁ ଉଦ୍ଧାର ହେଲା ଦୁଇ ବର୍ଷର ଶିଶୁ

Borewell Accident: ନୂଆଦିଲ୍ଲୀ: ରାଜସ୍ଥାନର ଦୌସା ଜିଲ୍ଲାର ଯୋଧପୁରିଆ ଗ୍ରାମରେ ଏକ ବଡ଼ ଦୁର୍ଘଟଣାକୁ ଏଡାଇ ଦିଆଯାଇଥିଲା। ଅଢେଇ ବର୍ଷର ବାଳିକା ନିରୁ ଗୁରୁଜାର ବୋରୱେଲରେ ପଡ଼ି ଯାଇଥିଲେ। ୧୬ ଘଣ୍ଟା ପରିଶ୍ରମ ପରେ ତାଙ୍କୁ ଉଦ୍ଧାର କରାଯାଇଛି। ଝିଅଟିକୁ ସୁରକ୍ଷିତ ଦେଖିବା ପରେ ପରିବାର ଲୋକେ ଆଶ୍ୱସ୍ତି ଲାଭ କରିଛନ୍ତି। ବୁଧବାର ସନ୍ଧ୍ୟାରେ ଏହି ଘଟଣା ଘଟିଛି। ଖେଳିବା ସମୟରେ ନିରୁ ଏକ ବୋରୱେଲ ଗାତରେ ପଡ଼ିଯାଇଥିଲେ। ବର୍ଷା ହେତୁ ମାଟି ଧସିଥିବା ବେଳେ ନିରୁ ଭୁଲବସତଃ ଉକ୍ତ ନଳକୂପରେ ଖସି ପଡିଥିଲେ। ଝିଅଟି ପ୍ରାୟ ୩୦ ଫୁଟ ଗଭୀରରେ ଫସି ରହିଥିଲା।

ସୂଚନା ପାଇବା ମାତ୍ରେ ପ୍ରଶାସନ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। JCB ମେସିନ୍ ସହିତ ବୋରୱେଲ ସହିତ ସମାନ୍ତରାଳ ଭାବରେ ଖନନ କରାଯାଇଥିଲା। ଡାକ୍ତରୀ ଦଳ ଅମ୍ଳଜାନ ପାଇପଗୁଡ଼ିକୁ ବୋରୱେଲରେ ଓହ୍ଲାଇଦେଲେ ଯେପରି ଝିଅଟି ଶ୍ୱାସ ନେବାରେ ଅସୁବିଧାର ସମ୍ମୁଖୀନ ନହୁଏ। ଉଦ୍ଧାରକାରୀ ଦଳ ରାତିସାରା କାମ କରିଥିଲେ। ଗର୍ତ୍ତ ଚାରିପାଖରେ ଗଭୀର ଖନନ କରାଯାଇଥିଲା। ଗୁରୁବାର ସକାଳେ ପ୍ରାୟ ୨୦ ଫୁଟ ଲମ୍ବା ପାଇପ୍ ବୋରୱେଲରେ ଭର୍ତ୍ତି କରାଯାଇଥିଲା। ଏହି ପାଇପ୍ ପ୍ରାୟ ୧୬ ଫୁଟ ଭିତରକୁ ନିଆଯାଇଥିଲା। ଏହା ପରେ ଝିଅଟିକୁ ସୁରକ୍ଷିତ ଭାବେ ବାହାରକୁ ନିଆଯାଇଥିଲା।

ଏଠାରେ କହି ରଖୁ କି ଉଦ୍ଧାର କାର୍ଯ୍ୟ ରାତି ତମାମ ଜାରି ରହିଥିଲା। ଉଦ୍ଧାର କାର୍ଯ୍ୟରେ ୪ଟି ଜେସିବି ଏବଂ ଅନେକ ଟ୍ରାକ୍ଟର ନିୟୋଜିତ ହୋଇଥିଲେ।  ଆବର୍ଜନା ଓ ମାଟି ଉଠାଇବା କାର୍ଯ୍ୟ ଏବଂ ଉଦ୍ଧାର କାର୍ଯ୍ୟ ଆରମ୍ଭ ହେବା ପରେ ବର୍ଷା ବାଧକ ସାଜିଥିଲା। ମାତ୍ର କାମ ବନ୍ଦ ହୋଇନଥିଲା। ବୋରୱେଲକୁ ଟାର୍ପାଲିନ୍ ଦ୍ୱାରା ଆଚ୍ଛାଦିତ କରାଯାଇଥିଲା ଏବଂ ଉଦ୍ଧାରକାରୀ ଦଳ କାର୍ଯ୍ୟ ଜାରି ରଖିଥିଲେ। ବର୍ଷା ହେତୁ ଉଦ୍ଧାର କାର୍ଯ୍ୟରେ ସାମାନ୍ୟ ବିଳମ୍ବ ହୋଇଥିଲା କିନ୍ତୁ ଶେଷରେ ସଫଳତା ହାସଲ ହେଲା। ବିଳମ୍ବିତ ରାତି ପର୍ଯ୍ୟନ୍ତ SDRF ଏବଂ ସିଭିଲ୍ ଡିଫେନ୍ସ ଦଳ ଘଟଣାସ୍ଥଳରେ ରହିଥିଲେ। ଝିଅଟିକୁ ସୁରକ୍ଷିତ ଦେଖିବା ପରେ ପରିବାର ସଦସ୍ୟଙ୍କ ଖୁସିର କୌଣସି ସୀମା ନଥିଲା। ପ୍ରଶାସନ ଏବଂ ଉଦ୍ଧାରକାରୀ ଦଳକୁ ସେ କୃତଜ୍ଞତା ଜଣାଇଛନ୍ତି।