କ୍ରିକେଟ୍ ଜଗତରୁ ବିଦାୟ ନେଲେ ହରଭଜନ; ରାଜନୈତିକ ଫିଲ୍ଡରେ ଆରମ୍ଭ କରିବେ ନୂଆ ଇନିଂସ

ନୂଆଦିଲ୍ଲୀ: Harbhajan Singh Announces His Retirement; ଭାରତର ଷ୍ଟାର୍ ସ୍ପିନର ହରଭଜନ ସିଂ (Harbhajan Singh) କ୍ରିକେଟରୁ ଅବସର ଘୋଷଣା କରିଛନ୍ତି । ୪୧ ବର୍ଷୀୟ ହରଭଜନ ସିଂ ଭାରତ ପାଇଁ ୭୧୧ ୱିକେଟ୍ ନେଇଛନ୍ତି ।ସେ ରାଜନୈତିକ ଫିଲ୍ଡରେ ନିଜର ନୂଆ ଇନିଂସ ଆରମ୍ଭ କରିପାରନ୍ତି । ନିକଟରେ ପଞ୍ଜାବ କଂଗ୍ରେସ ଅଧ୍ୟକ୍ଷ ନବଜୋତ ସିଂ ସିଦ୍ଧୁଙ୍କ  (Navjot Singh Siddhu) ସହ ତାଙ୍କର ଏକ ଫଟୋ ଭାଇରାଲ ହୋଇଥିଲା । ପଞ୍ଜାବ ବିଧାନସଭା ନିର୍ବାଚନ ପୂର୍ବରୁ ହରଭଜନ କଂଗ୍ରେସରେ  (Congress) ଯୋଗ ଦେଇପାରନ୍ତି ବୋଲି ଖବର ରହିଛି ।

ଟ୍ୱିଟରରେ ଅବସର ଘୋଷଣା କରି ହରଭଜନ ସିଂ ଲେଖିଛନ୍ତି, "ସମସ୍ତ ଭଲ ଜିନିଷ ସମାପ୍ତ ହୋଇଛି ଏବଂ ଆଜି ମୁଁ କ୍ରୀଡାକୁ ବିଦାୟ ଦେଉଛି ଯାହା ମୋତେ ଜୀବନରେ ସବୁକିଛି ଦେଇଛି, ମୁଁ ସମସ୍ତଙ୍କୁ ଧନ୍ୟବାଦ ଦେବାକୁ ଚାହୁଁଛି ଯେଉଁମାନେ ଏହି ୨୩ ବର୍ଷର ଯାତ୍ରାକୁ ସୁନ୍ଦର ଏବଂ ସ୍ମରଣୀୟ କରିଛନ୍ତି । ଆପଣଙ୍କୁ ବହୁତ ଧନ୍ୟବାଦ ।"

ନୂତନ ଆଇପିଏଲ ଫ୍ରାଞ୍ଚାଇଜରେ ଯୋଗ ଦେଇପାରନ୍ତି ହରଭଜନ 
ଖବର ଆସୁଛି ଯେ ହରଭଜନ IPL ର ପରବର୍ତ୍ତୀ ସିଜିନରେ (IPL-2022) ଏକ ସପୋର୍ଟ ଷ୍ଟାଫ୍ ଭାବରେ ଏକ ବଡ ଫ୍ରାଞ୍ଚାଇଜ୍ ରେ ଯୋଗ ଦେଇପାରନ୍ତି । ଟିମ୍ ଇଣ୍ଡିଆ ପାଇଁ ଦୁଇଟି ବିଶ୍ୱକପ୍ ଜିତିଥିବା ଏହି ଷ୍ଟାର୍ ସ୍ପିନରଙ୍କୁ ପ୍ରାୟ 10 ବର୍ଷ ପୂର୍ବେ ପଞ୍ଜାବ ପୋଲିସ୍ ଡିଏସପି ପଦ ପ୍ରଦାନ କରିଥିଲା । ଯଦିଓ ସେ ଏହାକୁ କେବେ ଗ୍ରହଣ କରିନାହାଁନ୍ତି ।

ହରଭଜନ ସିଂଙ୍କ କ୍ୟାରିୟର ରହିଛି ଉଜ୍ଜ୍ୱଳ
୧୯୯୮ ରେ ଅଷ୍ଟ୍ରେଲିଆ ବିପକ୍ଷରେ ଭାରତ ପାଇଁ ହରଭଜନ ସିଂ ଟେଷ୍ଟ ଡେବ୍ୟୁ କରିଥିଲେ । ସେ ଭାରତ ପାଇଁ ୧୦୩ ଟି ଟେଷ୍ଟ ମ୍ୟାଚରେ ୪୧୭ ୱିକେଟ୍ ନେଇଥିଲେ । ଭଜୀ ମଧ୍ୟ ଦୁଇ ଶତକ ସହ ୨୨୩୫ ରନ୍ ସ୍କୋର କରିଛନ୍ତି । ୨୩୬ ଟି ODI ମ୍ୟାଚରେ ତାଙ୍କ ନାମରେ ୨୬୯ ୱିକେଟ୍ ଅଛି । ଟି-୨୦ ଇଣ୍ଟରନ୍ୟାସନାଲ ବିଷୟରେ କହିବାକୁ ଗଲେ ସେ ୨୮ ଟି ମ୍ୟାଚରେ ୨୫ ୱିକେଟ୍ ନେଇଛନ୍ତି । ଅନିଲ କୁମ୍ବଲେ (୬୧୯), କପିଲ ଦେବ (୪୩୪) ଏବଂ ରବିଚନ୍ଦ୍ରନ ଅଶ୍ୱିନ (୪୨୭) ଙ୍କ ପରେ ହରଭଜନ ସିଂ ଭାରତ ପାଇଁ ସର୍ବାଧିକ ଟେଷ୍ଟ ୱିକେଟ୍ ନେଇଛନ୍ତି । ଏହି ବୋଲରଙ୍କ ନାମରେ  ଆଇପିଏଲରେ ୧୫୦ ୱିକେଟ୍ ରହିଛି ।