Angry Rantman: 27ನೇ ವಯಸ್ಸಿಗೆ ಇಹಲೋಕ ತ್ಯಜಿಸಿದ‌ ʼKGF, ಕಾಂತಾರʼ ಮೆಚ್ಚಿದ್ದ ಖ್ಯಾತ ಯೂಟ್ಯೂಬರ್!

Abhradeep Saha Death: ರಾಕಿಂಗ್‌ ಸ್ಟಾರ್‌ ಯಶ್‌ ಅವರ ʼಕೆಜಿಎಫ್‌ʼ, ರಿಷಬ್‌ ಶೆಟ್ಟಿ ಅವರ ʼಕಾಂತಾರʼ ಸೇರಿದಂತೆ ಹಲವಾರು ಕನ್ನಡ ಸಿನಿಮಾಗಳನ್ನು ಮೆಚ್ಚಿಕೊಂಡಿದ್ದ, ತನ್ನ ಮಾತಿನ ಶೈಲಿಯಿಂದಲೇ ಸಿನಿಮಾಗಳ ರಿವ್ಯೂ ನೀಡುತ್ತಿದ್ದ ಆಂಗ್ರಿ ರ್ಯಾಂಟ್‌ಮ್ಯಾನ್‌ ಎಂದೇ ಫೇಮಸ್‌ ಆಗಿದ್ದ ಯುವ ಯೂಟ್ಯೂಬರ್‌ ಅಬ್ರದೀಪ್‌ ಸಹಾ ನಿಧನರಾಗಿದ್ದಾರೆ. ಕೇವಲ 27ನೇ ವಯಸ್ಸಿಗೆ ಅಬ್ರದೀಪ್‌ ಸಾವನ್ನಪ್ಪಿದ್ದು, ಅವರ ಲಕ್ಷಾಂತರ ಅಭಿಮಾನಿಗಳಿಗೆ ಶಾಕ್‌ ಆಗಿದೆ. 

ಬಹು ಅಂಗಾಂಗ ವೈಫಲ್ಯದಿಂದ ಮಂಗಳವಾರ ರಾತ್ರಿ (ಏಪ್ರಿಲ್‌ 16) ಅಬ್ರದೀಪ್‌ ನಿಧನರಾಗಿದ್ದಾರೆ. ಅವರ ನಿಧನದ ಸುದ್ದಿಯನ್ನು ಕುಟುಂಬಸ್ಥರು ಸೋಷಿಯಲ್‌ ಮೀಡಿಯಾ ಖಾತೆಯಲ್ಲಿ ಅಧಿಕೃತವಾಗಿ ಹಂಚಿಕೊಂಡಿದ್ದಾರೆ. ಸೋಷಿಯಲ್‌ ಮೀಡಿಯಾ ಬಳಕೆದಾರರು ಅಬ್ರದೀಪ್‌ ನಿಧನಕ್ಕೆ ಆಘಾತ ವ್ಯಕ್ತಪಡಿಸಿದ್ದು, ಸಂತಾಪ ಸೂಚಿಸಿದ್ದಾರೆ. 

ಇದನ್ನೂ ಓದಿ: Ram Mandir: ಕನ್ನಡದಲ್ಲಿ ಬರಲಿದೆ ಅಯೋಧ್ಯೆ ಶ್ರೀರಾಮಮಂದಿರದ ಬಯೋಪಿಕ್!!

ಯೂಟ್ಯೂಬ್‌ ಮತ್ತು ಸಾಮಾಜಿಕ ಜಾಲತಾಣದಲ್ಲಿ ಹೆಚ್ಚಿನ ಸಂಖ್ಯೆಯ ಫಾಲೋವರ್ಸ್‌ ಮತ್ತು ಸಬ್‌ಸ್ಕೈಬರ್ಸ್‌ ಹೊಂದಿದ್ದ ಅಬ್ರದೀಪ್‌ ಅನಾರೋಗ್ಯಕ್ಕೆ ತುತ್ತಾಗಿದ್ದರು. ಹೀಗಾಗಿ ಅವರನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿತ್ತು. ಇತ್ತೀಚೆಗಷ್ಟೇ ಅವರು ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ಆದರೆ ಮಂಗಳವಾರ ರಾತ್ರಿ ಅವರು ಸಾವನ್ನಪ್ಪಿದ್ದಾರೆ.

ಅಬ್ರದೀಪ್‌ ಅವರು ರಾಕಿಂಗ್‌ ಸ್ಟಾರ್‌ ಯಶ್‌ ನಟನೆಯ ಕೆಜಿಎಫ್‌ ಸಿನಿಮಾವನ್ನು ಹಾಡಿ ಹೊಗಳಿದ್ದರು. ಯಶ್‌ ಅಭಿನಯಕ್ಕೆ ಫಿದಾ ಆಗಿ ʼಸಲಾಂ ರಾಕಿ ಬಾಯ್‌ʼ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ರವಿ ಬಸ್ರೂರ್‌ ಅವರ ಸಂಗೀತಕ್ಕೆ ಸೆಲ್ಯೂಟ್‌ ಎಂದು ಹೇಳಿದ್ದ ಅವರು ಬಾಲಿವುಡ್‌ ಇಂಡಸ್ಟ್ರಿಯನ್ನೇ ಟೀಕಿಸಿದ್ದರು. ರಿಷಬ್‌ ಶೆಟ್ಟಿಯವರ ʼಕಾಂತಾರʼ ಸಿನಿಮಾಗೂ ಮೆಚ್ಚುಗೆ ಸೂಚಿಸಿದ್ದ ಅಬ್ರದೀಪ್‌ ಕನ್ನಡ ಚಿತ್ರರಂಗವನ್ನು ಹಾಡಿಹೊಗಳಿದ್ದರು. ಇವರ ಸಿನಿಮಾ ವಿಮರ್ಶೆಗೆ ಹೊಂಬಾಳೆ ಫಿಲಂಸ್‌ ಕೂಡ ಮೆಚ್ಚುಗೆ ವ್ಯಕ್ತಪಡಿಸಿತ್ತು. ತನ್ನ ವಿಭಿನ್ನ ಕಂಟೆಂಟ್‌ ಮೂಲಕ ಸಖತ್‌ ಜನಪ್ರಿಯತೆ ಗಳಿಸಿದ್ದ ಅಬ್ರದೀಪ್‌ ಯೂಟ್ಯೂಬ್‌ನಲ್ಲಿ 483K subscribersಗಳನ್ನು ಹೊಂದಿದ್ದರು. ತಮ್ಮ ವಿಭಿನ್ನ ಸಿನಿಮಾ ರಿವ್ಯೂನಿಂದಲೇ ಅವರು ಲಕ್ಷಾಂತರ ಅಭಿಮಾನಿಗಳನ್ನು ಸಹ ಸಂಪಾದಿಸಿದ್ದರು.