ସିଏଏକୁ ନେଇ ଶିବରାଜଙ୍କ ବଡ ବୟାନ, ମୋଦିଙ୍କୁ କହିଲେ ଦ୍ୱିତୀୟ ଭଗବାନ

ସିଏଏକୁ ନେଇ ପ୍ରଧାନମନ୍ତ୍ରୀଙ୍କ ପ୍ରଶଂସାରେ ଶତମୁଖ ଶିବରାଜ

ନୂଆଦିଲ୍ଲୀ: ସିଏଏକୁ ନେଇ ଦେଶର ବିଭିନ୍ନ ସ୍ଥାନରେ ବିକ୍ଷୋଭ ହେଉଥିବା ବେଳେ ଏବେ ଏହି ଆଇନ ସପକ୍ଷରେ ଲୋକଙ୍କୁ ବୁଝାଉଛି ବିଜେପି । ବିଭିନ୍ନ ସ୍ଥାନରେ ସଚେତନତା କାର୍ଯ୍ୟକ୍ରମ କରାଯାଉଛି । ଦେଶର କୌଣସି ନାଗରିକଙ୍କ ପାଇଁ ସିଏଏ ସମସ୍ୟା ସୃଷ୍ଟି କରିବ ନାହିଁ, ଏଭଳି କିଛି ବାର୍ତ୍ତା ଦେବାକୁ ଦଳ ପକ୍ଷରୁ ଉଦ୍ୟମ ହେଉଛି । ଆଉ ଏହାରି ଭିତରେ ବଡ ବୟାନ ଦେଇଛନ୍ତି ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ । 

ଜୟପୁରରେ ଏକ କାର୍ଯ୍ୟକ୍ରମରେ ଯୋଗ ଦେଇ ଶିବରାଜ କହିଛନ୍ତି, ''ସିଏଏ ଦେଶର କୌଣସି ନାଗରିକଙ୍କ ପାଇଁ ପ୍ରତିବନ୍ଧକ ନୁହେଁ । ଧର୍ମୀୟ ଉତ୍ପୀଡନର ଶିକାର ହୋଇ ଭାରତକୁ ଚାଲି ଆସିଥିବା ଲୋକଙ୍କୁ ନାଗରିକତା ପ୍ରଦାନ ପାଇଁ ଏହି ଆଇନ ଉଦ୍ଦିଷ୍ଟ । ଆଉ ଏଭଳି ଲୋକଙ୍କ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭଗବାନ ସଦୃଶ୍ୟ । ଗୋଟିଏ ସମୟରେ ଏମାନେ ନର୍କ ଭଳି ଜୀବନ ଜୀଉଁଥିଲେ । ଭଗବାନ ଜୀବନ ଦେଇଥିଲେ, ମା' ବାପା ଜନ୍ମ ଦେଇଥିଲେ । ହେଲେ ମୋଦି ଏଭଳି ଲୋକମାନଙ୍କୁ ଜୀବଦାନ ଦେଇଛନ୍ତି ।''

Shivraj Singh Chouhan, BJP in Jaipur on #CitizenshipAmendmentAct: Narendra Modi inke liye bhagwan ban ke aaye hain jo pratadit the aur nark ki zindagi jee rahe the. Bhagwan ne jeewan diya, maa ne janam diya, lekin Narendra Modi ji ne fir se zindagi di hai. pic.twitter.com/mKnTryu6zb

— ANI (@ANI) December 23, 2019

କେନ୍ଦ୍ରମନ୍ତ୍ରୀ ନୀତିନ ଗଡକରୀ ମଧ୍ୟ ବଡ ବୟାନ ଦେଇଥିଲେ

ନାଗରିକତା ଆଇନକୁ ନେଇ କେନ୍ଦ୍ର ପରିବହନ ମନ୍ତ୍ରୀଙ୍କ ବଡ଼ ବୟାନ । ନାଗପୁରରେ ନାଗରିକତା ଆଇନ ସମର୍ଥନରେ ହୋଇଥିବା ରାଲିରେ ସାମିଲ ହୋଇ ହିନ୍ଦୁତ୍ୱ ପ୍ରସଙ୍ଗରେ ମତ ରଖିଥିଲେ  ଗଡକରୀ । ବିଶ୍ୱରେ ମୁସଲିମଙ୍କ ପାଇଁ ଶହେରୁ ଅଧିକ ଦେଶ ରହିଥିବା ବେଳେ ଭାରତ ବ୍ୟତୀତ ଅନ୍ୟ କେଉଁଠି ହିନ୍ଦୁଙ୍କ ପାଇଁ ସ୍ଥାନ ନାହିଁ ବୋଲି ସେ କହିଥିଲେ । ଏହାସହିତ ନାଗରିକତା ଆଇନକୁ ନେଇ ଲୋକଙ୍କୁ ଭ୍ରମିତ କରାଯାଉଥିବା ସେ ଅଭିଯୋଗ କରିଥିଲେ । ନୂଆ ଆଇନରେ ଦେଶବାସୀଙ୍କର କୌଣସି କ୍ଷତି ହେଉ ନ ଥିବା ବେଳେ କିଛି ନେତା ଏହାକୁ ନେଇ ମିଥ୍ୟା ଗୁଜବ ପ୍ରଚାର କରି ଅଶାନ୍ତି ସୃଷ୍ଟି କରୁଥିବା କହିଥିଲେ ଗଡକରୀ । 

ରବିବାର ବାଙ୍ଗାଲୁରୁରେ ମଧ୍ୟ ନାଗରିକତା ଆଇନ ସମର୍ଥନରେ ସଚେତନତା ଶୋଭାଯାତ୍ରା ଆୟୋଜିତ ହୋଇଥିଲା । ମହାରାଷ୍ଟ୍ରର ନାଗପୁରରେ ନାଗରିକତା ଆଇନ ସମର୍ଥନରେ ଲୋକାଧିକାର ମଞ୍ଚରେ ତ୍ରିରଙ୍ଗା ମାର୍ଚ୍ଚ । ଲୋକଙ୍କୁ ଆଇନ ସମ୍ବନ୍ଧରେ ସଚେତନ କରିବା ପାଇଁ ନାଗପୁରର ଯଶୋୱନ୍ତ ଷ୍ଟାଡିଅମରେ ଆୟୋଜିତ ରାଲିରେ ସାମିଲ ହୋଇଥିଲେ କେନ୍ଦ୍ର ପରିବହନ ମନ୍ତ୍ରୀ ନୀତିନ ଗଡକରୀ । ନାଗରିକତା ଆଇନ ଏବେ ଦେଶ ପାଇଁ ଜରୁରୀ ଥିଲା ବୋଲି ସେ କହିଥିଲେ । ଏହି ଆଇନ ଦେଶର ମୁସଲମାନଙ୍କ ବିରୋଧୀ ହୋଇ ନ ଥିଲେ ବି ସରକାର ବିରୋଧୀ ହିଂସାତ୍ମକ ରାଲି ହୋଇଥିବା ଦେଶ ପାଇଁ ଦୁର୍ଭାଗ୍ୟ ବୋଲି ଗଡକରୀ କହିଥିଲେ । 

ଆହୁରି ପଢନ୍ତୁ; ସୋରେନ ହେବେ ସିଏମ ! ମେଣ୍ଟ ସହଯୋଗୀ ଦେଲେ ସୂଚନା