ತಲೈವಾ ʼಜೈಲರ್‌ʼ ಸಿನಿಮಾ ನೋಡಲು ಚೆನ್ನೈಗೆ ಬಂದ ʼಜಪಾನ್‌ ಜೋಡಿʼ..! ಇದಪ್ಪಾ ಅಭಿಮಾನ ಅಂದ್ರೆ

Rajinikanth fans : ಭಾರೀ ನಿರೀಕ್ಷೆಯ ನಡುವೆ ಜೈಲರ್‌ ಚಿತ್ರ ಇಂದು (ಆಗಸ್ಟ್ 10) ಬಿಡುಗಡೆಯಾಗಿದೆ. ಜನರು ಪಟಾಕಿಗಳನ್ನು ಸಿಡಿಸಿ, ಸೂಪರ್‌ಸ್ಟಾರ್ ಕಟೌಟ್‌ ಹಾಕಿ ಸಂಭ್ರಮಿಸುತ್ತಿದ್ದಾರೆ. ಇದೀಗ ಜಪಾನಿನ ದಂಪತಿಗಳು ರಜನಿಕಾಂತ್ ಅವರ 'ಜೈಲರ್' ಚಿತ್ರವನ್ನು ಮೊದಲ ದಿನವೇ ನೋಡಲು ಚೆನ್ನೈಗೆ ಬಂದಿದ್ದು, ಈ ಕುರಿತು ವಿಡಿಯೋ ವೈರಲ್‌ ಆಗಿದೆ.

ರಜನಿಕಾಂತ್ ನಟನೆಯ 'ಜೈಲರ್' ಸಿನಿಮಾ ಉತ್ತಮ ವಿಮರ್ಶೆ ಪಡೆದುಕೊಂಡಿದೆ. ಸೂಪರ್‌ ಸ್ಟಾರ್‌ ಅಭಿಮಾನಿಗಳು ಚಿತ್ರವನ್ನು ನೋಡಿ ಖುಷಿ ವ್ಯಕ್ತಪಡಿಸುತ್ತಿದ್ದಾರೆ. 2 ವರ್ಷಗಳ ಬಳಿಕ ತಲೈವಾರನ್ನು ಸ್ಕ್ರೀನ್‌ ಮೇಲೆ ನೋಡಿ ಕುಣಿದು ಕುಪ್ಪಳಿಸುತ್ತಿದ್ದಾರೆ. ಇದರ ನಡುವೆ ಸ್ಥಳೀಯ ಚಿತ್ರಮಂದಿರದಲ್ಲಿ ಜೈಲರ್‌ ಚಲನಚಿತ್ರವನ್ನು ನೋಡಲು ಒಸಾಕಾದಿಂದ ಚೆನ್ನೈಗೆ ಜಪಾನಿನ ದಂಪತಿಗಳು ಬಂದಿದ್ದು, ವಿಶೇಷವಾಗಿತ್ತು. 

ಸುದ್ದಿ ಸಂಸ್ಥೆ ಪಿಟಿಐ ಚಿತ್ರೀಕರಿಸಿದ ಮತ್ತು ಟ್ವಿಟ್ಟರ್‌ನಲ್ಲಿ ಪೋಸ್ಟ್ ಮಾಡಿದ ವೀಡಿಯೊದಲ್ಲಿ, ರಜನಿಕಾಂತ್ ಅವರ ಜೈಲರ್‌ ಚಿತ್ರ ವೀಕ್ಷಣೆಗಾಗಿ ಬಂದ ಜಪಾನ್‌ ಜೋಡಿಯನ್ನು ಕಾಣಬಹುದು. ರಜನಿಕಾಂತ್ ಅವರ ದೊಡ್ಡ ಫ್ಯಾನ್‌ ಯಸುದಾ ಹಿಡೆತೋಶಿ ತಮಿಳಿನಲ್ಲಿ ಮಾತನಾಡಿ, ಸೂಪರ್‌ಸ್ಟಾರ್ ಯಶಸ್ಸಿನ ಬಗ್ಗೆ ತಮ್ಮ ಸಂತೋಷವನ್ನು ವ್ಯಕ್ತಪಡಿಸಿದರು. ಈ ಕುರಿತು ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ. 

ಅಲ್ಲದೆ, ಯಸುದಾ ಹಿಡೆತೋಶಿ, ಜೈಲರ್ ಚಲನಚಿತ್ರವನ್ನು ನೋಡಲು, ನಾವು ಜಪಾನ್‌ನಿಂದ ಚೆನ್ನೈಗೆ ಬಂದಿದ್ದೇವೆ ಎಂದು ಹೇಳಿದರು. ಜೊತೆಗೆ, ರಜನಿಕಾಂತ್ ಹಳೆಯ ಸಿನಿಮಾದ ಡೈಲಾಗ್‌ ಹೇಳಿ ಅಭಿಮಾನ ಮೆರೆದರು. ಸುಮಾರು ಎರಡು ದಶಕಗಳಿಂದ ರಜನಿ ಅವರ ನಟನೆ ಮತ್ತು ವ್ಯಕ್ತಿತ್ವವನ್ನು ಮೆಚ್ಚಿಕೊಂಡಿದ್ದೆ ಎಂದು ಯಸುದಾ ತಿಳಿಸಿದ್ದಾರೆ. ಈ ಜೋಡಿ ರಜನಿಕಾಂತ್ ಅಭಿನಯದ ಚಿತ್ರ ನೋಡಲು ಚೆನ್ನೈಗೆ ಪ್ರಯಾಣ ಬೆಳೆಸಿದ್ದು ಇದೇ ಮೊದಲಲ್ಲ. ಈ ಹಿಂದೆ ‘ದರ್ಬಾರ್’ ಮತ್ತು ‘ಕಬಾಲಿ’ ನೋಡಲು ಬಂದಿದ್ದರಂತೆ.