ଉନ୍ନାଓ ଗଣଦୁଷ୍କର୍ମ ମାମଲା: ଅଭିଯୁକ୍ତ ସେଙ୍ଗାରକୁ ଆଜୀବନ କାରାଦଣ୍ଡ

ଲକ୍ଷ୍ନୌ: ଉନ୍ନାଓ ଗଣଦୁଷ୍କର୍ମ ମାମଲାରେ ମୁଖ୍ୟ ଅଭିଯୁକ୍ତ ତଥା ଉନ୍ନାଓ ବିଧାୟକ କୁଲଦୀପ ସିଂହ ସେଙ୍ଗାରଙ୍କୁ ଆଜୀବନ କାରାଦଣ୍ଡ । ଆଜି ଏହି ଘଟଣାର ଶୁଣାଣି କରି ଦିଲ୍ଲୀର ତିସହଜାରୀ କୋର୍ଟ  ପୀଡ଼ିତାଙ୍କ ପରିବାରକୁ 25 ଲକ୍ଷ ଟଙ୍କାର କ୍ଷତିପୂରଣ ଦେବାକୁ ମଧ୍ୟ ଦଣ୍ଡାଦେଶରେ ଶୁଣାଇଛନ୍ତି । ଏହା ପୂର୍ବରୁ କୋର୍ଟରେ ଏହି ମାମଲାକୁ ନେଇ ବେଶ ଯୁକ୍ତିତର୍କ ହୋଇଥିଲା। ଯ଼ୁକ୍ତିତର୍କ ସମୟରେ ପୀଡ଼ିତାଙ୍କ ପରିବାର ସଦସ୍ୟ ସେଙ୍ଗାରଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିବାକୁ ଦାବି କରିଥିଲେ ।  ମାତ୍ର ଏହାକୁ ସେଙ୍ଗାରଙ୍କ ଓକିଲ ବିରୋଧ କରିଥିଲେ ।

ଶୁଣାଣି ସମୟରେ ଉଭୟ ପକ୍ଷର ଓକିଲ ମଝଭୁତ ଭାବେ ପକ୍ଷ ରଖିଥିଲେ । ପୀଡ଼ିତାଙ୍କୁ ପକ୍ଷରୁ ମାମଲା ଲଢୁଥିବା ଓକିଲ କହିଥିଲେ କି, କୁଲଦୀପ ଜଣେ ଜନନେତା । ସେ ବିଧାୟକ ରହିଛନ୍ତି । ସେ ତାଙ୍କ କ୍ଷମତାର ଭୁଲ ବ୍ୟବହାର କରିଛନ୍ତି । ଫଳରେ ତାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରାଯାଉ ବୋଲି ସେ ଦାବି ଉପସ୍ଥାପିତ କରିଥିଲେ ।

ଏହା ପୂର୍ବରୁ ବିଚାରପତି କହିଥିଲେ କି, ଘଟଣା ସମୟରେ ଯ଼େଉଁ ଧାରା ଆଧାରରେ ସେଙ୍ଗାରଙ୍କୁ ଦୋଷୀ ସାବ୍ୟସ୍ତ କରାଯାଇଥିଲେ, ସେହି ଧାରା ଅନୁଯାୟୀ ଅତି କମରେ 10 ବର୍ଷ ଏବଂ ସର୍ବାଧିକ ଆଜୀବନ କାରାଦଣ୍ଡରେ ଦଣ୍ଡିତ କରାଯିବାର ବ୍ୟବସ୍ଥା ରହିଛି । ସେପଟେ ଏଭଳି କ୍ଷେତ୍ରରେ ସେଙ୍ଗାରରୁ କଠିନରୁ କଠିନ ଦଣ୍ଡ ଦେବାର ଆବଶ୍ୟକତା ରହିଛି ବୋଲି ବିଚାରପତି କହିଥିଲେ।

ରାୟ ଶୁଣାଣି ବେଳେ କୋର୍ଟ କହିଥିଲେ କି, ବିଧାୟକ ଥିବା ସେଙ୍ଗାରଙ୍କ ବିରୋଧରେ ଲଢିବା ପାଇଁ ପୀଡ଼ିତା ସାହାସ ଯୁଟାଇ ପାରିନଥିଲେ । ପରବର୍ତ୍ତି ସମୟରେ ପୀଡ଼ିତା ମୁଖ୍ୟମନ୍ତ୍ରୀଙ୍କୁ ଘଟଣା ସମ୍ପର୍କରେ ଚିଠି ମାଧ୍ୟମରେ ଜଣାଇଥିଲେ । ପରେ ତାଙ୍କୁ ଅନେକ ପ୍ରକାର ସମସ୍ୟାର ସମ୍ମୁଖିନ ମଧ୍ୟ ହୋଇଥିଲେ । ସେହିପରି ସିବିଆଇ ଚାର୍ଜସିଟ ଦାଖଲ କରିବାରେ ବହୁ ବିଳମ୍ବ କରିବାରୁ ଘଟଣାର ଶୁଣାଣି ହେବାରେ ବିଳମ୍ବ ହୋଇଛି ବୋଲି କୋର୍ଟ କହିଛନ୍ତି । ସୂଚନାଯୋଗ୍ୟ ଘଟଣାର ପ୍ରାୟ ଏକ ବର୍ଷେ ପରେ ସେଙ୍ଗାରଙ୍କ ବିରୋଧରେ ମାମଲା ରୁଜୁ ହୋଇଥିଲା ।

ସୂଚନାଯୋଗ୍ୟ ଦୁଷ୍କର୍ମ ମାମଲାରେ ସେଙ୍ଗାରଙ୍କ ସମ୍ପୃକ୍ତି ଥିବା ନେଇ ଜଣାପଡ଼ିବା ପରେ ବିଜେପି ତାଙ୍କୁ ଦଳରୁ ବହିଷ୍କାର କରିଥିଲା । ସେହିଭଳି ଗତ 16 ତାରିଖରେ ଦିଲ୍ଲୀର ଏକ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଥିଲେ । ଉନ୍ନାଓ ଗଣଦୁଷ୍କର୍ମ ମାମଲାରେ ମୋଟ 5ଟି ମାମଲା ରୁଜୁ ହୋଇଥିବା ବେଳେ ଗୋଟିଏ ମାମଲାରେ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଥିଲେ । ଏହା ସହିତ ଚଳିତ ମାସ 19 ତାରିଖରେ ସେଙ୍ଗାରଙ୍କ ବିରୋଧରେ ଦଣ୍ଡାଦେଶ ଶୁଣାଇବେ ବୋଲି କୋର୍ଟ କହିଥିଲେ । ମାତ୍ର ତାହା ଆଜି ଅର୍ଥାତ 20 ତାରିଖକୁ ଘୁଞ୍ଚିଥିଲା ।