କିଏ ଜିତିବେ ଉତ୍ତରାଖଣ୍ଡ, ବିଜେପି ନା କଂଗ୍ରେସ, ନା ଖେଳ ବିଗାଡ଼ିବ ଆପ୍? ଜାଣନ୍ତୁ ନିର୍ବାଚନ ପୂର୍ବରୁ କ'ଣ କହୁଛି ଏହି ସର୍ଭେ

ନୂଆଦିଲ୍ଲୀ: Uttarakhand Assembly Election 2022: ଚଳିତ ବର୍ଷ ପ୍ରାରମ୍ଭ ୫ଟି ରାଜ୍ୟରେ ବିଧାନସଭା ନିର୍ବାଚନ ହେବାର ଅଛି । ଏଭଳି ପରିସ୍ଥିତିରେ ସମସ୍ତ ରାଜନୈତିକ ଦଳ ଜୋରସରରେ ନିର୍ବାଚନ ପ୍ରଚାରରେ ଲାଗିଛନ୍ତି । ଏହି ସମୟରେ ବିଭିନ୍ନ ନିର୍ବାଚନୀ ସର୍ଭେ ଆସିବା ଆରମ୍ଭ ହୋଇସାରିଛି । ନିର୍ବାଚନ ପୂର୍ବରୁ ଏସବୁ ସର୍ଭେ ମାଧ୍ୟମରେ ଅନୁମାନ ଲଗାଯାଉଛି ଯେ କେଉଁ ଦଳ କ୍ଷମତାକୁ ଆସିବ ଓ କେଉଁ ଦଳକୁ କେତେ ଆସନ ମିଳିବ । ଏହି କ୍ରମରେ ଉତ୍ତରାଖଣ୍ଡ ବିଧାନସଭା ନିର୍ବାଚନ (Uttarakhand Assembly Polls 2022) ପୂର୍ବରୁ ଏକ ଜାତୀୟ ଗଣମାଧ୍ୟମ ସର୍ଭେ ନେଇଆସିଛି । ଆସନ୍ତୁ ଜାଣିବା ଏହି ସର୍ଭେ (Uttarakhand Opinion Poll) କ'ଣ କହୁଛି? ଉତ୍ତରାଖଣ୍ଡରେ କ'ଣ ପୁଣିଥରେ ବିଜେପି (BJP) କୁ କ୍ଷମତାକୁ ଫେରିବ ନା କଂଗ୍ରେସ (Congress) ହାତକୁ ଯିବ ଦେବଭୂମିର ଶାସନ ଡୋରି, ନା ଆମ ଆଦମୀ ପାର୍ଟି (AAP) ବିଗାଡ଼ିବ 'ପଦ୍ମ' ଓ 'ହାତ'ର ଖେଳ ।

ଏହି ସର୍ଭେ ଅନୁଯାୟୀ, ଉତ୍ତରାଖଣ୍ଡରେ ବିଜେପି ଜିତିବାର ସମ୍ଭାବନା ରହିଛି । ୭୦ଟି ବିଧାନସଭା ଆସନରୁ ବିଜେପି ୪୨ରୁ ୪୮ଟି ଆସନ ପାଇପାରେ । ଅନ୍ୟପଟେ କଂଗ୍ରେସକୁ ୧୨ରୁ ୧୬ଟି ଆସନ ମିଳିପାରେ । ଆମ୍ ଆଦମୀ ପାର୍ଟି ୪ରୁ ୭ଟି ଆସନ ପାଇବ ବୋଲି ଆଶା କରାଯାଉଛି । ଯଦି ଏହି ସର୍ବେକ୍ଷଣର ପୂର୍ବାନୁମାନ ସଠିକ୍ ହେବ ତ ବିଜେପିର ଆସନ ସଂଖ୍ୟା ପାଞ୍ଚ ବର୍ଷ ପୂର୍ବ ତୁଳନାରେ କମ୍ ହେବ, କିନ୍ତୁ ପାହାଡ଼ ରାଜ୍ୟରେ ବିଜେପିକୁ ଟକ୍କର ଦେଉଥିବା କଂଗ୍ରେସ ପାଇଁ ଏହା ଆଉ ପାଞ୍ଚ ବର୍ଷ କ୍ଷମତା ପାଇଁ ଅପେକ୍ଷା କରିବାକୁ ପଡ଼ିପାରେ । 

ଏହା ବି ପଢ଼ନ୍ତୁ:-ଦେଶରେ ବଢ଼ିଲା କୋରୋନା ସଙ୍କଟ: ଦିନକରେ ଚିହ୍ନଟ ହେଲା ୩୩ ହଜାରରୁ ଉର୍ଦ୍ଧ୍ୱ ମାମଲା, ଆଖି ବୁଜିଲେ ଏତିକି ସଂକ୍ରମିତ

ତଥାପି, ଏହା ହେଉଛି ସର୍ବେକ୍ଷଣର ଆକଳନ । ତେବେ ଦେବଭୂମି ଉତ୍ତରାଖଣ୍ଡରେ ବିଜେପି, କଂଗ୍ରେସ ଏବଂ ଆପ୍ ମଧ୍ୟରେ କଡ଼ା ପ୍ରତିଯୋଗିତା ଚାଲିଛି । ଏଭଳି ପରିସ୍ଥିତିରେ ନିର୍ବାଚନ ଫଳାଫଳ କାହା ସପକ୍ଷରେ ଆସେ ତାହା ଦେଖିବାକୁ ହେବ । ସେ ଯାହା ହେଉନା କାହିଁକି, ଏଥିରେ କୌଣସି ସନ୍ଦେହ ନାହିଁ ଯେ ଆମ୍ ଆଦମୀ ପାର୍ଟି ଧୀରେ ଧୀରେ କେବଳ ଦିଲ୍ଲୀରେ ନୁହେଁ ଅନ୍ୟ ରାଜ୍ୟରେ ମଧ୍ୟ ନିଜର ସ୍ଥିତିକୁ ମଜବୁତ କରୁଛି । ଚଣ୍ଡିଗଡ଼ ମ୍ୟୁନିସିପାଲିଟି କର୍ପୋରେସନ ନିର୍ବାଚନରେ ​​AAP ର ବିଜୟ ଏହି ଘଟଣାର ପ୍ରମାଣ ଦେଇଥାଏ ।