ବିଦ୍ୟୁତ ତାର ନେଲା ଜୀବନ...ଆଖି ଥାଇ ଅନ୍ଧ ପ୍ରଶାସନ, ସବୁ ଦେଖି ଚୁପ

ଆଖି ଥାଇ ଅନ୍ଧ ପ୍ରଶାସନ, ସବୁ ଦେଖି ଚୁପ

ସରୋଜ ବେହେରା, ଭୁବନେଶ୍ୱର: ରାଜଧାନୀରେ ବିଦ୍ୟୁତ ତାର ସହ ହେଉଛି ଖେଳ । ଭୁବନେଶ୍ୱରର ବିଭିନ୍ନ ଅଞ୍ଚଳ ଦେଇ ଯାଇଥିବା ଶହେ ୩୩ କେଭି କରେଣ୍ଟ ତଳେ ଘର ତିଆରି କରି ଶ୍ରମିକଙ୍କ ଜୀବନ ସହ ହେଉଛି ଖେଳ । ଯାହା ଫଳରେ ଭୁବନେଶ୍ୱରରେ ବାରମ୍ବାର ଘଟୁଛି ଦୁର୍ଘଟଣା । ଭୁବନେଶ୍ୱର ପଟିଆ ନିକଟ ଶିଶୁ ବିହାରରେ ରଙ୍ଗ ଲଗାଉଥିବା ବେଳେ ଜଣେ ରଙ୍ଗ ମିସ୍ତ୍ରୀଙ୍କ ମୃତ୍ୟୁ ଘଟିଛି । ମୃତକ ଜଣକ ହେଉଛନ୍ତି ଶୀଖରଚଣ୍ଡି ବସ୍ତିର ଲଲା । ତାଙ୍କୁ ସହଯୋଗ କରୁଥିବା ଜଣେ ଯୁବକ ମଧ୍ୟ ଗୁରୁତର ଆହତ ହୋଇଛନ୍ତି । ସବୁଠୁ ବଡ ପ୍ରଶ୍ନ ରହିଛି ପ୍ରଶାସନ ଆଖିରେ ଧୂଳି ଦେଇ ବେଆଇନ ଘର ତିଆରି ଚାଲିଥିବା ବେଳେ ବିଡିଏ ଓ ବିଦ୍ୟୁତ ବିଭାଗ ଅଧିକାରୀ କରୁଛନ୍ତି କଣ ।

ବିଦ୍ୟୁତ ତାର ସଂସ୍ପର୍ଶରେ ଆସି ରଙ୍ଗ ମିସ୍ତ୍ରୀଙ୍କ ଗଲା ଜୀବନ । ତାଙ୍କ ସହ ଥିବା ସହଯୋଗୀ ଗୁରୁତର ଆହତ । ଚିକିତ୍ସା ପାଇଁ ଆହତଙ୍କୁ ଘରୋଇ ହସ୍ପିଟାଲରେ ଭର୍ତି କରାଯାଇଛି । ମୃତକ ହେଉଛନ୍ତି ଶୀଖରଚଣ୍ଡି ବସ୍ତିର ଲଲା । ସୋମବାର ପ୍ରାୟ ୧୨ଟାରେ ସେ ରଙ୍ଗ ଦେବା ପାଇଁ ପଟିଆ ନିକଟ ଶିଶୁ ବିହାରରେ ରହୁଥିବା ରମେଶ କୁଣ୍ଡୁଙ୍କ ଘରକୁ ଯାଇଥିଲେ । ସେଠାରେ ରଙ୍ଗ ଦେବା ବେଳେ ଶହେ ୩୩ କେଭି ତାର ସଂସ୍ପର୍ଶରେ ଆସି ଯାଇଥିଲେ । ଘଟଣା ସ୍ଥଳରେ ତାଙ୍କ ମୃତ୍ୟୁ ଘଟିଥିଲା । ବିଦ୍ୟୁତ ଆଘାତ ଏତେ ଜୋର ଥିଲା ଯେ ଆଖ ପାଖ ଅନେକଙ୍କ ଘରେ ସର୍ଟ ସର୍କିଟ ହୋଇଯାଇଥିଲା । ଲୋକେ କିଛି ଭାବିବା ପୂର୍ବରୁ ପଦାକୁ ଆସି ଦେଖିବା ବେଳେ ଶ୍ରମିକଙ୍କ ଦେହରୁ ଧୂଆଁ ବାହାରୁ ଥିଲା । ଖବର ପାଇ ସ୍ଥାନୀୟ ଇନଫୋସିଟି ଥାନା ପୋଲିସ ଓ ଅଗ୍ନିଶମ ବିଭାଗ ଅଧିକାରୀ ପହଞ୍ଚିଥିଲେ । ହେଲେ ସେତେ ବେଳକୁ ଡେରି ହୋଇସାରିଥିଲା । ଘଟଣା ପରେ ସ୍ଥାନୀୟ ଲୋକଙ୍କ ମଧ୍ୟରେ ଭୟର ବାତାବରଣ ଦେଖା ଦେଇଛି ।

ଏହା ପ୍ରଥମ ଥର ନୁହଁ ସ୍ଥାନୀୟ ଅଂଚଳରେ ଏହା ପୂର୍ବରୁ ମଧ୍ୟ ଦୁଇ ଦୁଇଟି ଘଟଣାରେ ଶ୍ରମିକଙ୍କ ଜୀବନ ଯାଇ ସାରିଛି । ହେଲେ ବି ଲୋକଙ୍କ ମୁଣ୍ଡରେ ଚେତା ପଶୁନି । ସ୍ଥାନୀୟ ଲୋକଙ୍କ ଅଭଇଯୋଗ ବିଡିଏ କିମ୍ବା ବିଦ୍ୟୁତ ବିଭାଗର ବିନା ଅନୁମତିରେ ଅନେକ ଲୋକ ଟଙ୍କା ଲୋଭରେ ବେଆଇନ ଘର ତିଆରି କରିଚାଲିଛନ୍ତି । ଏଭଳି କି ଶହେ ୩୩ କେଭି ତାର ଯୋଗୁଁ ବାରମ୍ବାର ଏହି ଅଂଚଳରେ ବିଦ୍ୟୁତ ଅସୁବିଧା ଦେଖା ଦେଉଛି । ଏହା ସତ୍ୱେ ଲୋକେ ବେଆଇନ ଭାବେ ଦୁଇ ତିନି ମହଲା ଘର ତିଆରି କରିଚାଲିଛନ୍ତି । କେବେ ବି କୌଣସି ପ୍ରଶାସନିକ ଅଧିକାରୀ କେବେ ବି ଏହାର ତଦାରଖ କରିବାକୁ ଆସି ନ ଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।

ଉଚ୍ଚ ଶକ୍ତି ବିଶିଷ୍ଟ ବିଦ୍ୟୁତ ତାର ଯାଇଥିବା ରାସ୍ତାରେ ବିଡିଏ କିମ୍ବା ବିଦ୍ୟୁତ ବିଭାଗ ଘର କରିବାକୁ କେବେ ବି ଅନୁମତି ଦେଇ ନ ଥାଏ । ହେଲେ ଲୋକେ ଲୁଚା ଛପାରେ ସେଠାରେ ଘର ତିଆରି କରିଚାଲିଥାନ୍ତି । ଏଭଳି ପରିସ୍ଥିତିରେ ଆଇନ ଉଲ୍ଲଂଘନକାରୀଙ୍କ ବିରୋଧରେ କିଏ ପଦକ୍ଷେପ ନେବ । ଯଦି ପଦକ୍ଷେପ ନିଆ ନ ଯାଏ ତେବେ ପୂର୍ବ ପରି ଆହୁରି ଲୋକଙ୍କ ଜୀବନ ଯିବ ଆଉ ସେମାନଙ୍କ ଜୀବନ ଯିବା ପାଇଁ କିଏ ଦାୟୀ ରହିବେ ତାହା ହେଉଛି ବଡ ପ୍ରଶ୍ନ ।