ಆಕಸ್ಮಿಕವಾಗಿ ಬೇರೆಯವರ ಹಣ ನಿಮ್ಮ ಅಕೌಂಟ್`ಗೆ ಬಂದಿದ್ಯಾ? ಈ ವಿಷಯಗಳು ನಿಮಗೂ ತಿಳಿದಿರಲಿ

Banking: ಇದು ಡಿಜಿಟಲ್ ಯುಗ. ಈ ಡಿಜಿಟಲ್ ಯುಗದಲ್ಲಿ ಆನ್‌ಲೈನ್ ಬ್ಯಾಂಕಿಂಗ್ ಸಹಕಾರದಿಂದಾಗಿ ಬಹುತೇಕ ಬ್ಯಾಂಕಿಂಗ್ ಸಂಬಂಧಿತ ಕೆಲಸಗಳನ್ನು ನೀವು ಕುಳಿತಿರುವಲ್ಲಿಯೇ ಪೂರ್ಣಗೊಳಿಸಬಹುದು. ಕೆಲವೊಮ್ಮೆ ಒಂದು ಖಾತೆಯಿಂದ ಇನ್ನೊಂದು ಖಾತೆಗೆ ಹಣ ವರ್ಗಾವಣೆ ಮಾಡುವಾಗ ಅದು ತಪ್ಪಾಗಿ ಬೇರೆ ಖಾತೆಗೆ ವರ್ಗಾವಣೆಯಾಗಬಹುದು. ಈ ರೀತಿ ಹಠಾತ್ ಆಗಿ ನೀವು ಯಾರದಾದರೂ ಹಣವನ್ನು ನಿಮ್ಮ ಖಾತೆಯಲ್ಲಿ ಸ್ವೀಕರಿಸಿದರೆ  ಏನು ಮಾಡಬೇಕು ಗೊತ್ತಾ? 

ನಿಮ್ಮ ಬ್ಯಾಂಕ್ ಖಾತೆಗೆ ಆಕಸ್ಮಿಕವಾಗಿ  ಬೇರೆಯವರ ಹಣ ಬಂದರೆ ಏನು ಮಾಡಬೇಕು?
ಈ ಕೆಲಸವನ್ನು ಎಂದಿಗೂ ಮಾಡಬೇಡಿ: 
ಮೊದಲೇ ತಿಳಿಸಿದಂತೆ ಅಜ್ಞಾತ ಮೂಲಗಳಿಂದ ಇಲ್ಲವೇ ಬೇರೆಯವರ ಹಣ ನಿಮ್ಮ ಖಾತೆಗೆ ಬಂದರೆ ಅಂತಹ ಹಣವನ್ನು ಬಳಸಿಕೊಳ್ಳುವ ತಪ್ಪನ್ನು ಎಂದಿಗೂ ಮಾಡಬಾರದು. 

ಡಾಕ್ಯುಮೆಂಟ್ : 
ನಿಮ್ಮ ಖಾತೆಗೆ ವರ್ಗಾವಣೆಯಾಗಿರುವ ಹಠಾತ್ ಠೇವಣಿಗಳ ದಾಖಲೆಯನ್ನು ಇರಿಸಿಕೊಳ್ಳಲು ಅಥವಾ ವಹಿವಾಟಿಗೆ ಸಂಬಂಧಿಸಿದ ಯಾವುದೇ ಮಾಹಿತಿಯನ್ನು ಸಂಗ್ರಹಿಸಲು ಸ್ಕ್ರೀನ್‌ಶಾಟ್‌ಗಳನ್ನು ತೆಗೆದುಕೊಳ್ಳಿ. ವಾಸ್ತವವಾಗಿ, ಈ ಕುರಿತಂತೆ ಬ್ಯಾಂಕ್‌ನೊಂದಿಗೆ ಸಂವಹನ ನಡೆಸುವಾಗ ನಿಮಗೆ ಈ  ಡಾಕ್ಯುಮೆಂಟ್ ಬೇಕಾಗಬಹುದು. 

ಇದನ್ನೂ ಓದಿ- ಮಾರ್ಚ್ ವೇಳೆಗೆ ಬದಲಾಗಲಿದೆ ಟೋಲ್-ಟ್ಯಾಕ್ಸ್ ಸಂಗ್ರಹ ವಿಧಾನ: ಈ ಬಗ್ಗೆ ಸಚಿವ ನಿತಿನ್ ಗಡ್ಕರಿ ಹೇಳಿದ್ದೇನು?

ಕಾನೂನು ಪ್ರಕ್ರಿಯೆ: 
ಹಠಾತ್ ಹಣ ವರ್ಗಾವಣೆಗೆ ಸಂಬಂಧಿಸಿದ ಕಾನೂನುಗಳ ಬಗ್ಗೆ ತಿಳಿದಿರಲಿ. ಬೇರೊಬ್ಬರ ಹಣವನ್ನು ಅನಧಿಕೃತವಾಗಿ ಬಳಸುವುದು ನಿಮ್ಮ ವಿರುದ್ಧ ಕಾನೂನು ಕ್ರಮಕ್ಕೆ ಕಾರಣವಾಗಬಹುದು. ಪರಿಸ್ಥಿತಿಯನ್ನು ಸುಧಾರಿಸುವ ನಿಮ್ಮ ಬಯಕೆಯನ್ನು ಪ್ರದರ್ಶಿಸಲು ಬ್ಯಾಂಕಿನ ತನಿಖೆಯೊಂದಿಗೆ ಸಂಪೂರ್ಣವಾಗಿ ಸಹಕರಿಸಿ.

ಬ್ಯಾಂಕ್ ಶಾಖೆಯನ್ನು ಸಂಪರ್ಕಿಸಿ: 
ನಿಮ್ಮ ಬ್ಯಾಂಕ್ ಖಾತೆಗೆ ಅಜ್ಞಾತ ಮೂಲದಿಂದ ಹಣ ವರ್ಗಾವಣೆಯಾಗಿರುವ ಬಗ್ಗೆ ಮಾಹಿತಿ ನೀಡಲು ನಿಮ್ಮ ಬ್ಯಾಂಕ್ ಶಾಖೆಯನ್ನು ಸಂಪರ್ಕಿಸಿ. ವಹಿವಾಟಿನ ಉಲ್ಲೇಖ ಸಂಖ್ಯೆ, ದಿನಾಂಕ ಮತ್ತು ಮೊತ್ತ ಸೇರಿದಂತೆ ಎಲ್ಲಾ ವಿವರಗಳನ್ನು ಅವರಿಗೆ ಒದಗಿಸಿ. ಈ ಬಗ್ಗೆ ಸರಿಯಾದ ಕ್ರಮ ಕೈಗೊಳ್ಳಲು ಬ್ಯಾಂಕ್‌ಗಳು ಪ್ರೋಟೋಕಾಲ್‌ಗಳನ್ನು ಹೊಂದಿವೆ.

ಬ್ಯಾಂಕ್ ವಿಚಾರಣೆ ಪ್ರಕ್ರಿಯೆ: 
ಬ್ಯಾಂಕ್‌ಗಳು ಹಣದ ಮೂಲವನ್ನು ಪತ್ತೆಹಚ್ಚಲು ಮತ್ತು ವಹಿವಾಟಿನಲ್ಲಿ ಆಗಿರುವ ತಪ್ಪನ್ನು ಸರಿಪಡಿಸಲು ಆಂತರಿಕ ತನಿಖೆಯನ್ನು ನಡೆಸುತ್ತವೆ. ಈ ಪ್ರಕ್ರಿಯೆಯು ಸ್ವಲ್ಪ ಸಮಯ ತೆಗೆದುಕೊಳ್ಳಬಹುದು, ಆದರೆ ಸಮಸ್ಯೆಯನ್ನು ನಿಖರವಾಗಿ ಪರಿಹರಿಸಲು ಇದು ತುಂಬಾ ಅವಶ್ಯಕ ಮಾರ್ಗವಾಗಿದೆ. 

ಇದನ್ನೂ ಓದಿ- ಹೊಸ ವರ್ಷಕ್ಕೂ ಮುನ್ನವೇ ವೇತನ ಹೆಚ್ಚಿಸಿದ ಸರ್ಕಾರ! ಸರ್ಕಾರಿ ನೌಕರರ ಕೈ ಸೇರುವ ಮೊತ್ತ ಎಷ್ಟು ?

ಬ್ಯಾಂಕ್‌ನೊಂದಿಗೆ ಸಂವಹನ: 
ತಪ್ಪಾದ ವಹಿವಾಟಿನ ಮೂಲಕ ನಿಮ್ಮ ಖಾತೆ ಸೇರಿರುವ ಹಣವನ್ನು ಸರಿಯಾದ ಖಾತೆ ಸೇರಿಸಲು ಪರಿಶೀಲನೆ ಪ್ರಕ್ರಿಯೆಯ ಉದ್ದಕ್ಕೂ ನಿಮ್ಮ ಬ್ಯಾಂಕ್‌ನೊಂದಿಗೆ ನಿಯಮಿತವಾಗಿ ಸಂಪರ್ಕದಲ್ಲಿರಿ. 

ಮರುಪಾವತಿ: 
ಬ್ಯಾಂಕ್ ನಿಮ್ಮ ಖಾತೆ ಸೇರಿರುವ ಹಣದ ಸರಿಯಾದ ಮಾಲೀಕರ ಬಗ್ಗೆ ಮಾಹಿತಿ ಪಡೆದ ಬಳಿಕ ಖಾತೆಯಲ್ಲಿರುವ ಹಣವನ್ನು ಅವರ ಖಾತೆಗೆ ಮರುಪಾವತಿ ಮಾಡುವಂತೆ ಮಾರ್ಗದರ್ಶನ ನೀಡುತ್ತದೆ. ಯಾವುದೇ ಹೆಚ್ಚಿನ ತೊಡಕುಗಳನ್ನು ತಪ್ಪಿಸಲು ಬ್ಯಾಂಕ್ ನೀಡಿದ ಸೂಚನೆಗಳನ್ನು ತಕ್ಷಣವೇ ಅನುಸರಿಸಿ. ಈ ಮಾರ್ಗಗಳನ್ನು ಅನುಸರಿಸುವ ಮೂಲಕ ನೀವು ಬೇರೆಯವರ ಹಣ ನಿಮ್ಮ ಖಾತೆ ಸೇರಿದಾಗಲೂ ಕೂಡ ಯಾವುದೇ ಕಾನೂನಾತ್ಮಕ ತೊಡಕುಗಳನ್ನು ಎದುರಿಸುವುದನ್ನು ತಪ್ಪಿಸಬಹುದು. ನಿಮ್ಮ ಬ್ಯಾಂಕ್ ಖಾತೆ ಫ್ರೀಜ್ ಆಗುವುದರಿಂದಲೂ ಬಚಾವ್ ಆಗಬಹುದು.