ਹੁਣ 5 ਰੁਪਏ ਵਾਲੇ ਬਿਸਕੁਟ ਦੇ ਪੈਕੇਟ ਹੋ ਸਕਦੇ ਹਨ ਬੰਦ !

ਚੰਡੀਗੜ: ਹੁਣ ਕੰਪਨੀਆਂ ਵੀ ਮਹਿੰਗਾਈ ਦੀ ਮਾਰ ਝੱਲ ਰਹੀਆਂ ਹਨ। ਇਹੀ ਕਾਰਨ ਹੈ ਕਿ ਖਪਤਕਾਰ ਸਾਮਾਨ ਬਣਾਉਣ ਵਾਲੀਆਂ FMCG ਕੰਪਨੀਆਂ ਨੇ ਛੋਟੇ ਪੈਕੇਟਾਂ ਦਾ ਭਾਰ ਘਟਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਪਾਰਲੇ ਅਤੇ ਬ੍ਰਿਟਾਨੀਆ ਵਰਗੀਆਂ ਕੰਪਨੀਆਂ ਨੇ ਪੇਂਡੂ ਬਾਜ਼ਾਰ 'ਤੇ ਆਪਣੀ ਪਕੜ ਬਣਾਈ ਰੱਖਣ ਲਈ ਛੋਟੇ ਪੈਕੇਟਾਂ ਵਿਚ ਸਾਮਾਨ ਵੇਚਣ 'ਤੇ ਜ਼ਿਆਦਾ ਜ਼ੋਰ ਦਿੱਤਾ। ਛੋਟੀਆਂ ਪੈਕ ਕੀਤੀਆਂ ਵਸਤੂਆਂ ਦੀ ਕੁੱਲ ਵਿਕਰੀ ਦਾ 40 ਤੋਂ 50 ਪ੍ਰਤੀਸ਼ਤ ਹਿੱਸਾ ਹੈ।

ਤੇਜ਼ੀ ਨਾਲ ਵਧ ਰਹੀ ਥੋਕ ਕੀਮਤਾਂ

ਮਹਿੰਗਾਈ ਨਾ ਸਿਰਫ਼ ਘਰਾਂ ਦੀ ਖਰਚ ਸ਼ਕਤੀ ਨੂੰ ਘਟਾ ਰਹੀ ਹੈ ਸਗੋਂ ਕੰਪਨੀਆਂ ਵੀ ਪ੍ਰਭਾਵਿਤ ਹੋ ਰਹੀਆਂ ਹਨ। ਅਜਿਹਾ ਇਸ ਲਈ ਹੈ ਕਿਉਂਕਿ ਥੋਕ ਦੀਆਂ ਕੀਮਤਾਂ ਪ੍ਰਚੂਨ ਕੀਮਤਾਂ ਨਾਲੋਂ ਤੇਜ਼ੀ ਨਾਲ ਵੱਧ ਰਹੀਆਂ ਹਨ। ਉਦਾਹਰਣ ਦੇ ਤੌਰ 'ਤੇ ਸਾਲਾਨਾ ਆਧਾਰ 'ਤੇ ਮਾਰਚ ਤਿਮਾਹੀ 'ਚ ਖੰਡ ਦੀ ਕੀਮਤ 7 ਫੀਸਦੀ ਵਧੀ ਹੈ, ਜਦਕਿ ਕਾਜੂ ਦੀ ਕੀਮਤ 'ਚ 35 ਫੀਸਦੀ ਦਾ ਵਾਧਾ ਹੋਇਆ ਹੈ। ਇਸ ਤੋਂ ਇਲਾਵਾ ਪੈਕੇਜਿੰਗ ਦੀ ਲਾਗਤ ਵੀ ਵਧ ਗਈ ਹੈ। ਮਾਰਚ ਤਿਮਾਹੀ ਵਿੱਚ ਲੈਮੀਨੇਸ਼ਨ 20 ਫੀਸਦੀ ਮਹਿੰਗਾ ਹੋ ਗਿਆ ਹੈ। ਕੋਰੇਗੇਟਿਡ ਡੱਬਿਆਂ ਦੀ ਕੀਮਤ 21 ਫੀਸਦੀ ਵਧ ਗਈ ਹੈ। ਖਾਣ ਵਾਲੇ ਤੇਲ ਦੀਆਂ ਕੀਮਤਾਂ 'ਚ ਭਾਰੀ ਵਾਧਾ ਹੋਇਆ ਹੈ।

ਕੰਪਨੀ ਨੂੰ ਚਲਾਉਣ ਵਿੱਚ ਮੁਸ਼ਕਲ

ਪ੍ਰਿਆ ਗੋਲਡ ਬ੍ਰਾਂਡ ਦੇ ਤਹਿਤ ਬਿਸਕੁਟ ਵੇਚਣ ਵਾਲੀ ਕੰਪਨੀ ਸੂਰਿਆ ਫੂਡ ਐਂਡ ਐਗਰੋ ਦਾ ਕਹਿਣਾ ਹੈ ਕਿ ਮਹਿੰਗਾਈ ਕਾਰਨ ਕੰਪਨੀ ਦਾ ਕੰਮ ਚਲਾਉਣਾ ਮੁਸ਼ਕਲ ਹੋ ਰਿਹਾ ਹੈ। ਕੰਪਨੀ ਦੇ ਡਾਇਰੈਕਟਰ ਸ਼ੇਖਰ ਅਗਰਵਾਲ ਦਾ ਕਹਿਣਾ ਹੈ ਕਿ ਪਹਿਲਾਂ ਅਸੀਂ ਮਹਿੰਗਾਈ ਵਧਣ 'ਤੇ ਭਾਰ ਘੱਟ ਕਰਦੇ ਸੀ ਪਰ ਹੁਣ ਇਹ ਤਰੀਕਾ ਕੰਮ ਨਹੀਂ ਕਰ ਰਿਹਾ। ਅਸੀਂ 5 ਰੁਪਏ ਦੇ ਪੈਕੇਟ ਨੂੰ ਬੰਦ ਕਰ ਸਕਦੇ ਹਾਂ ਜਾਂ 5 ਰੁਪਏ ਦੇ ਪੈਕੇਟ ਦੀ ਕੀਮਤ 10 ਰੁਪਏ ਤੱਕ ਵਧਾ ਸਕਦੇ ਹਾਂ। ਹੁਣ ਅਸੀਂ ਪੰਜ ਰੁਪਏ ਵਿੱਚ ਕਿਸੇ ਵੀ ਵਜ਼ਨ ਦੇ ਪੈਕਟ ਨਹੀਂ ਦੇ ਸਕਦੇ। ਸੂਰਿਆ ਫੂਡ ਐਂਡ ਐਗਰੋ ਦੇ ਪੋਰਟਫੋਲੀਓ ਵਿੱਚ 5 ਰੁਪਏ ਤੋਂ 10 ਰੁਪਏ ਦੀ ਕੀਮਤ ਵਾਲੇ 70 ਫੀਸਦੀ ਉਤਪਾਦ ਸ਼ਾਮਲ ਹਨ।

ਪੰਜ ਰੁਪਏ ਦੇ ਪੈਕਟ ਬੰਦ ਕੀਤੇ ਜਾ ਸਕਦੇ ਹਨ

ਕੰਪਨੀਆਂ ਦਾ ਕਹਿਣਾ ਹੈ ਕਿ ਸਾਡੇ 'ਤੇ ਜਲਦ ਹੀ ਸਿਰਫ 10 ਰੁਪਏ ਦੇ ਪੈਕੇਟ ਵੇਚਣ ਦਾ ਦਬਾਅ ਪੈ ਸਕਦਾ ਹੈ। ਪਾਰਲੇ ਦਾ ਕਹਿਣਾ ਹੈ ਕਿ ਅਗਲੇ ਦੋ-ਤਿੰਨ ਸਾਲਾਂ ਵਿੱਚ ਪੰਜ ਰੁਪਏ ਦੇ ਪੈਕੇਟ ਦੀ ਕੀਮਤ ਸਿਰਫ਼ 10 ਰੁਪਏ ਹੋ ਸਕਦੀ ਹੈ। ਹੌਲੀ-ਹੌਲੀ 5 ਰੁਪਏ ਦਾ ਪੈਕੇਟ ਬੰਦ ਕੀਤਾ ਜਾ ਸਕਦਾ ਹੈ ਕਿਉਂਕਿ ਇਹ ਖਪਤਕਾਰਾਂ ਦੀ ਮੰਗ ਨੂੰ ਪੂਰਾ ਕਰਨ ਦੇ ਯੋਗ ਨਹੀਂ ਹੈ। ਪਿਛਲੇ ਹਫਤੇ ਵਿੱਤੀ ਨਤੀਜਿਆਂ ਦੀ ਘੋਸ਼ਣਾ ਕਰਦੇ ਹੋਏ, ਬ੍ਰਿਟੇਨਿਆ ਨੇ ਕਿਹਾ ਸੀ ਕਿ ਇਸ ਸਾਲ ਕੀਮਤਾਂ ਵਿੱਚ 10 ਪ੍ਰਤੀਸ਼ਤ ਵਾਧੇ ਦੀ ਜ਼ਰੂਰਤ ਹੈ। ਇਹ ਵਾਧਾ ਭਾਰ ਘਟਾ ਕੇ ਕੀਤਾ ਜਾਵੇਗਾ।